ОХУ-ын Украинд явуулж буй дайн үргэлжилж байгаа энэ үед Улаан талбай дээр болох энэ жилийн Ялалтын баярын парад өмнөх жилүүдийнхээс ч илүү ач холбогдолтой болох нь тодорхой болоод байна. Дэлхий дахины анхаарал Москва дээр төвлөрч, бүгд Украины асуудал дээр ОХУ-ын Ерөнхийлөгч Владимир Путины хийх дараагийн нүүдлийг хүлээж байна гэхэд хилсдэхгүй юм.
Эил бүрийн тавдугаар сарын 9-ны өдөр ОХУ-ын хуанлийн хамгийн чухал өдрүүдийн нэг бөгөөд Орос даяар Дэлхийн 2-р дайнд Зөвлөлт Холбоот улс Германы нацистуудыг ялсны баярыг тэмдэглэдэг.
Энэ жилийн Ялалтын баярын өдөр ОХУ-ын Ерөнхийлөгч Владимир Путин оросууд Украинд ялалт байгуулсан гэсэн мэдээ дуулгахаар төлөвлөсөн ч ОХУ-ын Украинд явуулж буй дайн нь төлөвлөгөөний дагуу явагдахгүй байгаа нь мөн оросууд одоог хүртэл Донбассын бүс нутгийг хяналтандаа бүрэн авч чадаагүй нь асуудал болоод байна.
Улс төрийн шинжээчдийн хэлж байгаагаар В. Путины дайснууд ч тэр дэмжигчид нь тэр бүгд В. Путиныг ямар нэг алхам хийхийг хүлээж байна.
Оросын төрийн тэргүүн ямар нэг чухал мэдэгдэл хийхгүй бол энэ нь түүний улс төрийн талбар дахь ялагдал болно хэмээн ажиглагчид үзэж байна.
ОХУ-ын иргэдийн дунд явуулсан санал асуулгын дүнгээр оросуудын дийлэнх нь ОХУ Украин руу дайрсан явдлыг дэмжиж байна гэж гарсан ч олон улсын ажиглагчид эрх баригчдын эсрэг үзэл бодлоо илэрхийлснийхээ төлөө дарамт шахалтанд өртдөг тус улсад судалгааны агентлагууд үнэн зөв мэдээлэл өгч байгаа эсэхэд эргэлзэж байна.
ОХУ Украин руу довтолсон эхний хэдэн долоо хоногт ОХУ-ын томоохон хотуудад дайныг эсэргүүцсэн иргэдийн жагсаал цуглаан зохион байгуулагдсан ба ОВД-Инфо байгууллагаас мэдээлснээр тэдгээр жагсаал цуглааны үеэр 15 мянга гаруй хүн баривчлагдсан билээ. ОХУ-ын эрх баригчдын хэлж байгаагаар ОХУ-ын зэвсэгт хүчнийхэн
Украины зүүн хязгаарт амьдарч буй орос хэлээр ярьдаг, Оросыг дэмжигчдийг Украины эрх баригчдын аюул дарамтаас аврах зорилготойгоор Украин руу дайрсан. Ерөнхийлөгч В. Путин ОХУ-ыг нэг талаас хамгаалагч нөгөө талаас хохирогч, Украин болон барууны орнууд нь түрэмгийлэгч, өдөөн хатгагч болгон харагдуулах бодлого баримталж байгааг олон улсын шинжээчид онцолж байна.
Оросын телевизийн сувгууд Ялалтын баярын өдөр ойртож байгаатай холбогдуулан АНУ болон Европын улс орнуудыг буруушаасан мэдээ мэдээлэл цацах нь нэмэгдэж, барууны орнууд Дэлхийн 3-р дайныг эхлүүлэхээр өдөөн хатгаж байна гэсэн утга агуулга бүхий мэдээллийг иргэдэд хүргэж байна.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
