“Газпром” Хятад руу байгалийн хийн хоолойг хаагуур тавих вэ

Twitter Print
2014 оны 10-р сар 17-нд 09:32 цагт
Мэдээний зураг,

ОХУ-ын “Байкал медиа” агентлаг ийм нийтлэл гаргажээ

ОХУ-ын байгалийн хийн гол экспортлогч “Газпром” компанийн захирал А.Миллер олон улсын байгалийн хийн форумд оролцохдоо, “Хятад руу нийлүүлэх манай байгалийн хий ойрын үед жилд 60, тэр ч бүү хэл 100 тэрбум ам.метрт хүрнэ” гэж мэдэгджээ.

ОХУ-аас БНХАУ руу татаж буй “Сибирийн хүч” хийн хоолой ашиглалтад орсноор жилд 38 тэрбум ам.метр байгалийн хий тээвэрлэх боломж нээгдэх юм. Харин байгалийн хийг үүнээс хоёр, бүр гурав дахин нэмэгдүүлэхэд нэмж нэгээс хоёр хийн хоолой барих шаардлагатай ажээ.

Одоогоор “Сибирийн хүч”-ийн дараа “Алтай” хэмээх байгалийн хийн хоолой тавих төсөл хамгийн идэвхтэй хэлэлцэгдэж буй юм. Гэхдээ “Алтай” хийн хоолой заавал ч үгүй Укокийн тэгш өндөрлөг газраар дайрах болоод байгаа. Гэтэл Укок нь мах ховор болсон ирвэс эрх дураараа амьдардаг дархан цаазат газар бус, археологийн дурсгалт газруудаараа алдартай билээ. Чухам эндээс дэлхийд нэрд гарсан “Алтайн хатан”-ы шарил олдсон билээ.

Иймээс ч “Алтай” хийн хоолойг эсэргүүцэгчид их ажээ. Хийн хоолойн төслийн эсрэг Дэлхийн унаган байгалийн сан (WWF), ЮНЕСКО, “Greenpeace” дуу хоолойгоо нэгтгэж байгаа юм. Дээр нь ОХУ-ын Байгалийн нөөцийн яам тус хоолойг газар хөдлөлтийн идэвхтэй бүсээр дамжиж буйг анхааруулжээ.

Ийм л үед Монгол Улс байгалийн хийн хоолойг өөрийн газар нутгаараа өнгөрүүлэх яриа хэлэлцээг ОХУ, БНХАУ-ын аль алинтай идэвхтэй өрнүүлэх болсон байна. Байгалийн хийн хоолойг Монголоор тавих нь олон талаараа “Алтай”-н төслөөс давуу.

Учир нь байгалийн хийг Монголоор дамжуулах “Талын зам” төсөл илүү их зардал гаргахад хүргэх газар хөдлөлтийн идэвхтэй бүсээр дамжихгүйн дээр улс төрийн хувьд тогтворгүй, дэд бүтцэд элдэв террорист халдлага гарах магадлал ихтэй Шиньжан-Уйгарын өөртөө засах орноор өнгөрөхгүйгээс гадна Хятадын нийслэл Бээжин болон аж үйлдвэр өндөр хөгжсөн нутгууд руу шууд хөтлөх юм. Тэгээд ч Монголоор дамжих төсөл тус улсаас гадна Буриад, Ар Байгалийг ч байгалийн хийгээр давхар хангах ач холбогдолтойг мөн тэмдэглэх хэрэгтэй.

Гэхдээ энэ төсөлд ч олон саад бий. Экологичид хоолойг Тункины хөндийгөөр тавихыг ихээр эсэргүүцдэг. Мөн Байгал нуурын ёроолоор тавих санал ч бий. Уг нь “Газпром” онолын хувьд газрынхаас илүү найдвартай далайн ёроолоор хоолой тавих туршлага ихээр хуримтлуулсан билээ. Гэвч одоогоор Буриадын эрдэм шинжилгээний төв, сенатч А.Тулохоновын дэмжлэг ч энэ төслийн талаархи олон нийтийн санаа бодлыг өөрчилж чаддахгүй байгаа юм.

Монгол Улсын Ерөнхийлөгч Ц.Элбэгдорж “Талын зам” төслийн талаар В.Путин, Си Зиньпин нартай хэлэлцээ хийгээд буй. БНХАУ-ын дарга төслийг ихээр сонирхож, зарим мэдээллээр тус улс хийн хоолойн барилгын санхүүжилтийг даах гэж байгаа ч ОХУ-ын Ерөнхийлөгч энэ талаар олон нийтэд тоймтой зүйл хэлэхгүй өнгөрсөн билээ.

Гэхдээ Европт байгалийн хий нийлүүлэх тал дээрх өөрчлөлт, эдийн засгийн хориг арга хэмжээ, эдийн засгийн уналт зэргээс улбаалан ОХУ-ын төрийн тэргүүн энэ асуудлаар хурдан шийдвэр гаргахад хүргэж байна. Хятадын байгалийн хийн өсөн нэмэгдэж буй эрэлт хэрэгцээ Алтайн төслийг ОХУ, Монголын төслийг БНХАУ-ын санхүүжилтээр шийдэх нь ашигтай байж болох юм. Тэгээд ч байгалийн хий нийлүүлэгч улс орон дэлхийд улам бүр нэмэгдэж буйг ч бодолцох хэрэгтэй биз ээ.

Б.Барс

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.