Барууны орнуудад Оросын иргэдэд виз олгохгүй байхыг шаарджээ

Twitter Print
2022 оны 08-р сар 10-нд 11:43 цагт
Мэдээний зураг,

Украины Ерөнхийлөгч Владимир Зеленский The Washington Post сонинд өгсөн ярилцлагадаа барууны орнуудад ОХУ-ын иргэдэд хилийн хориг тавихыг шаарджээ. Түүний хэлснээр тус хориг нь дайныг эсэргүүцэж Европ руу зугтсан оросуудад ч үйлчлэх ёстой аж.

ОХУ Украин руу довтолсноос хойш Европын зарим орнууд ОХУ-ын иргэдэд виз олгох үйл явцдаа хязгаарлалт тогтоосон билээ. Чех, Словак, Литва, Латви, Эстони, Мальта зэрэг улс оросуудад жуулчны виз олгохоос татгалзсан бол Бельги, Нидерланд, Дани улс консулын ажилчдын хомстлоос болж оросуудад жуулчны виз олгохоо зогсоожээ.

Коронавирусын цар тахлын үеийн хязгаарлалт цуцлагдаж ОХУ газрын хилээ нээснээс хойш оросууд ОХУ-тай хиллэдэг Латви, Эстони, Финляндаар дамжин Европын холбооны бусад улс орнууд руу нэвтрэх болжээ. Энэ нь ОХУ-тай хиллэдэг орнуудын эрх баригчдын бухимдлыг төрүүлэх болсон байна.

Эстонийн Гадаад харилцааны сайд Урмас Рейнсалу энэ сарын 4-нд оросуудад Шенгений виз олгохыг бүр мөсөн хориглох, үүнийг хуулийн төсөл болгон өргөн барих хэрэгтэй хэмээн мэдэгджээ. Түүний энэ санаачлагыг энэ сарын сүүлээр болох Европын холбооны гадаад харилцааны сайд нарын уулзалтан дээр хэлэлцэх аж. Урмас Рейнсалугийн саналыг Латвийн Гадаад харилцааны сайд Эдгар Ринзевич дэмжиж буйгаа илэрхийлжээ. Энэ сарын 4-нд Москва дахь Латви улсын элчин сайдын яам ямар ч ангиллын виз олгохоо зогсоожээ. Өмнө нь оросууд хүмүүнлэгийн ажил, хөдөлмөр эрхлэр шугамаар виз авч байсан аж.

Финлянд улс оросуудад 7-р сарын 1-нээс виз олгож эхэлсэн ч тус улсын улс төрийн бүх намуудын удирдлагууд оросуудад виз олгохыг зогсоохыг шаардаж эхэлжээ. Финляндийн иргэдийн дунд явуулсан санал асуулгаар 58 хувь нь оросуудад виз олгохыг зогсоохыг дэмжсэн байна. Финлянд улсын парламент уг асуудлыг Европын холбооноос тодорхой шийдвэр гарах хүртэл хэлэлцэхгүй гэж мэдэгдсэн ба үүний оронд оросын иргэдээс хүлээн авах визний хүсэлтийн тоондоо хязгаарлалт тавих боломж байгааг онцолжээ.

Ерөнхийлөгч В. Зеленскийн ярилцлага нийтлэгдсэний дараахан Эстонийн Ерөнхий сайд Кая Каллас оросуудад Шенгений виз олгох явдлыг зогсоохыг уриалж, өөрийн твиттер хуудаснаа, "Оросуудад жуулчны виз олгохоо зогсоогооч ээ. Европ руу нэвтрэх нь хүний эрх биш харин эрх ямба юм." хэмээн бичсэн байна. Финляндын Ерөнхий сайд Санна Марин Эстонийн Ерөнхий сайд Кая Каллас, Украины Ерөнхийлөгч Владимир Зеленский нартай санал нэг байгаагаа илэрхийлжээ. Тэрээр, "ОХУ Европт хэрцгий түрэмгий дайн явуулж байх зуур оросууд юу ч болоогүй юм шиг амьдарч, Европ руу аялж байгаа нь буруу" хэмээн ярьжээ.

Европын холбооны зөвлөлийн албан ёсны төлөөлөгч Анита Хиппер сэтгүүлчид, дүрвэгсэд, Европын холбооны улсын иргэдийн төрөл төрөгсөд гээд визний хоригт багтах боломжгүй хүмүүс үргэлж байх болно гэдгийг онцолжээ.

ОХУ-ын Аюулгүй байдлын зөвлөлийн орлогч дарга Дмитрий Медведев Украины Ерөнхийлөгч В. Зеленскийг "Украины алиалагч" хэмээн нэрлэж, "хамгийн сүүлд нэг үндэстний эсрэг иймэрхүү санааг хэрэгжүүлэх гэж оролдсон хүн бол Адольф Гитлер" хэмээн мэдэгдсэн бол ОХУ-ын Ерөнхийлөгч В. Путины хэвлэлийн нарийн бичгийн дарга Дмитрий Песков оросуудыг эсвэл ОХУ-ыг тусгаарлаж ганцаардуулах гэсэн оролдлого нь "ямар ч ирээдүйгүй" хэмээн онцолжээ.

Эх сурвалж: meduza.io

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.