Спутник хийлгэсэн зорчигчдыг АНУ хилээрээ нэвтрүүлэхгүй байгааг онцгойлон анхаараарай

Twitter Print
2022 оны 01-р сар 10-нд 14:55 цагт
Мэдээний зураг,

АНУ руу зорчихоор төлөвлөж буй хүмүүст

Спутник хийлгэсэн зорчигчдыг АНУ хилээрээ нэвтрүүлэхгүй байгааг онцгойлон анхаараарай. Зөвхөн ДЭМБ-гаас хүлээн зөвшөөрөгдсөн нэр бүхий вакцинуудыг хийлгэсэн эсвэл PCR шинжилгээний хариу нь сөрөг гарсан иргэдийг хилээр нэвтрүүлж байна. Хүлээн зөвшөөрөгдсөн вакцинуудын жагсаалтанд ОХУ-д үйлдвэрлэгдсэн Спутник 5 вакцин ороогүй гэдгийг анхаарна уу.

Хил маш хатуу байгаа. Хил дээрээс олон хүн вакцины асуудлаас болж буцаж байна. Түүний нэг жишээ нь вакцин хийлгэсэн бичгийг хоёр өөр улсын хэлээр хольж бичсэнээс болж асуудал үүсч байна.

Зураг дээрх Монголд хийлгэсэн вакцины бичигт вакцины нэр, үйлдвэрлэгч гэсэн хэсгийн мэдээллийг крилл үсгээр (оросоор) бичсэн байгааг анзаараарай. Энэ яг бодит болсон явдал учраас би энд зориуд дурдаж байна.

Америкийн хилийн ажилтнууд ямар вакцин хийлгэсэн болохыг огт уншиж чадахгүй байсан. СПУТНИК гэсэн үгийг утсаараа уншуулаад хайлт хийхэд ямар ч вакцины тухай мэдээлэл гарч ирэхгүй, харин “satellite” буюу хиймэл дагуул гэсэн үг л гарч ирсээр байлаа. Албан ёсны нэр нь Спутник 5 гэдгийг нь ч зөв бичилгүй, хариуцлагагүй хандсан байгааг та харж болно. Хилийн ажилтнууд “МУ-ын Эрүүл Мэндийн Яам” гэсэн үгийг уншаад толгой сэгсэрч байна билээ.

Нэг бол монголоороо бичээд албан ёсны орчуулгыг хавсаргахыг шаардах эсвэл тэр чигт нь англи хэл дээр бичих ёстой байв. Гэтэл хамгийн чухал мэдээллийг крилл, латин үсэг холиод бичсэн байх юм. Үүнийг Монголд, магадгүй орос хэлээр ярьдаг цөөн тооны улсууд л ойлгож уншиж чадах байх.

Түүнээс гадна АНУ-аас эх орон руугаа буцаж буй иргэдийг 72 цагийн дотор ковидын тест өгсөн байхыг шаардаж байгаа. Гэтэл Америкад хаа сайгүй авдаг хамгийн түгээмэл, үнэгүй тест болох (antigen)-ийг хүлээн зөвшөөрөхгүй байгаагаас Солонгосын онгоцонд (Korean Air, Asiana Airlines) иргэд маань сууж чадахгүй, нислэгээ аргагүйн эрхэнд хойшлуулах, нэмэлт мөнгө төлж өөр нислэгт багтах зэрэг багагүй бэрхшээл үүсч байна.

Хэрэв PCR шинжилгээ өгвөл хамгийн багадаа $130 төлнө. Үнэгүй шинжилгээ өгвөл 72 цагийн дотор хариу гарна. Гэтэл Монгол руу шууд нислэг байхгүй учир иргэд 72 цагт хүчинтэй байх ёстой гэсэн шийдвэрийн улмаас нислэгийн өмнөх 2 өдөрт багтаан өгөх гэж яарч байгаа. Харамсалтай нь тэр бүр шинжилгээ өгөх цаг олдохгүй, зарим мужид PCR-ийн шинжилгээ авахгүй байх тохиолдол ч байна. Энэ бол зөвхөн АНУ-ын жишээ. Өөр олон улс оронд энэ мэт бэрхшээлүүд гарч байгаа.

Иймд ард иргэддээ төвөг чирэгдэл багатай, амьдралд нийцсэн шийдвэрүүд гаргаж, улс орон бүр ковидтой холбоотойгоор хилийн ямар онцгой нөхцөл, шаардлага тавьж байгаа талаар дэлгэрэнгүй мэдээлэл өгч байгаасай хэмээн холбогдох хүмүүсээс хүсье.

Насанжаргалын Болортуяа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.