Монгол генерал НҮБ-ын хүчнийг удирдах болно

Twitter Print
2014 оны 10-р сар 16-нд 15:33 цагт
Мэдээний зураг,

НҮБ-ын Энхийг сахиулах ажиллагааны газраас Хойд бүсийн олон улсын хүчний командлагчаар БХЯ-ны Стратегийн бодлого, төлөвлөлтийн газрын дарга, бригадын генерал Д.Баярсайханыг томилох шийдвэрийг есдүгээр сарын 26-ны өдөр гаргажээ.

Тэрбээр энэ сарын 19-нд уг ажиллагааны газар орондоо очиж үүргээ гүйцэтгэж эхлэх юм. Монгол генерал олон улсын энхийг сахиулах ажиллагаанд бүсийн командлагчаар томилогдсон нь Монгол Улсын Батлан хамгаалах салбар, Зэвсэгт хүчний хувьд түүхэн тэмдэглэлт үйл явдал тохиож байгааг онцлон бригадын генерал Д.Баярсайханд БХЯ-наас хүндэтгэл үзүүлж, дурсгал гардуулж амжилт хүслээ. Өмнөд Судан улсад НҮБ-ын мандаттай "UNMISS"  энхийг сахиулах ажиллагаа 2011 оноос хойш үргэлжилж байгаа бөгөөд энэ онд НҮБ-ын Аюулгүй байдлын зөвлөлийн тогтоолооор “UNMISS” ажиллагааг өргөжүүлж, үүрэг гүйцэтгэх цэргийн тоо 6500 байсныг 12500 болгожээ.

Уг тогтоолын дагуу БНХАУ, Гана, Балба, Этиоп улсууд тус бүр 850 хүний бүрэлдэхүүнтэй мотобуудлагын батальоныг Өмнөд Судан улс руу нэмж илгээгээд байна. “UNMISS” ажиллагааны цэргийн хүчийг бүсийн командлалд хуваарилан зохион байгуулсан. Манай энхийг сахиулагчид Өмнөд Судан улсад үүрэг гүйцэтгэж байгаа. НҮБ-аас Судан улсад үүрэг гүйцэтгэж байгаа гадаад улсуудын цэргийн алба хаагчдын болон командлалын тоог нэмэгдүүлсэн. Манай Зэвсэгт хүчинд урилга ирсэн. Уг урилгын дагуу манай зэвсэгт хүчний генералууд шалгалт өгч, холбогдох ярилцлаганд орж тэдний тавьсан шаардлага стандартыг биелүүлж чадсан байна. Цаашдаа ч манай офицерууд олон улсын энхийг сахиулах ажиллагааны удирдах албан тушаалд ажиллах боломж байна.

Бригадын генерал Д.Баярсайхан “Хойд бүсийн командлагч нь дөрвөн батальон командлах чадвартай бригадын захирагч байх ёстой. Миний хувьд  Энэтхэг, Этиоп, Гана зэрэг улсын батальоныг захирна. Шалгуур үзүүлэлтийн хувьд хэлний мэдлэг сайтай байх шаардлагатай. Дөрвөн сектор дээр найман хүнийг өрсөлдүүлж шалгаруулсан.  Миний очих гэж байгаа секторын цагийн байдал хүнд, Өмнөд Суданы нефть олборлодог талбай нь тухайн бүс нутагт байдаг. Мөн иргэний дайны шинжтэй мөргөлдөөний үеэр 10 мянган хүн нас барж, сая гаруй хүн гэр орноосоо дүрвэсэн мэдээлэл байгаа. Өлсгөлөн болоод халдварт өвчин газар авсан гэдгээрээ онцгой бүсэд орно. Тус оронд борооны улирал дуусч байгаа. Бороо их орохоор дэд бүтэцгүй учраас гэрээсээ гардаггүй байна. Харин борооны улирал дууссаны дараа Засгийн газрын цэрэг нь сөрөг хүчний эсрэг том арга хэмжээ авна гэсэн  албан бус мэдээлэл байгаа. Хойд командлалын хариуцлагын бүсэд би нэг жилийн хугацаанд үүрэг гүйцэтгэнэ. Миний удирдлага дор Монгол, Гана, Энэтхэг, Руанда улсын мотобуудлагын батальонууд, Этиоп Улсын мотобуудлагын рот болон дэмжлэгийн салбарууд, нийт 4200 гаруй албан хаагч үүрэг гүйцэтгэнэ” хэмээн ярив.

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.