Хийн түлшний үнийг буулгахыг шаардсан иргэдийн жагсаал Казахстаны хотуудад үргэлжилж байна

Twitter Print
2022 оны 01-р сар 04-нд 10:40 цагт
Мэдээний зураг,

Энэ оны 1-р сарын 1-нээс эхлэн Казахстанд 1 литр хийн түлшний үнэ 120 тенге болтлоо нэмэгдсэн ба иргэд хийн түлшний үнийг 50-60 тенге болгож бууруулахыг шаардан жагсаж байна.

Жагсаал цуглаан болж буй газруудад интернет болон цахилгаан сүлжээ доголдсон талаар эх сурвалжууд мэдээлж байна. Жанаозен хот болон Мангистау мужийн хэд хэдэн тосгонд хийн түлшний үнийг бууруулахыг шаардсан жагсаал цуглаан үргэлжилсээр байна.

Өнгөрсөн даваа гарагийн шөнө Актау хотын хэдэн зуун оршин суугчид хотын талбайд цугларч, эрх баригчдад мөн адил шаардлагыг тавьжээ.

Эх сурвалжуудын мэдээлж байгаагаар Актау хот руу цэрэг цагдаа нарыг татжээ. Түүнээс гадна Магнистау мужид иргэд шаардлагыг нь биелүүлэхгүй тохиолдолд ажил хаялт зарлахаа мэдэгджээ. Нийслэл Астанад цагдаа нар Жанаозен хотод жагсаж буй иргэдийг дэмжин гудамжнаа гарсан 8 хүнийг баривчилсан ба нийслэлийн төв талбай руу орох гарах гарцыг хаажээ.

Гэрчүүдийн мэдээлж байгаагаар Актау хотоп болж буй жагсаал цуглаан үргэлжилж байгаа ба иргэд талбай дээр асар майхан барьж эхэлсэн байна. Нийгмийн сүлжээнд цагдаа нар хүч ашиглан жагсагчдыг бүслэхийг оролдож байгаа бичлэг тархаад байгаа ч Казахстаны Цагдаагийн ерөнхий газар жагсагчдын эсрэг хүч ашиглаагүй, цагдаа нар зөвхөн хэв журам сахиулах үүрэгтэй ажиллаж байгааг онцолжээ.

Казахстаны Ерөнхийлөгч Касым-Жомарт Токаев Казахстаны засгийн газарт "эдийн засгийн нөхцөл байдлыг харгалзан үзэж, хууль эрх зүйн хүрээнд Жанаозен хотод үүсээд буй асуудлыг шийдвэрлэхийг" даалгажээ.

Казахстаны засгийн газар Магнистау мужийн нийгэм, эдийн засгийн байдлыг судалж, хийн түлшний үнийг зохицуулах багц арга хэмжээг хэрэгжүүлэхээ мэдэгдэж, хийн түлшний үнийг 85-90 тенге болгох зохицуулалт хийхээр хэлэлцэж байгаагаа онцолсон юм.

Нөгөөтэйгүүр жагсагчид хийн түлшний үнийг 50 тенге болтол бууруулахыг шаардсаар байгаа аж. Казахстаны Эрчим хүчний сайд Магзум Мирзагалиев Казахстаны засгийн газарт өнөөдрийн байдлаар хийн түлшний үнийг 50 тенге болгон бууруулах боломж бололцоо байхгүй гэдгийг онцолжээ.

Эх сурвалж: dw.com

Содномцэрэнгийн Энхзаяа 

mongolcom.mn

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.