Хурандаа Ч.Болдбаатарт хотын цагдааг удирдах чадвар бий

Twitter Print
2014 оны 10-р сар 15-нд 08:11 цагт
Мэдээний зураг,

Цагдаагийн ерөнхий газрын дарга, тэргүүн комиссар С.Баатаржавын ширээн дээр өчигдөр хотын мээр Э.Бат-Үүлийн гарын үсэгтэй томилгооны санал очлоо. Энэ бол хурандаа Ч.Болдбаатарыг Улаанбаатар хотын Цагдаагийн газрын газрын даргаар томилуулах тухай бичиг байв. Албаны хүмүүсийн яриагаар, С.Баатаржав комиссар томилгоог зөвшөөрвөл өнөөдөр гарын үсэг зурж баталгаажуулах ажээ. Тодруулбал, хотын цагдаагийн газар өнөөдөр “шинэ” даргатай болж магадгүй байна. Хэрвээ томилгоог зөвшөөрөхгүй буцаавал, Ч.Болдбаатартай тунаж ялагдсан хурандаа Д.Цэрэндоржийг тус газрын даргаар томилно. Гэхдээ ийм зүйл болохгүй бололтой. Учир нь, Ч.Болдбаатарыг хотын цагдаагийн газрын даргаар томилох нь тодорхой гэсэн яриа эртнээс гарч, сая ч баталгаажлаа. Ойрын өдрүүдэд зохион байгуулсан иргэдийн оролцоотой сонгон шалгаруулалт нэртэй “шоу драм”-аас энэ бүхэн харагдана.

Ч.Болдбаатартай өрсөлдөх хүн цагдаад алга уу

Нийслэлийн цагдаагийн газрын даргыг өмнө нь Хууль зүйн сайд, эсвэл Цагдаагийн ерөнхий газрын даргын тушаалаар томилдог байсан. Манай улсын хүн амын талаас илүү нь амьдардаг Улаанбаатарын цагдаагийн байгууллагыг толгойлно гэдэг асар их үүрэг хүлээсэн ажил. Бас их эрх мэдэл. Ийм учраас улстөрч, бизнес эрхлэгчдийн ашиг сонирхлоос энэ албан тушаал хол яваагүй. Өөрийн хүнээ томилуулах, зүтгүүлэх гэсэн явуулга, санаархал багширдаг байсныг бид мэднэ. Цагдаагийн албаны тухай хуулийг шинэчлэн баталснаар энэхүү томилгоог хотын мээр, цагдаагийн төв байгууллагын даргатай зөвшилцөж хийхээр болсон.

Өөрөөр хэлбэл, нийслэлийн Засаг даргын эрх мэдэл, хариуцлага цагдаагийн байгууллагад нөлөөлөх хэмжээний болж ирсэн. Нөгөө өнцгөөс харвал, НИТХ-аас томилогддог улстөрчийн санал цагдаагийн байгууллагад хүчтэй нөлөөлөх болж байна. Нийслэлийн одоогийн Засаг дарга Э.Бат-Үүл өөрөө мэдээд цагдаагийн даргад санал оруулахаа больж иргэдээрээ хэлэлцүүлж, тэдний саналыг авсан нь сайшаалтай. Гэвч Улаанбаатар хотын Цагдаагийн газрын даргын сонгон шалгаруулалтыг ингэж зохион байгуулсан болж харагдах нь Э.Бат-Үүлийн нэр хүндээ өсгөх л алхам байж.

Учир нь, энэ удаагийн сонгон шалгаруулалтад Улаанбаатар хотын Цагдаагийн газрын даргын үүргийг түр орлон гүйцэтгэгч, хурандаа Ч.Болдбаатарыг ялах магадлалтай хүн даанч оролцоогүй. Уг нь бол цагдаагийн байгууллага 8000 гаруй албан хаагчтай. Тэд оролцоогүй юу, эсвэл оролцох боломжийг нь хаасан уу гэдгийг мэдэхгүй. Ямартай ч анх зургаан хүн л нэрээ дэвшүүлжээ. Тэднээс Нийтийн хэв журам хамгаалах газрын Урьдчилан сэргийлэх, соён гэгээрүүлэх хэлтсийн дарга, хурандаа К.Женисгул нарын хоёрын хүнийг ажлын байрны шалгуур хангахгүй учраас хасч, дөрвийг нь үлдээсэн.

Тодруулбал, ЦЕГ-ын Гадаад харилцааны хэлтсийн дарга, хурандаа Ж.Эрдэнэболд, /Цагдаагийн хурандаа Ц.Жамъянсэнгээгийн хүү/ ЦЕГ-ын Сургалт дадлагын төвийн дарга, хурандаа С.Отгонбаатар, Хан-Уул дүүргийн Цагдаагийн хэлтсийн тасгийн дарга асан, хурандаа Д.Цэрэндорж,  хурандаа Ч.Болдбаатар нар үлдсэн. Гэтэл С.Отгонбаатар, Ж.Эрдэнэболд хоёр мэргэжлийн төвшин тогтоох шалгалтад тэнцээгүй. Ингээд хурандаа Д.Цэрэндорж, Ч.Болдбаатар нар тунаж үлджээ.

Сонгон шалгаруулалтын танигдсан арга

Улаанбаатар хотын Цагдаагийн даргад өрсөлдөх хоёр хүн тодорсны дараа хэвлэлээр хар пиар явж эхэлсэн. Захиалгат байсан уу, эсвэл тухайн хэвлэл мэдээллийн байгууллагын сайн дурын дэмжлэг байсан уу мэдэхгүй. Ямартай ч хурандаа Д.Цэрэндоржийг цагдаа нартаа ч танигдаагүй, тэтгэвэрт гарсан хурандаа болгож харагдуулах мессежийг нийтэд тараасан. Цагдаагийн байгууллагад 1980-2004 оныг хүртэл тасралтгүй ажилласан, төв, орон нутаг, анхан шатны нэгжийг толгойлж байсан туршлагатай Д.Цэрэндорж хурандаа иргэдийн дунд явуулсан санал асуулгад 60.71 оноо авчээ.  Харин хурандаа Ч.Болдбаатар 81.82 оноо авч, хотын цагдаагийн байгууллагыг удирдах нь бараг тодорхой болоод байна. Эндээс нэгэн эргэлзээ төрнө.

Цэргийн тэтгэвэр тогтоолгох хугацаа нь дөхөж яваа Д.Цэрэндорж хурандааг анхнаас нь сонгон шалгаруулалтад оролцуулах шалтгаан байсан уу. Эсвэл Ч.Болдбаатарыг дарга болгохын тулд Д.Цэрэндоржийг оруулж ирэв үү гэсэн асуулт гарч ирнэ. Энэ бүхэн өнөөгийн төрийн байгууллагын удирдах албан тушаалын сонгон шалгаруулалтад нүүрлээд буй дутагдлыг сануулна. Нэг яам, агентлагийн газар, хэлтсийн даргыг шууд томилдог. Араас нь өнөөх томилсон хүндээ тохируулсан сонгон шалгаруулалт явуулж, өрсөлдсөн хүмүүсийг нь хасдаг. Эсвэл даргын сонгон шалгаруулалтад бүртгүүлсэн хүмүүс нь нэрээ татдаг, нэг бол зориуд тэнцэхгүй хүмүүс өрсөлддөг. Ийм байдал энэ засгийн үед давтагдаж байгаа. Ч.Болдбаатар хурандааг томилуулах ажиллагаа үүний л нэг гэж зарим хүн үзэж байгаа юм.

Хурандаа Ч.Болдбаатар гэж хэн бэ

Дээрх зүйлийг бичсэнээр хурандаа Ч.Болдбаатарыг харлуулах гэсэнгүй. Гагцхүү энэ удаагийн сонгон шалгаруулалтад түүнийг давж гарах өрсөлдөгч байсангүй. Иймээс ч цагдаагийнхан “Болдоо даргыг жинхлэх нь тодорхой юм байна” гэж анхнаасаа хэлж байсан биз ээ. Ч.Болдбаатар хурандаад хотын цагдааг удирдах хэмжээний ажлын туршлага, боловсрол, зангараг, сэтгэл бий гэдгийг цагдаагийнхан хэлж байгаа. ТэрээрТөв аймгийн Зуун мод суманд 1972 оны хоёрдугаар сарын 21-нд төрсөн. 42 настай юм байна. Цагдаагийн дээд сургуулийг 1993 онд дүүргэжээ.

Баянгол дүүргийнцагдаагийнхэлтэст 1993 оноос 1996 он хүртэлмөрдөн байцаагчааражиллажээ. 1996-2000 онд хүртэл Эрүүгийн цагдаагийн газарт эрүүгийн төлөөлөгч, 2000-2001 хүртэлахлах төлөөлөгчөөр ажилласан байна. 2001-2002 хүртэл Дундговь аймгийн цагдаагийн хэлтэст эрүүгийн ажил эрхэлсэн дэд дарга, 2002-2003 оны хооронд тус хэлтсийн Эрүүгийн тасгийн дарга, 2003-2006 онд Эрүүгийн цагдаагийн газрын тасгийн даргын алба хашиж байгаад 2006-2010 он хүртэл Дундговь аймгийн цагдаагийн хэлтсийн даргын албан тушаалд томилогджээ. 2010-2012 он хүртэлСонгинохайрхан дүүргийн цагдаагийн хэлтсийндаргын албыг хашиж байсан аж.

Дараа нь буюу хоёр жилийн дотор Эрүүгийн цагдаагийн газрын дэд, нэгдүгээр хэлтсийн дарга, Нийслэлийн цагдаагийн газрын дэд, хэв журмын хэлтсийн дарга, Нийслэлийн цагдаагийн газрын дэд бөгөөд Хэв журам хамгаалах газрын дарга гэх мэт албан тушаалд очиж байжээ. 2014 оны хоёрдугаар сарын 7-ны өдрөөс өнөөг хүртэл Нийслэлийн цагдаагийн дэд бөгөөд захиргааны удирдлагын газрын дарга, Нийслэлийн цагдаагийн газрындаргын албан үүргийг түр орлон гүйцэтгэгчээр ажиллаж байгаа аж. Удирдах алба хашиж байхдаа нэр нь сэвтээгүй цөөхөн хурандаа нарын нэг гэх юм билээ.

Хэн хэдэн оноо авсан бэ

Хурандаа Ч.Болдбаатарыг хотын цагдаагийн даргаар томилвол тус газрын дэд даргын албан тушаал эзгүй үлдэнэ. Нэгэнт Ч.Болдбаатартай тунаж үлдэн цагдаагийн байгууллагын нөөцөд бүртгэгдсэн учраас хурандаа Д:Цэрэндоржийг Улаанбаатар хотын Цагдаагийн газрын дэд даргаар томилвол ямар вэ. Ингээд сонгон шалгаруулалтын дүнг танилцуулъя.

Дамбийнямын Цэрэндорж

Ерөнхий шаардлагын үнэлгээ-19.03

Удирдах ур чадварын түвшингийн үнэлгээ-26

Ярилцлага -Мөрийн хөтөлбөрт өгсөн олон нийтийн үнэлгээ-8.98 /765 иргэн санал өгч, 708 маш сайн, 32 дунд,  28 муу гэсэн үнэлгээ өгчээ/

-Мөрийн хөтөлбөрийн танилцуулга-2.83

-Ярилцлагын үнэлгээ-3.87

Нийт оноо- 60.71

Чойжанцангийн Болдбаатар

Ерөнхий шаардлагын үнэлгээ-28.43

Удирдах ур чадварын түвшингийн үнэлгээ-32.5

Ярилцлага-Мөрийн хөтөлбөрт өгсөн олон нийтийн үнэлгээ-9.48  /1083 хүн санал өгч, 916 маш сайн, 149 дунд, 18 муу гэсэн үнэлгээ өгчээ/

-Мөрийн хөтөлбөрийн танилцуулга-4.6

-Ярилцлагын үнэлгээ-6.75

Нийт оноо- 81.82

 

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.