ИНЕГ-ын Тэргүүн дэд дарга С.Энх-Амгалан хүүгийнхээ сургалтын төлбөрт 59,000 ам.доллар гаргуулжээ

Twitter Print
2014 оны 10-р сар 14-нд 15:56 цагт
Мэдээний зураг,

Монгол Улсын Авилгын эсрэг хуулийн 7 дугаар зүйлийн 7.1.6, 33 дугаар зүйлийн 33.1.3, Нийтийн албан нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 11 дүгээр зүйлийн 11.1, 29 дүгээр зүйлийн 29.2.4-т заасныг үндэслэн ИНЕГ-ын Тэргүүн дэд дарга С.Энх-Амгаланг ажлаас нь халсан тушаалыг Зам, тээврийн сайд А.Гансүх өнөөдөр гаргасан байна.

С.Энх-Амгалан нь өөрийн хүү Э.Ганхүүд сургалтын төлбөр 59,000 ам.доллар гаргуулан авсан, мөн хүүгийнхээ ашиг сонирхолд нийцүүлэн Иргэний нисэхийн багц дүрэмд өөрчлөлт оруулахаар шинэчилсэн дүрмийн найруулгын төсөл боловсруулж, албан тушаалын эрх мэдлээ урвуулан ашигласан гэж үзэж, ийнхүү ажлаас халах шийдвэр гаргажээ.

2009 оны 12 дугаар сарын 24-нд  УБ-Бээжин чиглэлд ОМ-223 аяллын дугаартай нислэг үйлдсэн МИАТ ХК-ний Боинг-737-800 онгоцны 2 дугаар нисгэгч нь хуурамч нисгэгчийн үнэмлэхтэй байсан гэх Э.Ганхүү ноцтой алдаа гаргаж Бээжингийн олон улсын нисэх буудалд ослын буулт үйлдэж 182 зорчигчийн амиар тоглох шахсан маш ноцтой хэрэг үйлдсэн билээ. Энэхүү хуурамч нисгэгчийн үнэмлэхтэй Э.Ганхүү гэгч нь ИНЕГ-ын Тэргүүн дэд дарга С.Энх-Амгалангийн хүү байсан аж. 

Хэргийн эзэн С.Энх-Амгалан тарьсан балгаа балруулдах үүднээс хүү Э.Ганхүүгээ Канад улсад нисэхийн сургуульд нөхөн суралцуулж, 2013 онд төгсгөжээ. Гэтэл тэрээр хүү Э.Ганхүүг одоо суралцаж байгаа хэмээн 2014 оны 6-р сард өргөдөл бичиж өчнөөн зовлон чирэгдэл тоочин байж ИНЕГ-ын удирдлагуудыг залилан 59,000 ам доллар буюу 100 гаруй сая төгрөгийг ИНЕГ-аас нөхөн гаргуулжээ.

 

Үүгээр зогсолгүй хүүгээ нисгэгчийн мэргэжлээр цаашид ажиллуулах хүсэлтээ гаргасан байгаа бөгөөд уг нь ИНД-121.511 дүрмийн шаардлага нь олон зуун хүний суудалтай Боинг мэт том оврын агаарын хөлгийн нисгэгч болохын тулд эхлээд бага болон дунд оврын нисэх онгоцны нисгэгчээр агаарт 1500 цаг ниссэн байхыг шаарддаг нь С.Энх-Амгаланд таалагдаагүй, хүүд нь таарахгүй байснаас Иргэний нисэхийн багц дүрэмд өөрчлөлт оруулахаар төсөл боловсруулсан байна.

Зөвхөн 2014 оны эхний хагас жилийн байдлаар тэрээр нийт 7 удаа гадаад томилолтоор явсан С.Энх-Амгалангийн иймэрхүү үйлдлүүдийг нэн даруй таслан зогсоож арга хэмжээ авахгүй бол болохгүй цаг мөч иржээ гэж хэвлэл мэдээллийн байгууллагуудаар удаа дараа сануулсны эцэст салбарынх нь сайд ийнхүү өнөөдөр ажлаас нь халах шийдвэр гаргалаа.

 

Сэтгүүлч Ц.Мөнхбаяр

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.