19 настай Олимпийн аварга
Хойд Солонгосын тамирчид хүндийг өргөлтөөр дэлхийд хүчтэй өрсөлддөг. Өнгөрсөн онд БНСУ-ын Инчон хотод болсон Азийн спортын наадмын хүндийг өргөлтийн төрөлд Хятадын эрэгтэйчүүд үнэмлэхүй амжилт гаргаж 4 алтан медаль хүртсэн. Харин хамгийн хөнгөн жин болох 56 кг-д БНАСАУ-ын Ом Юнь-Чол алтан медалийн болж, 2012 оноос хойш оролцсон бүх том тэмцээндээ түрүүлсэн байна. 1991 оны арваннэгдүгээр сарын 18-нд Хамгён хотод төрсөн Юнь-Чол багаасаа спортод авьяастай хүүхэд байв. Тэрээр хүндийг өргөлтөөс гадна дугуйн спортод сонирхолтой бөгөөд чөлөөт цагаараа дугуй унах дуртай аж.
Английн Лондон хотод 2012 оны зуны Олимпийн наадам болоход Юнь-Чол 19 настай байлаа. Тухайн үед 56 кг-д өрсөлдсөн ирээдүйн аварга маань огцом өргөлтөөр 120 кг-ийг эхний захиалгаар өгчээ. Үүний дараа таван кг-аар ахиулж захиалгаа өгсөн ч өргөж чадалгүй дөрөвдүгээр байр эзэлсэн. Харин түлхэлттэй өргөлтөөр 168 кг-ыг өргөж, нийлбэр дүнгээр 293 кг-ыг өргөж Олимпийн алтан медалийн болзол хангажээ. Мөнгөн медаль хүртсэн тамирчнаас дөрвөн кг-аар илүү байсан нь ямар их хүч гарсныг илтгэж байна. 20 нас ч хүрээгүй байхдаа Олимпийн аварга болсон тэрээр 2013 оны дэлхийн аваргад огцомоор 127 кг, түлхэлттэй өргөлтөөр 162 кг-ыг өргөж байв. Мөн өнгөрсөн онд Казахстаны Астана хотод болсон тивийн аваргын үеэр түлхэлттэй өргөлтөөр 169 кг-ыг өргөж дэлхийн дээд амжилтыг тогтоож, алтан медаль хүртсэн.
Э.Гүнтөмөр
Энэ мэдээ танд таалагдаж байвал LIKE хийгээрэй. Танд баярлалаа.
