У.Хүрэлсүхийн Засгийн газар өөрийн хүсэлтээр бүрэн бүрэлдэхүүнээрээ ОГЦОРЛОО

Twitter Print
2021 оны 01-р сар 21-нд 19:30 цагт
Мэдээний зураг,

Монгол Улсын Засгийн газар бүрэн бүрэлдэхүүнээрээ огцорлоо. Тодруулбал Ерөнхий сайд У.Хүрэлсүх Засгийн газрын тэргүүний ажлаасаа огцрох хүсэлтээ өгсөн. УИХ-ын чуулганы хуралдаанаар тус асуудлыг хэлэлцэж, чуулганы хуралдаанд оролцсон 63 гишүүний 60 нь буюу 95.2 хувь нь дэмжсэнээр 31 дэх Ерөнхий сайд У.Хүрэлсүхийн Засгийн газар бүрэн бүрэлдэхүүнээрээ огцорлоо.

1992 оны шинэ Үндсэн хуулиас хойш анх удаа өөрийн хүсэлтээр огцрох хүсэлтээ өгсөн Ерөнхий сайд боллоо. Хамгийн тогтвортой ажиллах байсан, Үндсэн хуулийн хамгаалалттай Засгийн газар ийнхүү хамгийн хурдан буюу зургаан сарын дараа огцорлоо.

Үйл явдлыг эхнээс нь хураангуйлбал Засгийн газар өнөө өглөө ээлжит бусаар хуралдаж, Засгийн газар бүрэн бүрэлдэхүүнээрээ огцрох асуудлыг хэлэлцсэн юм. Түүний дараа Төрийн ордонд МАН-ын Удирдах зөвлөл дээрх асуудлаар хуралдсан. Удирдах зөвлөлийн хурлаар Ерөнхий сайд У.Хүрэлсүх танхимаараа огцрох санал гаргаснаа танилцуулж, удирдах зөвлөл дэмжсэнээр тус асуудлыг УИХ дахь МАН-ын бүлгийн хурал руу шилжүүлсэн юм. УИХ-ын олонх буюу 62 суудлыг бүрдүүлдэг МАН-ын бүлэг мөн адил Засгийн газрыг огцруулах асуудалтай танилцжээ. 

Үүний дараа УИХ-ын Төрийн байгуулалтын байнгын хороо хуралдаж, Ерөнхий сайдыг огцруулах асуудлаар санал хураалт явуулахад Байнгын хорооны хуралдаанд оролцсон 17 гишүүний 13 нь дэмжсэн юм. Үргэлжлүүлээд өнөөдөр 17.00 цагт УИХ-ын чуулганы нэгдсэн хуралдаанаар Засгийн газрыг огцруулах асуудлыг оруулж ирсэн нь энэ юм. 

2020 оны УИХ-ын сонгуулийн дараа Ерөнхий сайд У.Хүрэлсүх Засгийн газрын тэргүүнээр улиран сонгогдож, долоодугаар сарын 6-нд шинэ Засгийн газраа байгуулсан. У.Хүрэлсүхийн Засгийн газар нь Ерөнхий сайд, Шадар сайд, Засгийн газрын Хэрэг эрхлэх газрын дарга болон асуудал эрхэлсэн нийт 17 гишүүнтэйгээр ажиллаж байсан юм. 

  • Шадар сайдаар Я.Содбаатар

  • Засгийн газрын Хэрэг эрхлэх газрын дарга Л.Оюун-Эрдэнэ

  • Байгаль орчин, аялал жуулчлалын сайдаар Д.Сарангэрэл

  • Батлан хамгаалахын сайдаар Г.Сайханбаяр

  • Гадаад харилцааны сайдаар Н.Энхтайван

  • Сангийн сайдаар Ч.Хүрэлбаатар

  • Хууль зүй, дотоод хэргийн сайдаар Х.Нямбаатар

  • Хөдөлмөр, нийгмийн хамгааллын сайдаар А.Ариунзаяа

  • Барилга, хот байгуулалтын сайдаар Б.Мөнхбаатар

  • Боловсрол, шинжлэх ухааны сайдаар Л.Цэдэвсүрэн

  • Зам, тээврийн хөгжлийн сайдаар Л.Халтар

  • Уул уурхай, хүнд үйлдвэрийн сайдаар Г.Ёндон

  • Хүнс, хөдөө аж ахуй, хөнгөн үйлдвэрийн сайдаар  З.Мэндсайхан

  • Эрчим хүчний сайдаар Н.Тавинбэх

  • Эрүүл мэндийн сайдаар Т.Мөнхсайхан

  • Соёлын сайдаар С.Чулуун  

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.