Монголд хүйтэн байна, гараад ир, лалрууд аа

Twitter Print
2022 оны 12-р сар 10-нд 13:38 цагт
Мэдээний зураг,

МОНГОЛД ХҮЙТЭН БАЙНА ГАРААД ИЛ ЛАЛРУУД АА !

Аалзны тор шир хэрсэн сүлжээ, аймхай чичирсэн улс төрчид бүтэн 6 хоног -30 градусын хүйтэнд залуусыг гудманд хүлээлгэн бөмбөг хөөлгөв. Бээрсэн жагсаал яах вэ? Бээрсэн амьдрал гэж мэдэх үү?

Гурван цаг гадаа тэсэж зогсох биш гурван сар тэсэж давах өвөл зарим хүмүүст, ялангуяа хүүхдүүдэд дэндүү хүнд, дэндүү хахир. Дүн өвлийн хүйтэнд олон хоног нүүрсний бараа хараагүй, хулгайлаад ч болов жаахныг түлж дулаацахсан гэж бүлтийх хүүхдүүд хир дагтай хөнжлийнхөө мухарт шургаад, турьхан тураалтай биеэрээ хоорондоо наалдаад наалдаад дулаан илч ирдэггүй, хүн нь хүнээ хайрдаг тийм хүйтэн амьдралыг тэр тойргоос нь сонгогдсон хулгайч улс төрчид нь мэдэх үү?

Энэ зөвхөн нүүрсний хулгай гэж үү? Энэ бүхэл бүтэн нэг улсын иргэдийн боломжийг олон сар жил хулгайлсан яргалал юм. Бид нар зүгээр л зэвүү хүрээд байгаа юм! Ковидоос эхлээд бүх онцгой эрхийг авч хязгааргүй дарангуйлал тогтоочихоод, засгийг 8 жил дангаараа барьчихаад одоо хүүхдийн тоглоом шиг нэгэндээ бухаж, одоо тэрэндээ дас гэж тулгаж байгаа та нартай алалцмаар санагдаад байгаа юм. Энэ зөвхөн нүүрсний асуудал ч биш. Тэр нэрсийг зарлаад бүх зүйл өргөс авсан мэт болохгүйг мэдэхийн дээдээр мэдэж байгаа, нээх хүлээлт ч алга!

Ковидоор аав ээжтэйгээ ч уулзаж чадаагүй хүмүүсийн нулимс хатаагүй байхад, 8 саяар эмчилсэн багц чинь 80 мянган төгрөг болсон луйвар чинь сарниагүй байхад, та нар дахиад 40 их наядын гэх нүүрсний хулгайг өөрсдөө гаргаж ирлээ. Ядаж нүглээс айхаа больсон, үйлийн үр луугаа нулимсан хүмүүстэй одоо ер нь яаж ч харьцсан яадаг юм? Та нарын төр засаг гэж юу байдаг юм бэ? Утгаараа бүх дэлхийн шившиг болж байна шүү дээ.

Ер нь чин үнэнийг хэлэхэд одоо та нар юу ч хийсэн бидэнд таалагдахгүй байх. Шаар хагарахаас нь өмнө урьдчилж цоолсон жагсаал байгаасай гэж найдаж байж ч мэднэ зарим нь. Энэ одоо үгүй ч байж магадгүй. Нэмж доромжлоод л, гадаа хүйтэнд зогсоогоод л байх тусам тэр хорсол л нэмэгдэнэ гэхээс урдынх шиг 2 хоног шуураад өнгөрнө гэсэн зүйл одоо байхгүй ээ. Байхгүй гэдгийг 6 хоног талбай дээр нүдээрээ харлаа мэдэрлээ. Залуус өөр болж, зоригтой болж, тууштай болж. Энэ л энэ жагсаалын хамгийн том ЯЛАЛТ байлаа.

Түүнээс та нар бол зайл өө, та нар бол одоо хэн ч биш юу ч биш. Шударга сонгуулийн зарчимтай болсны дараа хугацаа нь наашилна уу хэвэндээ байна уу хамаагүй санал өгөх ЯГ ТЭР цаг мөчид бид дүнг чинь тавих болно. Бид даарсан цаг мөч өдөр болгоныхоо тоогоор, энэ бүх дээрэнгүй хандлага новшын үйлдлийг чинь хорхойтой араандаа зууж байгаад яг тэгэж дүнг чинь тавьж өгөх болно.

Толгой нь эргэсэн инфлүүнсэр дүү нар мэдлэг, мэдээлэл нь дутаад байвал бид манлайлж засаж учирлаж зөвд нөлөөлөх болно. Одоо бид улс төржинө! Одоо Монголын бүх залуус улс төрж! Улс төрөөс хол цэвэрхэн гэдэг биднийг зайлуулж байгаад зайдлах гэсэн тархи угаалтнаас одоо бүгд гарцгаагаад иргэн хүнийхээ үүргийг биелүүлж улс төржицгөө! Энэ сонгуулийн хууль, тогтолцоо гэж юу яриад байгаа юм бүгд судла ойлго. Очоод л хэдэн танихгүй хүмүүс, сонголтгүй сонголтноос нэгийг нь дугуйлдагаа боль одоо битгий тэгэж хайнга ханд. Бүгд өнгөрсөн мөрийн хөтөлбөрүүдийг нь, хараал идсэн долоосоэ амлалтуудыг нь гэрийн даалгавар бие даалт мэт унш танилц, амыг нь асуу. Их сургуулийн багш нар, улс төр судлал мэргэжлийнхэн одооноос эхлээд сонгогчын боловсрол соён гэгээрүүлэх ажил хийцгээ. Энэ бол тэмцэл шүү. Эд нар бидэнтэй хууль ярих гэж байгаа бол бид хуулиа мэддэг байя. Нийгэм бодит амьдрал гэж байгаа бол бид дэлгээд өгье, Монголын амьдрал ямар байгааг.

Одоо Монгол улс нэгэнт л ийм мундаг залуус, шинэ үетэй болсон юм бол ах эгч нар нь ч гэсэн ард нь хана больё, дэмжье, нэгдье! Талбай дээр цугласан болгон жагсаал биш шүү. Өдөр бүр жагсацгаая. Шударга бус үйлдэл бүр дээр үгээ үзэл бодлоо хэлж жагсая. Энэ удаа олж авсан тэмцлийн соёлоо хадгалж, энэ жагсаалаас нэг том үр дүнтэй үлдэцгээе! Тэр нь "Тэмцэж сурах, жагсах сурах" Одоо улс төр намд байгаа залуус ч гэсэн наад хогийн хайрцагнаасаа гарч сэтгээд ҮЗЭЛ САНАА, ШУДАРГА ЁС, ЗӨВ ИРЭЭДҮЙН урсгал руу нэгдэх хэрэгтэй.

Өнөөдөр арай илүү боломжин дээр туйлж байж болно, мөнх биш шүү, удахгүй энэ завь тэр чигээрээ хөмөрвөл чиний хулгайлж олсон долоож олсон хэд чинь ямар ч үнэ цэнэгүй болж Монголоос явах эгнээнд жагсаж суух вий. Одоо сэрэхгүй бол тэр цаг ойрхон байна шүү. Хичнээн түнэр харанхуйд ч гэрэл үү тэмүүлэх, гэнэн хүүхэд шиг түүнд итгэх, бадарч асах нь өөрөө залуу нас өөрчилөлтийн эхлэл билээ!

Ч.Ганжавхлан

2022.12.09

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.