АНУ-ын зэвсэгт хүчин болон тагнуулын маш нууц зэрэглэлтэй баримтууд цахим орчинд тархаж, Америкийн эрх баригчид уг баримтуудыг ил болгосон эх сурвалжийг тогтоохоор ажиллаж байна.
Украины дайнаас гадна Израиль, Хятад, Ойрх Дорнод, Африкийн улс орнуудын асуудлыг хөндсөн уг баримтуудыг Америкийн талаас ил болгосон байх магадлалтай хэмээн барууны болон америкийн мэргэжилтнүүд үзэж байгаа аж.
Цахим орчинд тархсан олон зуун хуудас баримтууд дотор жишээ нь Америкийн Тагнуулын албаны 3-р сарын 1-ний он сартай баримтанд Израилийн Ерөнхий сайд Беньямин Нетаньяхугийн эсрэг жагсаал цуглааныг Израилийн үндэсний тагнуулын алба болох Моссадаас дэмжиж буй талаар бичсэн байна.
Өөр нэг баримтанд Вашингтон Сөүлээс Украинд зэр зэвсэг нийлүүлэхэд туслахыг шаардаж байгаа нь БНСУ-ын хувьд томоохон дарамт болоод байгаа тухай Өмнөд Солонгосын эрх баригчид хоорондоо ярилцсан тухай бичсэн байна.
.jpeg)
Украины дайны тухайд 3-р сарын эхний хэдэн өдрүүдийн байдлаар байлдаж буй талуудын зэвсэгт хүчний аль алиных нь нөхцөл байдал хүнд байсан, тулаанд талууд харьцангуй бага хүч ашигласан тухай өгүүлжээ. Мөн ОХУ, Украин аль аль нь дайчилгааны бэлтгэл нөөцийн бүрэлдэхүүн бүрдүүлж байгааг онцолсон байна. Тэр дундаа Украины дайчилгааны бэлтгэл нөөцийн 9 отрядын бэлтгэл, зэр зэвсгийн хангамжийг барууны орнууд, үлдсэн гурван отрядыг Киев хариуцаж бэлдэх тухай бичсэн байна.
Дээрх баримтуудад бичсэнээр Украины зэвсэгт хүчний хамгийн том асуудал нь пуужин устгах систем, агаарын хамгаалалт аж. Украины армийн пуужин устгах системийн 90 орчим хувийг хуучин зөвлөлтийн С-300, "Бук", үлдсэнийг нь барууны орнуудаас илгээсэн пуужин устгах систем бүрдүүлж байгаа ч аль алиных нь пуужингийн нөөц ирэх 4-р сар гэхэд дуусах төлөвтэй байгаа нь Оросын арми удахгүй Украины агаарын бүсэд ноёрхлоо тогтоох боломжийг олгоно гэжээ. Ингэснээр Украины сөрөг довтолгоо бүтэлгүйтэх эрсдэлтэй аж.
Эх сурвалж: Reuters
Содномцэрэнгийн Энхзаяа
mongolcom.mn
