"Эко" сурагч С.Буянхишиг олон хамтрагчтай болжээ

Twitter Print
2014 оны 10-р сар 10-нд 14:42 цагт
Мэдээний зураг,

Ангийнхандаа “Эко сурагч” хэмээн дуудуулдаг Чингэлтэй дүүргийн “Салхит” гэх газар “Сэлбэ” голын ойролцоо амьдардаг, 117-р сургуулийн 7Б ангид сурагч, эгэл нэгэн айлын хүү С.Буянхишиг Сэлбэ голын хогийг гурван жил цэвэрлэж байгаа талаар манай сайт мэдээлсэн билээ. Харин С.Буянхишиг хүүг байгаль орчныг эрүүл цэвэр байлгахад багаасаа хувь нэмэр оруулж байгаад баярлалаа хэмээн БОНХЯ-ны ах эгч нараас нь бяцхан ном, бэлэг дурсгалын зүйл дурсгахаар болсныг өнөөдөр С.Оюун сайд гардуулан өглөө.

Тэрбээр “Хүүхдүүд өөрсдөө байгалаа хайрладаг болчихвол эцэг эхчүүд нь ч гэсэн цаашид хайрладаг болно. Хүүхдүүд нь цэвэрлээд байхад эцэг эхчүүд, том хүмүүс хог хаяхгүй байх гэж найдаж байна. Харамсалтай нь сүүлийн 20 жилийн хугацаанд манай улс маш их хог хаягдалтай болчихлоо. С.Буянхишиг хүүгийн жишээг хараад хамтраад хогоо цэвэрлэх, нөгөө талдаа ядаж хогоо хаяхгүй байх нь хамгийн чухал байна. Та бүхний хаясан хогийг энэ хүү олон жил цэвэрлээд явж байна. Тэгэхээр монголчуудаа хамтдаа хог хаяхгүй байх тал дээр анхааръя гэж хэлэх гэсэн юм. Буянхишиг хүүдээ их баярлалаа. Өнгөрсөн долоо хоногт Хог хаягдалтай тэмцэх үндэсний хөтөлбөрийг Засгийн газрын хуралдаанаар баталсан. Яамны зүгээс хогны асуудалтай тэмцсээр байна” хэмээлээ.

Улмаар “Монгол контент” компанид яамны зүгээс багахан хөрөнгө оруулалт хийж бүтээсэн, ногоон хөгжлийг дэмжсэн Ногун гэдэг байгаль хамгаалагч баатрын тухай комикс ном, Улаан ном, зургийн аппаратыг С.Буянхишиг хүүд бэлэглэсэн юм. Энэ үеэр Буянхишиг “Цаашид ч Сэлбэ голыг цэвэрлэх энэ ажлаа тасралтгүй хийсээр байх болно. Манай найзууд ч надтай нэгдэж хог цэвэрлэдэг болсон. Хүүхдүүд болон томчууд та бүхэн байгаль орчно хайрлаж байгаарай” гэснийг та бүхэнд дуулгая.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.