Охин үрдээ хийж болох хамгийн аймшигтай зүйл

Twitter Print
2020 оны 10-р сар 16-нд 16:42 цагт
Мэдээний зураг,

Охин үрээ “сайн охин” болгож төлөвшүүлэх нь аав ээжийн зүгээс хийж болох хамгийн аймшигтай зүйл. Энд би боловсон, ухаалаг эсвэл хариуцлагатай болгож хүмүүжүүлэх тухай яриагүй. Арай өөр утгаар ярьж байна.

"Хорошесть" буюу “сайн байх” гэдэг нь бусад хүмүүс өөрийг нь юу гэх бол гэдэгт ач холбогдол өгөх, бусдыг (адгийн амьтан байсан ч хамаагүй) гомдоохоос айхыг хэлнэ. Сайн (номхон дуулгавартай гэж ойлгож болно) байх гэдэг маш олон хүний хувьд насаараа үүрч явах хүндхэн ачаа адил.

Сайн охид том хүмүүст (цэцэрлэгийн багш, ээж аав, бага ангийн багш г.м.) их таалагддаг. Сайн охинд “хоолоо дуустал нь ид” гэж хэлэхэд л томчуудыг уурыг хүргэхгүйн тулд өнөөхийг нь огиулан байж арайхийн барна. Хожим, насанд хүрсэн хойно тэд яаж яваад их иддэг болчихсоноо ойлгож ядна. Бие организмаа сонсож сураагүй юм чинь аргагүй шүү дээ. Тэд чинь бага байхын л цадсан үгүйгээ асрагч багшаасаа мэддэг байсан юм хойно... Сайн охин томчуудын өөдөөс дугардаггүй, тэдэнтэй бүдүүлэг харьцдаггүй. Тэд томчууын өөдөөс инээмсэглэн толгой дохин чимээгүй сонсоод байж байдаг. Хожим 14-15 хүрсэн хойно нь, нэг гаж нөхөр автобусанд хүн ихтэйг далимдуулан биед хүрэхэд охин юу ч хэлэхгүй. Том хүний өөдөөс юм хэлж сураагүй болохоор тэр. Тэрээр дотроо үнхэлцэгээ хагартал айж байсан ч дуугуй л өнгөрнө... “Наад гараа тат! Холд!” гээд ширүүхэн хэлчих ёстой газар цаашид ч дуугуй тэвчсээр л байна.

Сайн охин дан онц сайн сурдаг. Хааяа нэг сайн дүн авах нь түүний хувьд жинхэнэ трагеди. Сургуульд байх хугацаандаа тэрээр багш, сурган хүмүүжүүлэгчдийн өөрт нь өгөх үнэлгээнд ихээхэн ач холбогдол өгөөд сурчихсан байдаг тул том болсон хойноо ч “Хүмүүс намайг юу гэдэг бол? Яаж үнэлэх бол?” хэмээн цаг ямагт эмзэглэнэ. Тэрээр амьдралаас дан онц дүн л хүснэ. Харамсалтай нь томчуудын ертөнц сайшаал магтаалдаа тун ч харам. Түүнээс болж охин сэтгэлээр унаж тайвшруулдаг эм (илүү хатуу юм л биш бол шүү дээ) тогтмол уудаг болно.

Сайн охид яг л биед эвтэйхэн хувцас шиг амар байхыг хичээдэг. Тэд эргэн тойрныхоо хүмүүст төвөг учруулах нь үгүй. Харин ч эсрэгээрээ... тэдэнд анхаарал тавьж, ая тавыг нь хангахын тулд бүхнээ зориулж өөрийгөө гаргуунд нь хаядаг. Цаадуул нь тэгж байгааг нь үнэлэх нь бүү хэл, хэт сул доройн шинж хэмээн үзэх нь тоогүй. “Бусдын төлөө өөрийгөө золих нь буян” гэх үзлээр хүмүүжсэн хичнээн олон охид хойрог, ажилгүй, арчаагүй эртэй гэр бүл болдог гэж санана... Цаадуул нь ч эхнэрүүдийнхээ хүзүүн дээр суучихаад ажиг ч үгүй явахыг нь яана?

Сайн хүүхэдтэй байх нь томчуудад амар байх нь мэдээж. Тийм хүүхдүүд яг л цонхны тавцан дээрх ургамал шиг нүд баясгаад л... Гагцхүү амьдралд “дуулгавартай, сайн байх нь” тухайн хүүхдэд өөрт нь муу. “Номхон зан чанараасаа салах гэж хүмүүс дараа нь багагүй зовдог. Тиймээс үр хүүхдүүд чинь бусдад амар бус... харин зоримог, өөрийнхөө төлөө баттай зогсож чаддаг, хүсэл ба хэрэгцээгээ сайн мэддэг, хувийн орон зайгаа хамгаалж чаддаг болог. Тэд өөрөө өөрсдийгөө үнэлж, шаардлагатай үед бусдад хариуг нь өгч сураг. Үр хүүхдүүд чинь, тэр дундаа охин үрс чинь сэргэлэн цовоо, аз жаргалтай байг...

Морена М.

Эх сурвалж: F4B сайт

Орчуулсан: Өлзийбатын Уянга

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.