Европ даяар үнийн өсөлтийг эсэргүүцсэн жагсаал цуглаан өрнөсөөр байна

Twitter Print
2022 оны 10-р сар 19-нд 10:45 цагт
Мэдээний зураг,

Эрчим хүчний үнэ өсөж, амьдралын өртөг нэмэгдсэнтэй холбоотойгоор Европ даяар иргэд эсэргүүцлийн жагсаал хөдөлгөөн өрнүүлсээр байна.

Өнгөрсөн мягмар гарагт Францын үйлдвэрчний эвлэлийн хэд хэдэн хороо улс даяар ажил хаялт зарласантай холбоотойгоор орон нутгийн галт тэрэгний хөдөлгөөн хэсэгчлэн зогссон байна.

Ажил хаялтын улмаас зарим сургуулийн үйл ажиллагаа мөн доголдсон байна. Өнгөрсөн ням гарагт Парис хотод үнийн өсөлтийг эсэргүүцэж мянга мянган хүн жагссан билээ.

Их Британид GXO компанийн жолооч нар цалингийн маргаантай холбоотойгоор энэ сарын сүүлээр 5 өдөр ажил хаялт зарлана, үүнтэй холбоотойгоор шар айрагны тээвэрлэлт саатах болно гэдгийг Юнайт үйлдвэрчний эвлэлээс мэдэгдсэн байна.

Их Британийн хамгийн том чингэлэгийн боомтуудын нэг Ливерпулийн хэдэн зуун ажилчид цалин хөлстэй холбоотой асуудлаас болж энэ сарын 24-нөөс 2 долоо хоног ажил хаялт зарлахаа мэдэгдсэн байна.

Шуудангийн 115 000 ажилчдыг төлөөлдөг Харилцаа холбооны ажилчдын үйлдвэрчний эвлэл өнгөрсөн сард болон энэ сарын эхээр ажил хаялт зарласан ба цалин болон үйл ажиллагааны өөрчлөлтийн асуудал нааштай шийдэгдэхгүй бол дахин ажил хаялт зарлахаа мэдэгджээ.

300 мянга гаруй гишүүнтэй Их Британийн сувилагчдын үйлдвэрчний холбоо цалин нэмэхийг шаардан, ажил хаялт зарлах эсэх дээр санал хурааж эхэлсэн бол төмөр замчид мөн цалин, ажлын байрны аюулгүй байдлын асуудлаар ажил хаялт зарлахаар төлөвлөжээ. Люфтханза агаарын тээврийн компанийн нисгэгчид өнгөрсөн даваа гарагаас эхлэн 3 өдрийн ажил хаялт зарласнаас болж хэдэн арван мянган иргэдийн нислэгүүд цуцлагджээ.

Цалин нэмэхийг шаардсан жагсаалд оролцсон багш нарыг ажлаас нь халсантай холбоотойгоор Унгарт энэ сарын 14-нд мянга мянган оюутан сурагчид эцэг эхчүүдийнхээ хамтаар багш нарын шаардлагыг дэмжиж буйгаа илэрхийлэн жагссан байна.

Өнгөрсөн сард Чехийн нийслэл Прага хотод хэдэн арван мянган иргэд Чехийн засгийн газар эрчим хүчний үнийн өсөлтийн эсрэг үр дүнтэй арга хэмжээ авч чадахгүй байна хэмээн жагссан бол Бельгийн нийслэл Брюссельд эрчим хүчний үнийн өсөлт, амьдралын өртөг нэмэгдэж буйг эсэргүүцэн хэдэн мянган иргэд жагссан билээ.

Эх сурвалж: Reuters

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.