Эрчим хүчний хямралд автсан Хятадын эдийн засгийн өсөлтийг буурууллаа

Twitter Print
2021 оны 09-р сар 29-нд 11:24 цагт
Мэдээний зураг,

Голдман Сакс групп эрчим хүчний хямралд ороод буй Хятад улсын эдийн засгийн өсөлтийн урьдчилсан таамагаа бууруулжээ.

Голдман Сакс групп өмнө нь БНХАУ-ын эдийн засаг энэ онд 8.2 хувиар өснө гэж таамаглаж байсан бол үүссэн нөхцөл байдалтай холбогдуулан дээрх тоог 7.8 хувь болтол бууруулжээ.

Тус группээс мэдээлснээр Хятадын аж үйлдвэрийн салбар цахилгааны хязгаарлалтанд орж байгаа нь тус улсын эдийн засагт нь сөргөөр нөлөөлөх аж. Судалгаагаар Хятадын аж үйлдвэрүүдийн 44 хувь нь цахилгааны хязгаарлалтанд оржээ. Нүүрсний үнэ нэмэгдэж, нийлүүлэлт нь тасалдсанаас болж Хятадын зарим мужуудад үйлдвэрүүд болон айл өрхүүд тог цахилгаангүй болоод байгаа юм. Үүнээс болж аж үйлдвэрүүд богиносгосон цагаар ажиллаж эсвэл бүр үйл ажиллагаагаа зогсооход хүрчээ.

BBC сувгаар мэдээлснээр Хятадын хойд зүгийн Тяньжин боомт мөн л цахилгааны хязгаарлалтанд өртжээ. Үүний улмаас ачааны хөлөг онгоцноос карго ачааг эрэг дээр буулгадаг өргөгч кранууд нь хязгаартай цагаар ажиллаж байгаа аж. Тяньжин боомт дээр үүссэн нөхцөл байдал энэ долоо хоногийн сүүл хүртэл үргэлжлэх төлөвтэй байна.

Японы санхүүгийн Номура групп, Уолл Стритийн хөрөнгө оруулалтын Морган Стэнли банк, Хятадын Интернэйшнл Капитал Корпорэйшн зэрэг байгууллагууд мөн адил эрчим хүчний хямралын улмаас Хятадын эдийн засгийн өсөлт буурах магадлалтай байгааг анхааруулжээ.

Хятадын үл хөдлөх хөрөнгө, технологи зэрэг эдийн засгийн томоохон салбаруудад хатуу хууль журам мөрдөгдөж эхэлсэн нь мөн л тус улсын эдийн засгийн өсөлтөнд сөргөөр нөлөөлж эхэлсэн билээ.

Эх сурвалж: BBC

Содномцэрэнгийн Энхзаяа 

mongolcom.mn

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.