Берлин хотод байрлах Радиссон Блю зочид буудлын үүдний танхимд байдаг дэлхийн хамгийн том босоо цилиндр аквариум хагарч, дотор нь байсан загаснууд 1 сая орчим литр усны хамтаар зочид буудлын үүдний өрөө, гадаа гудамж руу асгарчээ.
15.85 м өндөртэй АкваДом нэртэй уг цилиндр аквариум хагарах үед дотор нь 100 гаруй нэр төрлийн 1500 загас байсан байна. Аквариум хагарах үед 2 хүн шилний хэлтэрхийнд оногдож, шархджээ.
Берлин хотын онцгой байдлын албаны хэвлэлийн төлөөлөгч гадаа цаг агаар хүйтэн байснаас болж загаснуудыг аврах хүндрэлтэй байсныг онцолж, зочид буудлын үүдний өрөө, гадаа гудамж руу урссан загаснуудын дийлэнх нь үхсэн гэжээ.
Амьд гарсан загаснуудыг өөр аквариумуудад байршуулсан байна. Түүнчлэн зочид буудалд байрлаж байсан 350 хүнийг нүүлгэн шилжүүлжээ.
Берлин хотын дарга Франциска Гиффигийн мэдээлснээр аквариум үүрийн 5 цаг 45 минутанд хагарчээ.
Өглөө эрт байсан учраас зочид буудлын үүдний танхим, гадаа гудамжинд хүнгүй байсан нь ноцтой гарз хохирол гарахаас сэргийлж чадсан байна.
Онцгой байдлын албанаас мэдээлснээр аквариум хагарах болсон шалтгаан одоогоор тодорхойгүй байгаа аж.
Эх сурвалж: BBC
Содномцэрэнгийн Энхзаяа
mongolcom.mn
