Кубын баруун эргээр дайран өнгөрсөн Иан хар салхи орон нутгийн цагаар лхагва гарагийн өдрийн 15 цагт АНУ-ын Флорида мужийн эрэгт хүрчээ.
Иан хар салхи АНУ-д сүүлийн жилүүдэд бүртгэгдсэн хамгийн хүчтэй хар салхинд тооцогдож байна.
Америкийн Хар салхи судлалын төвөөс мэдээлснээр Иан хар салхины хурд 241 км/ц хүрсэн ба энэ нь Саффир-Симпсоны шатлалаар 4-р түвшний хүчтэйд тооцогдох аж.
Флорида мужийн захирагч Рон ДеСантис Иан хар салхины улмаас далайн эрэг орчим усанд автаж, зарим газраа үерийн усны түвшин 3.7 метрт хүрсэн болохыг онцолжээ.
Цаг уурчид хүчтэй аадар бороо орж, хуй салхи гарч болзошгүйг анхааруулж, Флорида мужийн төв хэсгээр 0.6 м хүртэлх хур тунадас орох төлөвтэй байгаа гэжээ.
Флорида мужийн наран шарлагын газрууд Иан хар салхины улмаас гамшгийн бүс болон хувирсан ба Форт-Майерс-Бич хот бүхэлдээ усанд автаж, байшингуудын нуранги автомашинуудын хамтаар усанд урсаж байгааг харж болох юм.
Иан хар салхины улмаас нийт 1.1 сая айл өрх, албан байгууллага тоггүй хоцорчээ.
Эх сурвалж: gologsmeriki.com
Содномцэрэнгийн Энхзаяа
mongolcom.mn
