Сингапурт хэдэн зуун мянган цагаач ажилчид хөл хорионд амьдарсан хэвээр байна

Twitter Print
2021 оны 09-р сар 24-нд 13:19 цагт
Мэдээний зураг,

2020 онд Сингапур улсад цагаач ажилчдын амьдардаг дотуур байрнуудад коронавирусын халдварын хэд хэдэн голомт бүртгэгдэж байсан билээ. Тэрнээс хойш халдварын тоо огцом буурсан ч цагаач ажилчид одоог хүртэл хөл хорионд байгаа ба зөвхөн ажил дотуур байр гэсэн чиглэлд л зорчиж байна. Дэлхийн өөр ямар ч улсад иргэд ийм урт удаан хугацаанд хөл хорионд ороогүй билээ.

Өнөөдрийн байдлаар Сингапурт ажиллаж буй 300 мянган цагаач ажилчид хөл хорионд байна. Өнгөрсөн долоо хоногт Сингапурын засгийн газар туршилтын журмаар 50 цагаач ажилчдад хотоор 4 цаг чөлөөтэй зорчих боломжийг олгожээ.

Коронавирусын цар тахал эхэлснээс хойш 5.8 сая хүн амтай Сингапурт коронавирусын халдварын улмаас 58 хүн нас барсан юм.

Коронавирусын халдварын тархалтыг хяналтанд авахын тулд Сингапурт хатуу хөл хорио тогтоосон үед зөвхөн цагаач ажилчдыг дотуур байрнаасаа гарахыг хориглож байсан ба бусад иргэд гадаа чөлөөтэй гарч дасгал хөдөлгөөн хийж байжээ.

Цагаач ажилчдын дотуур байранд амьдардаг ажилчдын дийлэнх нь Өмнөд Азийн орнуудаас ажил хийхээр Сингапурт ирсэн байх ба Сингапурт зам, гүүр, байшин барилгын бүтээн байгуулалтын ажилд оролцон, гэр орон луугаа олсон мөнгөө явуулдаг аж. Ажилчдын дотуур байранд нэг өрөөнд голцуу 30-уулаа амьдардаг ба ариун цэврийн өрөө, гал тогоог хэдэн зуун хүмүүс дундаа ашигладаг байна.

Хөл хорионд байгаа ажилчид өөрсдийг нь амьтнаас дор үзэж буйд Сингапурын засгийн газарт бухимдаж, бүгчим зай багатай дотуур байрнаасаа гарч, цэвэр агаар амьсгалахыг хүсэж буйгаа илэрхийлж байна. Нөгөөтэйгүүр Сингапурын засгийн газар анхнаасаа цагаач ажилчдыг бусад иргэдээс ялган үздэгээ нээлттэй илэрхийлсээр ирсэн ба цагаач ажилчид нь Сингапурт ажиллаж буй барууны орнуудын ажилчдаас өөр төрлийн виз авч, хөдөлмөрийн тусдаа хуулинд захирагддаг байна.

Коронавирусын халдварын тохиолдлуудыг зарлахдаа хүртэл Сингапурын эрх баригчид "зөөвөрлөгдсөн", "цагаач ажилчдаас илэрсэн", "дотоодын халдвар" гэж ангилдаг байна. Цагаач ажилчид нь Сингапурын хүн амын 5 хувийг бүрдүүлдэг ба хүний эрхийг хамгаалах байгууллагууд цагаач ажилчдын дунд амиа хорлох явдал сүүлийн саруудад нэмэгдсэн болохыг онцолж, удаан хугацааны турш хөл хорионд байгаа эдгээр ажилчдын сэтгэл зүйн эрүүл мэндэд анхаарах шаардлагатай гэжээ.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.