Б.Сүндэръяаг төрийн хамгаалалтанд авна уу...

Twitter Print
2021 оны 04-р сар 15-нд 09:15 цагт
Мэдээний зураг,

Түүнд алдаа байж болно оо, түүгээр нь далимдуулан доромжлох л байх. Түрүү оны УИХ-ын сонгуулийн сүүлийн өдөр сошиалд цацагдсан зургуудтай нь зууралдах л байх. Гэхдээ энэ бүсгүй гэтлэх ёстой гэмээ алд биеэрээ амиа дэнслэн үүрч, давах ёстой давааг зориг гарган давж, хэлэх ёстой үгээ хэллээ.

Түүнд хоёр л зам байсан. Нэг бол насаараа хэдэн зураг, хэзээ ч юм хийсэн алдаанаасаа болон барьцаалагдаж амьдрах, эсвэл эхэлж дуугараад, энэ мэтийн хар цагааны дундуур туучин, дальдчиж явсан өдрүүдээ ардаа хаях гэсэн хоёр замын сүүлийнхийг нь Б.Сүндэръяа сонголоо. Тэгэхдээ бүр Ерөнхийлөгчийн сонгуулийн өмнөх эмзэг үед дуугарлаа. Ингэснээрээ дүрэлзэж байгаа хоёр галын дунд өөрийгөө хаяад өгчихлөө. УИХ-ын гишүүн Ц.Анандбазарын нэр дээр шүүх цагдаагийн байгууллагад гомдол гаргаж байгаагаа өнөөдөр тэр албан ёсоор мэдэгдлээ.

Б.Сүндэръяагийн зориг гарган эхлүүлсэн хүчирхийллийн эсрэг аянд албан бусаар олон хүн нэгдэж байна. Харин албан ёсоор нэгдсэн нь бараг үгүй. Б.Сүндэръяагийн хэлсэн ярьсан болгон хуулийн өмнө зүй ёсоор батлагдаж, Ц.Анандбазар гэдэг хүний буруутай үйлдэл хөдлөшгүй баримтаар нотлогдохыг хүлээн, байр сууриа илэрхийлэхээс түдгэлзэж буй албан ёсны байгууллага, хувь хүмүүс олон байна. Хуулийн байгууллагын өмнөөс шүүгч хийгээд, түрүүлж яллаад, түүхий дуугараад байж боломгүй статустай төр төлөөлсөн, төрийн бус байгууллага ахалдаг хүмүүс ч бий. Тэдний эсрэг нийгмийг турхираад байх ч хэрэггүй, буруутгаж чичлээд байх ч шаардлагагүй. Тэгэх тусмаа энэ хөдөлгөөн захиалгатай харагдаж байна.

Нэгэнт Б.Сүндэръяа албан ёсоор гомдлоо бичгээр цагдаагийн байгууллагад өгч, мэдэгдэл хийчихлээ. Хуулийн зүйл заалт, мөрдөн байцаах ёс журмаараа шийдэгдэж таарна. Анандбазар, Сүндэръяа хоёрын хэн нь үнэн, хэн нь худал яриад байгааг гаргаад ирнэ. Ам нээсэн болгон нь шүүрч аваад шүүгч хийгээд байдаг болчихсон юм бол тэгээд сошиал орчноо л шүүх засаглал болгочихъё л доо.

Харин сонгуулийн өмнөх өдрүүдэд эмзэг сэдэв хөндөж, энэ талаар дуугарснаараа Б.Сүндэръяа амь нас, эрүүл мэндийн хувьд маш аюултай байдалд үлдэж байгааг бодолцож, түүнийг төрийн хамгаалалтанд авах нь одоо юу юунаас илүү чухал байна. Өнөөдөр нэр бүхий нэгэн сэтгүүлч, Ц.Анандбазарын хаалтын гэрээний санал Ерөнхийлөгч Баттулгын хэвлэлийн албаны нэгэн эмэгтэйгээр дамжин орж ирж байгааг нүүр хуудсаараа зарлачихлаа.

Хаалтын гэрээ гэдэг бол зөвхөн эхлэл. Харин араас нь юу дагалдах вэ? Ерөнхийлөгчийн сонгуулийн өмнөх, улс төрийн маш эмзэг, хар үед Б.Сүндэръяа мэдэгдэл хийснээрээ өөрийгөө хоёр талын гал дунд хаяж өглөө. Түүний энэ алхмыг шууд улстөржүүлэн ашиглаж, илүү хүчтэй, илүү үзэн ядалттай шуугиан дэгдээх сонирхол аль нэг талд байвал яах вэ? Үүнийхээ төлөө эрүүл мэнд, амь насанд нь хүнд ба хөнгөнөөр халдвал яах уу? Үүгээрээ шуугиан дэгдээж, шуурга тавибал яах уу? Тэгээд түүнийгээ далдлахын сайнаар далдалж, дайсан руугаа буруугаа түлхэн, нийгмийг турхирч, нэр нэгтгэн дуу хоолойгоо өргөсөн эмэгтэйчүүдийг түрхрэн босоход хүргэвэл яах уу? Хөгжингүй орнууд ямарваа сонгуулиар хүйсийн ялгарлын асуудлыг хэзээ ч хөнддөггүйн шалтгаан энэ шүү дээ.

Ийм хэмжээнд цучлыг гал болтол өрдөж, зөнгөөрөө эхэлсэн хөдөлгөөнийг зөрчлийн хурц хэлбэрт аваачвал хэн хохирох уу? Б.Сүндэръяа л хохирно. Төр доргиох хөшүүрэг төдий болоод өнгөрнө. Тэр өөрөө ч 2020 оны УИХ-ын сонгуулийн үеэр "Сонгууль болгоноор яагаад хэн нэгэн эмэгтэй заавал золиос болдог юм бэ" гэж өчнөөн олон алдааныхаа араас асууж байсан.

Нөгөө талаар Б.Сүндэръяагийн хөндсөн энэ сэдвийн хүрээнд зарим эмэгтэйчүүд хэзээ нэгэн цагт ямар нэгэн байдлаар өөрийг нь хохироосон, хохироох гэж оролдсон албан тушаал, эрх мэдэлтэй эрчүүдийн тухай дуугараад эхэллээ. Олон ч бүдүүн босс хаа нэгтээгээс өөрийнх нь нэр гараад ирэх вий гэж айж, амьдралаа алин цагийн алдаатайгаа хамт шүүн тунгааж байх шиг байна. Сүндэръяаг дуугүй болгох тусмаа л тэдэнд сайн.

Сүндэръяа дуугүй болчихвол бусад эмэгтэйчүүд ч дуугаа хураана. Энэ тохиолдолд эл жаахан бүсгүй дээр хаанаас, хэнээс, хэзээ, ямар цохилт ирэхийг бүр ч таашгүй. За зүгээр шуудхан хэлэхэд Сүндэръяад ямар нэгэн ноцтой зүйл тохиолдвол Анандбазарыг нийгмээрээ хардана, сэжиглэнэ.

Тиймээс гишүүн гуай ч төр барьж байгаа намтайгаа хамт Сүндэръяаг амь мэт хамгаалах хэрэгтэй болох нь дээ. Анхнаасаа түүний эмзэг талыг далимдуулан зэвсэг болгон ашиглаж буй хүн байгаа бол тэр хүн гох дарахад л хүссэн үр дүндээ хүрнэ.

Тиймээс иргэн Б.Сүндэръяаг сонгууль өнгөртөл, цаашлаад асуудал шийдэгдтэл төрийн аль нэг шатны хамгаалалтанд авна уу. Улс төрийн увайгүй зорилгодоо энэ охиныг ашиглах боломжийг зарим нэгэнд үлдээмээргүй байна. Тэртэй тэргүй нийгмийн сэтгэлзүй эмзэг, нийт олноороо бухимдуу, төр хэврэг, түмэн бачимдуу байна.

Р.Эмүжин

 

 
 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Зочин

      (203.91.112.133) 2021-04-17 10:02
      • 0
      • 0

      Яасан гэж төрийн хамгаалалтанд авсан юм бол. Анандбазар улаан цагаан алчихгүй л байлгүй дээ

      Хариулах