Дэлхийн банкны Ерөнхийлөгч Дэвид Малпасс Дэлхийн банкны чуулга уулзалтын үеэр Украины дэд бүтцэд учирсан хохирлын хэмжээ 60 тэрбум ам. долларт хүрсэн талаар мэдэгджээ. Түүний хэлснээр дайн үргэлжилснээр хохирлын хэмжээ өссөөр байх аж.
Украины Ерөнхийлөгч Владимир Зеленский өнгөрсөн пүрэв гарагт Дэлхийн банк болон Олон улсын валютын сангийн удирдлагуудтай цахим уулзалт хийсэн ба уулзалтын үеэр тэрээр Украины эдийн засгийг уналтанд оруулахгүйн тулд тус улсад сардаа 7 тэрбум ам. доллар шаардлагатайг онцолжээ. Түүний хэлснээр ОХУ-ын зэвсэгт хүчнийхэн санаатайгаар төмөр замын буудлууд, хүнсний агуулахууд, нарийн боовны цехүүд, газрын тос хадгалах объектууд гэх мэт Украины эдийн засагт чухал үүрэг гүйцэтгэдэг дэд бүтцүүдийг устгасаар байгаа аж. Дайны дараа эдийн засгаа сэргээхийн тулд Украинд хэдэн зуун тэрбум ам. доллар хэрэгтэй гэжээ.
Украины зүүн хязгаарын Мариуполь боомт хотод гацсан иргэд тог цахилгаан, дулаан, цэвэр усгүй байгаа тухай Украины тал онцолсоор байгаа билээ. Мариуполь боомт хотын дарга Вадим Бойченкогийн мэдэгдсэнээр Мариуполь хотод хэдэн арван мянган энгийн иргэд үлдсэн ба тэдгээр иргэдийн хувь заяа ганц хүний гарт буюу ОХУ-ын Ерөнхийлөгч Владимир Путины гарт байгаа аж. "Ерөнхийлөгч В. Путинд Мариуполь хотыг чөлөөлөх төлөвлөгөө байгаагүй. Харин хотыг бүр мөсөн устгах төлөвлөгөө л байсан" хэмээн Мариуполь хотын дарга онцолжээ. Вадим Бойченкогийн мэдээлснээр Мариуполь хотын дэд бүтцийн 90 хувь нь бөмбөгдөлтөнд өртөж, устаж үгүй болсон байна.
Түүнчлэн ОХУ-ын зэвсэгт хүчнийхэн дайны гэмт хэргээ нуун дарагдуулахын тулд өөрсдийнхөө хөнөөсөн иргэдийг олноор нь булшилж байна хэмээн мэдэгджээ. Украины Ерөнхий сайдын орлогч Ольга Стефашинагийн мэдээлснээр ОХУ-ын зэвсэгт хүчнийхэн Киев хотын ойролцоогоос ухарсны дараа тус бүс нутгуудаас Украины 1020 иргэний цогцос олдсон нь цогцос хадгалах байрнуудад хадгалагдаж байгаа аж.
Украины Ерөнхий прокурор Ирина Венедиктовагийн мэдээлснээр олон улсын шинжээчдийн тусламжтайгаар ОХУ-ын зэвсэгт хүчнийхэн Украины газар нутаг дээр нийт 7600 гаруй дайны гэмт хэрэг үйлдсэн болохыг тогтоожээ. Украины Ерөнхийлөгч Владимир Зеленский ОХУ-д Улаан өндөгний баярын өдрүүдээр галаа зогсоох зөвшилцөлд хүрэхийг уриалсан ч ОХУ-ын тал уг саналыг хүлээн аваагүй аж.
Долоо хоногийн өмнө НҮБ-аас ОХУ-д мөн адил саналыг тавьсан ч украинчууд тэр хугацааг ашиглан зэр зэвсгээ нэмэгдүүлнэ хэмээн Москва үзсэн юм. ОХУ-ын зэвсэгт хүчнийхэн Донецк мужид олон тооны тосгонуудыг эзлээд байгаа тухай Украины Ерөнхийлөгчийн тамгын газраас мэдээлж байна.
Эстони болон Латвийн эрх баригчид ОХУ-ын Украинд дахь түрэмгийллийг "геноцид" гэж тодорхойлохоор шийдвэрлэсэн байна. Энэ нь ОХУ-ын зэвсэгт хүчнийхэн эзэлсэн газар нутагтаа энгийн иргэдийг хомроглон устгасан, хүчирхийлсэн, тамлан зовоосон зэрэг гэмт хэргүүд үйлдсэнтэй холбоотой гэжээ.
АНУ-ын Ерөнхийлөгч Жо Байден Украины зэвсэгт хүчинд нэмж 800 сая ам. долларын өртөг бүхий зэр зэвсгийг тусламжаар илгээхээр болжээ.
Үүнээс гадна 500 сая долларын эдийн засгийн шууд дэмжлэгийг Украины засгийн газарт үзүүлэхээр болжээ. Энэ удаагийн тусламжийн багцад 72 ширхэг 155мм-ийн Howitzer их буу, уг их бууны 144,000 сум, 72 ширхэг тактикийн хуягт тэрэг, шинэ загварын 121 ширхэг дрон зэрэг зэвсэг багтсан байна.
Зэвсгийн тусламжийг Донбассын фронт дээр Оросын довтолгоог эсэргүүцэхэд зориулан “яаралтай” горимд хүргэж буйг Байден өчигдөр сэтгүүлчдэд мэдэгдсэн байна.
Эх сурвалж: Reuters
Содномцэрэнгийн Энхзаяа
mongolcom.mn
