Ерөнхийлөгч Жо Байден Хятадын эсрэг хатуу бодлого баримтална гэлээ

Twitter Print
2021 оны 04-р сар 29-нд 13:40 цагт
Мэдээний зураг,

Ерөнхийлөгч Жо Байден лхагва гарагт АНУ-ын Конгрессийн өмнө төрийн тэргүүний хувиар анх удаа үг хэлжээ. Тэрээр хэлсэн үгэндээ Хятадын эсрэг хатуу бодлого баримталж, дотоодын технологийн хөгжлийг дэмжиж, гадаад худалдааг нэмэгдүүлнэ гэдгээ онцолжээ. Ж. Байден, "БНХАУ болон бусад улс орнууд биднийг гүйцэхэд ойрхон байна. Бид ирээдүйн технологи болон бараа бүтээгдэхүүнийг хөгжүүлж, салбартаа тэргүүлэх ёстой." гэжээ. Тэрээр, "Салхины эрчим хүч гаргадаг турбинуудыг Бээжинд биш энд, Питтсбургэд барихгүй байх шалтгаан байхгүй шүү дээ." хэмээн дурдсаныг Конгрессийн гишүүд алга ташилтаар хүлээн авчээ.

Ерөнхийлөгч Жо Байден АНУ-ын гадаад бодлогод тулгамдаж буй хамгийн том асуудал нь БНХАУ гэдгийг удаа дараа онцолж байсан билээ. Ардчилсан намынх нь гишүүдээс гадна Бүгд Найрамдах намынхан ч Бээжингийн эсрэг хатуу бодлого баримтлах явдлыг дэмжиж буйгаа илэрхийлсээр байгаа юм. Жо Байден Америкийн хөдөлмөр эрхлэгчид болон Америкийн аж үйлдвэрүүдийн үнэ цэнийг үгүй хийж буй шудрага бус өрсөлдөөн, Америкийн технологи болон оюуны өмчийн хулгайн эсрэг тууштай тэмцэнэ хэмээн мэдэгджээ.

Түүнчлэн тэрээр Хятадын Ерөнхийлөгч Си Жиньпинтэй холбогдож АНУ-ын Зэвсэгт хүчин Энэтхэг-Номхон далайн бүс нутагт ямарваа нэг зөрчил үүсэхээс сэргийлэх зорилгоор үйл ажиллагаагаа тууштай явуулна гэдгийг анхааруулжээ. Жо Байден Конгрессийн гишүүдийг Хятадад хүний эрхийг ноцтойгоор зөрчиж буй асуудлаар мөн олон улсын худалдааны салбарт Хятад улс шудрага бус өрсөлдөж буй явдалд хариу барих хуулийн төслийг боловсруулж, батлахыг уриалжээ.

Түүнчлэн тухайн хуулийн төсөлд Бээжинтэй өрсөлдөх шинэ техник технологийг АНУ-д хөгжүүлэхэд шаардлагатай санхүүжилтын асуудлыг давхар тусгасан байх ёстой гэжээ. Ерөнхийлөгч Жо Байден, "Бид хэзээ ч хүний эрх, эрх чөлөөг дээдэлсэн үзэл бодлоосоо ухрахгүй, түнш орнуудаасаа нүрээ буруулахгүй." хэмээн онцолжээ.

ОХУ-ын тухайд Жо Байден ОХУ-ын Ерөнхийлөгч Владимир Путинтэй утсаар холбогдож, Москвагийн зүгээс АНУ-ын Ерөнхийлөгчийн сонгуульд хөндлөнгөөс нөлөөлөх гэсэн оролдлого, Америкийн төрийн болон хувийн байгууллагуудын эсрэг цахим халдлага үйлдсэн явдалд ОХУ хариуцлага хүлээх болно гэдгийг анхааруулжээ.

Түүнчлэн тэрээр Иран болон Хойд Солонгосын цөмийн хөтөлбөртэй холбоотой аюул заналхийллийн эсрэг түнш орнуудтайгаа хамтран ажиллана гэжээ.

Эх сурвалж: https://www.reuters.com/world/us/biden-talks-tough-china

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.