Солонгосчууд ч бас өөрсдөө хулхидуулдаг

Twitter Print
2015 оны 02-р сар 22-нд 15:04 цагт
Мэдээний зураг,

2014 оны Азийн наадам БНСУ-ын Инчон хотод болсон. Энэ тэмцээний боксын эрэгтэйчүүдийн 56 кг-д шөвгийн наймд Монгол-БНСУ-ын тамирчид таарсан. Олимп, дэлхийн аваргын мөнгөн медальт Н.Төгсцогт Солонгосын боксчин Х.Сангмюнг илт давуу хожсон ч шүүгчид БНСУ-д ялалт өгсөн. Манай тал тоглолтыг маргаантай шүүсэн хэмээн зарга үүсгэсэн ч зохион байгуулагчид дүрэмд эсэргүүцэл бичих заалт байхгүй гэсэн шалтгаанаар хүлээж аваагүй байна.

Нутгийн эздийн найруулж буй хор үүгээр зогсоогүй Энэтхэгийн тамирчин золиосонд нь өртсөн аж. Н.Төгсцогттой тоглохоос өмнөх даваанд Х.Сангюнг Энэтхэгийн тамирчинг луйвардаж ялжээ. Энэ асуудлаар Энэтхэгийн тамирчдад бойкот хийж, тамирчдаа тэмцээнээс татаж магадгүй гэсэн яриа гарчээ. Үүнийг нь эсэргүүцсэн Энэтхэгийн багийн ахлагчид манай Үндэсний Олимпийн хорооны төлөөлөгч нартай хамтран хэвлэлийн хурал хийсэн байна. Зохион байгуулагчид чөлөөт бөхийн төрөлд шүүгчтэй хуйвалдаж Солонгосчууд ялалт авсан талаар Ираны тал мөн гомдол гаргажээ. БНСУ-ын бөх Ираны тамирчинд илт давуу ялагдсан ч шүүгчид талбайн эздийн талд ялалтыг өгсөн гэнэ. Тоглолтыг үзэж суусан үзэгчид хэлэхдээ “Ираны бөх өрсөлдөгчөө цэвэр унагасан ч шүүгч тоглолтыг зогсоогоогүй, цаг дуусахад Солонгосын талд гар өргөсөн нь хошин шог байлаа” гэсэн байна.

Спортын аливаа тэмцээн уралдаанд зохион байгуулагч орон олон давуу талтай байдаг. Цагийн зөрүүгүй, нутаг дээрээ, цаг агаарын тохирсон нөхцөлд өндөр амжилт гаргах боломжтой аж. Гэхдээ хэт нэг талыг баримталж, ялалтын төлөө улайрч, зүй бус үйлдэл хамгийн ихээр гаргадаг улс нь Өмнөд Солонгос гэдгийг дэлхийн спортын шүтэн бишрэгчид андахгүй. 2002 онд Азид анх удаа хөлбөмбөгийн тэмцээн болсон. Нутаг дээрээ БНСУ түүхэндээ байгаагүй өндөр амжилт гаргасан. Хагас шигшээд шалгарахдаа дэлхийн дөрвөн удаагийн аварга Итали, Европын хошой, 2010 оны дэлхийн аварга Испанийн шигшээг золиосондоо оруулсан аж.

Итали-БНСУ-ын тоглолтонд Европын багийн гоолыг талбайн шүүгч тооцоогүй. Мөн Ф.Тотти нэмэлт цагт зүй бус үйлдэл гаргаж улаан хуудас авсан нь жинхэнэ гутамшиг байлаа гэж олон улсын сэтгүүлчид бичиж байсан. Ингээд эцсийн дүнд БНСУ 2:1-ээр ялалт байгуулсан түүхтэй. Тоглолтыг шүүн явуулсан Эквадорын шүүгч Моренагийн зурагтай 00-ийн цаасыг Италид худалдаанд гаргахад хамгийн их эрэлт хэрэгцээтэй бараа болж байв.

Гэхдээ БНСУ ч өөрсдөө шүүлтийн золиос болсон удаатай. Хамгийн сүүлийн жишээ дурдахад энэ оны эхээр ОХУ-ын Сочид болсон өвлийн Олимпийн наадамд алдарт уран гулгагч Ким Ю На алтан медалиа Оросын тамирчинд луйвардуулсан. Манай хойд хөршийн уран гулгалтын тамирчид дэлхийд тэргүүлдэг ч эмэгтэйчүүдийн ганцаарчилсан төрөлд Олимпийн аваргагүй байсан. Харин нутаг дээрээ анх удаа өвлийн наадмыг зохион байгуулахдаа олон хүчтэй өрсөлдөгчдыг ялж А.Сотникова алтан медаль энгэртээ зүүж, нэг үгээр хэлбэл эх орондоо болсон тэмцээнээр далимдуулан Оросууд энэ төрлөөр эх орондоо Олимпийн аварга төрүүлсэн юм. Өнөө цагийн дэлхийн нэг номерын тамирчин, “Ванкувер 2010”-ын аварга Өмнөд Солонгосын Ким Ю На шигшээд шалгарсан ч мөнгөн медаль авсан. Тоглолтын дараа БНСУ Олон улсын спортын арбитарын шүүхэд гомдол гаргаж, Ким Ю На алтан медаль авах ёстой байсан гэж бичсэн ч нэгэнт гаргасан шийдвэрийг өөрчлөөгүй юм.

Үүнээс өмнө 2002 онд АНУ-ын Солт Лейк хотод өвлийн Олимпийн наадам болсон. Тухайн наадмын шорт-трекын эрэгтэйчүүдийн 1500 м-ийн төрөлд АНУ-ын А.Оно Апполо, БНХАУ-ын Л.Жин Жун, Канадын М.Гагнон нар медаль авсан юм. Шигшээ уралдаанд БНСУ-ын Ким Дон Сун шүүгчийн буруугаас болж хасагдаж байлаа. Өмнөд Солонгосчууд мөн л зарга үүсгэж зохион байгуулагч нарт гомдол гаргасан ч хүлээж аваагүй аж.

Э.Гүнтөмөр

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.