Хятадын Фужянь муж коронавирусын халдварын шинэ голомт болжээ

Twitter Print
2021 оны 09-р сар 14-нд 10:27 цагт
Мэдээний зураг,

Хятадын зүүн өмнөд эргийн Фужянь муж коронавирусын халдварын голомт болоод байна. Тус мужид сүүлийн хэдэн өдөрт коронавирусын халдварын 60 гаруй тохиолдол бүртгэгдсэний 15 нь бага ангийн сурагчид аж.

Хоёрхон долоо хоногийн өмнө БНХАУ-ын эрх баригчид Хятадын нийт мужийн талаас илүү хувьд нь тархсан коронавирусын дельта хувилбарын халдварын тархалтыг хяналтандаа авч, дотоодын халдварын тоогоо тэг болгосноо зарласан билээ. Фужянь дахь халдварын голомт нь тус мужийн Путянь хотын Шянью засаг захиргааны нэгжийн бага сургуулийн сурагчдаас коронавирусын халдвар илрүүлэх хуваарьт шинжилгээ авах үеэр илэрчээ. Халдвар авсан сурагчдын эцэг эхчүүдээс шинжилгээ авсан ба нэг сурагчийн Сингапураас ирээд удаагүй байгаа аавыг халдварын эх үүсвэр хэмээн тодорхойлсон байна.

Нөгөө талаас тухайн эр Сингапураас өнгөрсөн сарын 4-нд Шямэн хотод ирж, 14 хоног зочид буудалд тусгаарлагдсан ба үүнийхээ дараа Шянью засан захиргааны нэгжид дахин 7 хоног тусгаарлалтанд байсан аж. Тусгаарлалтанд байсан 21 хоногийн хугацаанд түүнээс 9 удаа шинжилгээ авсан ба түүний шинжилгээний хариунууд бүгд сөрөг гарсан байна. Тэрээр БНХАУ-ын хилээр нэвтрээд 37 хоногийн дараа коронавирусын халдвар авсан байна. Хятадын эрх баригчид тухайн эр коронавирусын халдварыг хаанаас, хэрхэн авсан болохыг мэдээлээгүй ч коронавирусын халдварын далд үе 21 хоногоос илүү байх боломжгүй гэдгийг мэргэжилтнүүд онцолж байна.

Гуандон мужийн Өвчний хяналт, өвчнөөс урьдчилан сэргийлэх төвөөс мэдээлж байгаагаар коронавирусын дельта хувилбарын халдварын далд үе дунджаар 4 өдөр, Ухань анх тархсан коронавирусын халдварын далд үе дунджаар 6 хоног аж. Путянь хотын удирдлагууд тус хотын 2.9 сая оршин суугчдыг хотоос гарахыг хориглосон ба кинотеатрууд, фитнессийн төвүүд, баар, номын сангуудыг хааж, цэцэрлэг сургуулиуд бүгд цахимаар хичээллэж байна. Шянью засаг захиргааны нэгжид нийтийн тээвэр, такси, хот хоорондын автобус болон галт тэрэгний үйлчилгээг зогсоожээ.

Гэсэн хэдий ч халдвар Фужянь мужийн өөр бусад хотууд руу хэдийн тархаад байна. Өнгөрсөн 7-р сарын сүүлээр Жяньсү мужид бүртгэгдэж Хятадын дийлэнх мужид тархсан коронавирусын дельта хувилбарын тархалт болон одоо Фужянь мужид бүртгэгдээд буй коронавирусын халдварын голомт нь Хятадын эрх баригчдын хувьд томоохон сорилт болоод байна. 7-р сарын сүүлээр коронавирусын дельта хувилбар тархаж эхэлсний дараа орон нутгийн удирдлагууд сая сая иргэдийг хатуу хөл хорионд оруулж, иргэдийг олноор нь шинжилгээнд хамруулж, дотоодын аялал жуулчлалаа зогсоосон билээ.

8-р сарын сүүлээр Хятадын эрх баригчид халдварын тархалтыг хумьж, дотоодын халдварын тоог тэг болгосноо мэдэгдсэн ч ажиглагчид Хятадын эрх баригчдын коронавирусын халдварын тархалтын эсрэг авч буй хатуу арга хэмжээ цаашид үр дүнтэй байж чадах эсэхэд эргэлзэж байна.

Халдварын тархалт нэмэгдэх үед хатуу хөл хорио тогтоож байсан Австрали, Сингапур зэрэг улс орнууд коронавирусын халдварын эсрэг авах арга хэмжээгээ өөрчилж эхэлж байгаа ба Австралид л гэхэд иргэд нь хатуу хөл хориог эсэргүүцэж, өнгөрсөн сард томоохон хотуудад нь эсэргүүцлийн жагсаал цуглаан зохион байгуулагдсан билээ.

Эх сурвалж: CNN

Содномцэрэнгийн Энхзаяа

mongolcom.mn

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.