Жүдочид арван медаль хүртэж, Монгол улс багийн дүнгээр дөрөвт бичигдлээ

Twitter Print
2014 оны 09-р сар 23-нд 13:27 цагт
Мэдээний зураг,

БНСУ-ын Инчон хотод Азийн XVII наадам үргэлжилж байна. Энэ удаа шар тивийн 45 орны 13000 орчим тамирчин 36 спортын төрлөөр 437 багц медалийн төлөө өрсөлдөх юм. Харин манай улсаас 23 спортын төрөлд 233 тамирчин тивийн Олимпийн наадамд өрсөлдөж байна. Тэмцээний эхний дөрвөн өдрийн дараах байдлаар БНХАУ 26 алт, 14 мөнгө, 18 хүрэл, нийт 58 медальтай тасархай тэргүүлж байгаа бол зохион байгуулагч орон 14 алт, 15 мөнгө, 16 хүрэл, нийт 45 медаль, Япон 13 алт, 13 мөнгө, 16 хүрэл, нийт 42 медаль хүртээд байгаа аж. Монгол улс Азийн наадмын түүхэнд 1982 онд Энэтхэгийн Дели хотод болсон наадмаас 3 алтан медаль хүртэж байсан. Харин 2014 онд рекорд амжилтаа эвдэх боломжтой боллоо.

Өчигдөр жүдо бөхийн эрэгтэйчүүдийн 90, -100, +100 кг-ын барилдаан болж Н.Түвшинбаяр алт, Ө.Дүүрэнбаяр мөнгө, Л.Отгонбаатар хүрэл медалийн эзэн болсон. Мөн эмэгтэйчүүдийн 78 кг-д Б.Мөнхтуяа, +78 кг-д О.Жавзмаа шагналт тавдугаар байр эзэллээ. Жүдочид нийт 3 алт, 3 мөнгө, 4 хүрэл, нийт 10 медаль хүртэж энэ төрөлд Япон, БНСУ-ын дараа гуравт бичигдсэн юм.

Азийн наадмын түүхэнд Япон, БНХАУ гэсэн хоёрхон улс медалийн тоогоор тэргүүлж байсан. 1951-1978 он хүртэл Япон медалийн тоогоор тэргүүлж байсан бол 1982-2010 оны хооронд БНХАУ тивдээ хамгийн шилдэг амжилтыг үзүүлсэн аж. Харин БНСУ өмнө нь хоёр удаа Азийн наадмыг зохион байгуулсан ч тухай бүрд нь хоёрдугаар байрт орсон түүхтэй.

"Инчон 2014" Азийн наадмаас медаль хүртсэн орнууд /9-р сарын 22-ны 22 цагийн байдлаар/