Бээжин -40 хүртэлх хэмд ажиллах чадвартай шинэ хурдны галт тэргээ танилцууллаа

Twitter Print
2021 оны 01-р сар 12-нд 11:28 цагт
Мэдээний зураг,

Бээжин цаг агаарын цочир хүйтэн уур амьсгалд ажиллах чадвартай хурдны шинэ галт тэрэг бүтээснээ танилцуулжээ. Хятадын төрийн өмчит China Railway группын бүтээсэн CR400AF-G хурдны шинэ галт тэрэг нь цельсийн - 40 хүртэлх хэмд ажиллах чадалтай бөгөөд цагт 350 км хүртэл хурдлах чадвартай аж.

Шинэ хурдны галт тэрэг нь Хятадын нийслэл Бээжинг зүүн хойд зүгт байрлах Шеньян, Харбин зэрэг хотуудтай холбох гэнэ. Уг хурдны галт тэргэнд цочир хүйтнийг тэсвэрлэх чадвартай материал болох хром ба молибденээр чанаржуулсан ган ашиглажээ. Түүнчлэн галт тэрэгний их бие рүү цас мөс орохоос сэргийлж силикон битүүмжлэл хийсэн ба галт тэрэгний тормозны систем болон эд ангийг хүйтэнд хөлдөхгүй байхаар бүтээжээ. Шинэ галт тэрэг нь хөнгөн цагааны хайлшаар гөлгөр шувтан хэлбэртэй бүтээгдсэн нь цахилгаан бага зарцуулах гэнэ.

China Railway группын хурдны галт тэрэгний төвийн захирал Жоү Сон Чайна Дэйли сонинд өгсөн ярилцлагадаа хурдны шинэ галт тэрэгний тормозны системийг онцолжээ. Тэрээр, "Жишээ нь галт тэрэг Хятадын хамгийн хүйтэн хотуудын нэг Харбинд нэг цаг орчим хөдөлгөөнгүй зогсоход маш хүйтэн цаг агаарын улмаас тормозны систем хөлдөх аюултай. Тэгвэл шинэ галт тэрэгний тормозны систем нь галт тэрэг зогссон ч тормозны систем нь тодорхой давтамжтайгаар хөдөлж байхаар бүтээгдсэн. Яг л хүйтэнд зогсож буй хүмүүс дулаацахын тулд хоёр хөлөө ээлжлэн товшихтой адилхан." гэжээ. Өнөөдрийн байдлаар Хятад улс хурдны галт тэрэгний замынхаа нийт уртаар дэлхийд тэргүүлж байна.

Хятадын хурдны галт тэрэгний замын урт 37 мянга гаруй километрээр хэмжигдэж байгаа бөгөөд тус улсад хамгийн хурдан галт тэрэг болох Шанхайн маглев үйл ажиллагаагаа явуулж байна. Шанхайн маглев хурдны галт тэрэг нь Шанхай хотын Лунъян Лу метроны буудлаас Шанхайн олон улсын нисэх онгоцны Пудон буудал хүртэлх 30 км замыг 7 минут 20 секундад туулдаг байна. Тус галт тэрэг нь цагт 431 км хурдлах чадалтай аж.

Өнгөрсөн жил БНХАУ нийслэл Бээжингээс 2022 оны Өвлийн олимпийн наадам зохион байгуулагдах Хаалган хот хүртэлх 174 км урт хурдны галт тэрэгний замыг барьж дуусгасан билээ. Уг замаар зорчих хурдны галт тэрэг нь жолоочгүйгээр цагт 350 км хурдлах чадалтай аж.

Эх сурвалж: CNN

Содномцэрэнгийн Энхзаяа

Mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.