“Хоссанаа” ХХК-ийн “Андлалын өргөө”-г барьсны эцэст нураасан түүх

Twitter Print
2021 оны 09-р сар 09-нд 09:31 цагт
Мэдээний зураг,

Тэмүүжин 8 шаргаа хулгайд алдаад хайж явахдаа Хөхүүрийн талд Наху баяны ганц хүү Боорчитой таарч анд бололцдог. Үүнийг бэлгэдэж АНДЛАЛЫН ӨРГӨӨГ Хэнтий аймгийн  Батноров суманд барихаар болсон. Гэхдээ Тэмүүжин Боорчийн анд бололцсон Хөхүүрийн талаас бараг 30 аад км-ийн зайд барьсан нь Ерөнхий сайд Л.Оюун-Эрдэнийн өвөөгийн буйр гэх “Дэлгэр Өлзийт уул”-ын өвөрт барьжээ. “Андлалын өргөө”-г улсын төсвийн 1,9 тэрбум төгрөгөөр жил гаруйн хугацаанд барьж 2019.12.11-нд ашиглалтан оруулах улсын комисс хүлээж авсан.  

Гэвч 2021 оны 9-р сард гэнэт бүгдийг нь буцааж нураасан. Энэ явдлын үеэр Захиалагч БОАЖЯ-ын сайд Н.Уртнасан: ”Зохиогч, барималч Д.Эрдэмбилэг агсны гэр бүлийнхэн зохиогчийн эрх дээр маргасан, улсын төсвийн мөнгийг “Хоссанаа” компани төсөвт буцааж тушаасан учир нураалаа” гэж мэдэгдсэн. Гэвч АНДЛАЛЫН ӨРГӨӨ-ний зохиогчийн эрхийг талийгаач Д.Эрдэмбилэг  болон хамтран эзэмшигч М.Жавхлантөгс нар  ХОС САНАА компанид шилжүүлсэн.

Өөрөөр хэлбэл: Зохиогчийн эрхийн маргаан үүсгэх эрхтэй ганц эзэмшигч нь Андлалын өргөөг буулгасан ХОССАНАА компани ажээ. Сайдын энэ мэдэгдлээ нотлохын тулд баримт үзүүлэх хэрэгтэй байлаа.

Дараа нь Хэнтий аймгийн Нутгийн зөвлөлийнхөн гэх хүмүүс хэвлэлийн хурал хийж, ”Андлалын өргөө”-ний суурин дээр дахин бүтээн байгуулалт хийхийн тулд ард түмнээс хандив хүсч байна” гэж мэдэгдсэн. Гэвч “Андлалын өргөө”-ний суурин дээр тавих бүтээл аль эрт тодорсон. Хүрлээр цутгасан баримлыг суурин дээр нь аваачиж цутгахад бэлдэж суурийн ажил ид өрнөж байна. Төсөв хөрөнгө нь хаанаас гарч байгаа нь тодорхойгүй. Ард түмний хандиваар гэж хэлэхийн тулд л дээрхи хэвлэлийн хурлыг хийжээ.

Харин хэргийн гол эзэн ХОС САНАА гэх компаний эзэн яагаад гарч ирсэнгүй вэ? Асуудлын гол нь үүнд байгаа юм. “Андлалын өргөө” барих ажил нь эхнээсээ хэсэг бүлэг улс төрчдийн лобби, эрх мэдэлд дулдуйдан хууль зөрчсөн, тендэр нь ганцхан компанид зориулагдсан, жинхэнэ эзэд нь хуйвалдаанаас нуухын тулд  ХОС САНАА гэх цүнхний компанийг зүгээр л ашигласан юм.

ХОССАНАА ХХК улсын бүртгэлд М.Амарсанаа гэх нэр дээр байх боловч уг хүн “би компаний үйл ажиллагаанд оролцдоггүй, мэдэхгүй” гэж хариулдаг.

 

“Андлалын өргөө” барих сураг дуулдаж эхэлсэн 2018 оны 5-р сард “Хоссанаа” компанийн хувьцаа эзэмшигч нэгээр нэмэгдэв. Гэхдээ тэр хүн хэн болох нь өнөөдөр ч улсын бүртгэлд бүртгэгдээгүй. Хоёр хувьцаа эзэмшигчтэй болсон өдрөө ХоссанааХХК-ийн гүйцэтгэх захирлаар  ЭСДЭ компанийн Санхүүгийн захирал М.Жавхлантөгс /Хэнтийн уугуул / томилогдов. “ЭСДЭ” ХХК нь  Өмнөговьд хөрс хуулалт, нүүрсний тээвэр эрхэлдэг. Захирал нь  Лхагвасүрэнгийн Батсүрэн ажээ. Тэгэхээр “Хоссанаа” ХХК-ийн нууц ноёнтон нь Л.Батсүрэн юм.  Л.Батсүрэн нүүрсний  ЭСДЭ, газар тариалангийн Жаргалант Хаарвест компаниудыг эзэмшихээс гадна  Херо медиа групп, Херо контент групп гэсэн компаниудтай.Энэ нь  Ерөнхий сайд Л.Оюун-Эрдэнийн хувьцааг нь эзэмшдэг  Херо энтертайнмент групптэй яг адилхан үйл ажиллагаа явуулдаг ажээ./Улсын бүртгэл дээрээс харж болно /

 

Улсын төсвийн 1,9 тэрбумаар “Андлалын өргөө” барих тендерт 2018 онд Хос санаа гэх ганцхан компани ямар ч өрсөлдөгчгүйгээр оролцож, сар гаруйхны хугацаанд тендер, гэрээ, төсөв нь гэрлийн хурдаар батлагдаж, яам, орон нутагтай гурвалсан гэрээ хийсний маргааш газар дээрээ барилгын ажил эхлүүлсэн байдаг.

“Андлалын өргөө” барих тендэрийг барилгын тусгай зөвшөөрөлгүй компанид өгснөө гэнэт мэдэж 2018 оны 12 сард барилгын тусгай зөвшөөрөл ХОССАНАА ХХК-д нөхөж олгов.

 “Андлалын өргөө”-г нураасныхаа дараа улсын төсвөөс авсан 1,9 тэрбумаа буцаагаад төлчихлөө гэж мэдэгдсэн  ХОССАНАА компани ажилчдынхаа Нийгмийн даатгалыг ч төлж чаддаггүй, Нийгмийн даатгалын өртэй компани ажээ.

Энэ бүхнийг он цагийн дарааллаар харуулья!

Сэтгүүлч Б.Отгон

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.