Энэ жил Японд сакура эрт цэцэглэжээ

Twitter Print
2021 оны 03-р сар 31-нд 11:49 цагт
Мэдээний зураг,

Япон орны хаврын бэлгэ тэмдэг болох сакура энэ жил 1200 жилийн түүхэндээ хамгийн эрт цэцэглэжээ. Осакагийн их сургуулиас мэдээлснээр энэ жил сакура Японы хуучин нийслэл Киотод 3-р сарын 26-ны өдөр цэцэглэсэн ба сүүлийн хэдэн арван жилүүдэд сакура эрт цэцэглэх болсон нь дэлхийн цаг уурын өөрчлөлттэй салшгүй холбоотой гэжээ.

Японы Эзэн хааны ордны бичиг баримт, тэмдэглэл зэргээс харахад япончууд сакура цэцэглэлтийн талаарх тэмдэглэлийг анх манай эриний 812 оноос эхлэн бичиж тэмдэглэн иржээ. Киото хотын түүхэнд сакура өмнө нь 1409 онд хамгийн эрт буюу 3-р сарын 27-ны өдөр цэцэглэж байсан нь тэмдэглэгдэн үлдсэн байна. Сакура цэцэглэх үзэгдэл цөөн хэдэн хоног үргэлжилдэг ч уг үйл явдал Япон улсын хувьд соёл уламжлалын талаас гадна эдийн засгийн хувьд чухал ач холбогдолтой юм. Сакура цэцэглэх үзэгдлийн талаар эрт дээр үеэс бичиж тэмдэглэн үлдээсэн баримтууд нь япончуудын хувьд маш үнэ цэнэтэй билээ.

Японы хуучин нийслэл Киото хотын архивт сакура цэцэглэх баяр буюу хаврын баярыг япончууд 9-р зуунаас эхлэн тэмдэглэж ирсэн тухай баримтууд хадгалагдаж байгаа ба эдгээр баримтуудаас өнгөрсөн үеийн цаг уурын нөхцөл байдал, дэлхийн дулаарал, хотжилт зэрэгтэй холбоотойгоор бүс нутагт цаг агаарын хэм нэмэгдэж ирсэн тухай олон тооны мэдээллийг олж болох юм. Осакагийн их сургуулийн судлаач Ясүюүки Аоно 812 оноос эхлэн өнөөдрийг хүртэлх Японы Эзэн хаад, ноёд түшмэд, захирагчид болон лам нарын сакура цэцэглэлтийн талаар бичсэн тэмдэглэлүүдийг уншиж судалжээ.

Түүний хэлж байгаагаар 1800 оноос эхлэн Киотод сакура цэцэглэх үзэгдэл 4-р сарын дундаас 4-р сарын эхэн хүртэл аажмаар урагшилж эхэлжээ. Японы Цаг уурын алба сакура цэцэглэх үзэгдлийг ажиглаж, тухай бүрт нь мэдээлэл өгдөг ба Хирошимад хамгийн эрт буюу 3-р сарын 11-нд сакура цэцэглэх үзэгдэл эхэлжээ.

Эх сурвалж: BBC

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.