Төсвийн алдагдал 4.8 их наяд хүрчихээд байхад л “идэж дуусдаггүй ээ”

Twitter Print
2020 оны 08-р сар 27-нд 11:42 цагт
Мэдээний зураг,

Одоо хулгайгаа хуульчлаад л гүйцээ. 

"Авлигажсан" сонгуулиар автоматаар гарч ирсэн хүмүүсээс юу ч хүлээх хэрэггүй! 2020 оны төсвийг 2 их наядын алдагдалтай баталсан. Орлогоосоо 2 их наядыг илүү зарцуулна гэж "шинэ цээж баян" томорсон. /Орлого12 их наяд, зарлага 14 их наяд/. Гэтэл 2 их наядаар дутааж төлөвлөсөн төсвийн орлого нь дахиад 2 их наядаар тасарлаа. Харин төсвийн зарлагаа хасах нь байтугай 700 орчим тэрбумаар нэмжээ. Ингээд улсын төсвийн алдагдал 4.8 их наядад хүрлээ.

Энэ бол улсын төсвийн орлогын бараг 50 хувьтай тэнцэх мөнгө. Энэ дутаж байгаа алдагдлыг хэрхэн нөхөх вэ? гэсэн асуултад Сангийн сайд "БОНД гаргана" гэж хариулж байна. Саяхан л сонгуулийн өмнө "бонд гаргаж, өр тавихгүй" гэсэн эх оронч үгээр түмний тархийг угааж байлаа. Сонгуулийн өмнөх, дараах ажил, амлалтын ялгаа энэ. Мөн уг алдагдлыг "Капитал банкинд алдсан Нийгмийн даатгал, Эрүүл мэндийн даатгалын 240 тэрбумыг авна" гэж үлгэр ярив. Хэдэн жил авч чадаагүй, угаасаа намаараа хуваагаад уугаад идчихсэн мөнгийг авна гэдэг үлгэр гэдэг нь ойлгомжтой. Төсвийн орлого тасрахад нөлөөлсөн гол зүйл нь мэдээж зарж иддэг зэс, нүүрсний экспорт багассантай холбоотой.

Зарлага нэмэгдсэн нь коронагийн нэр барьсан "сонгуулийн авлигал"-ыг баруун солгойгүй тараасан. Ялангуяа ядуусыг ходоодоор нь худалдаад авчихсан. Цөөхөн жишээ хэлье.

1. Цэцэрлэг, дотуур байрны хоол, үдийн цайны мөнгө хэмнэгдсэн байх ёстой Хаачсан бэ?

- Хүүхдийн 100000 төгрөг, багш нарын сургалт, цахим хичээлд зарцуулсан.

2. Яг сонгуулийн сурталчилгааны үеэр буюу 2020.05.01-2020.06.01-ны хооронд амьдралын түвшин доогуур 243,000 иргэнд олгох хүнсний хэмжээг 2 дахин нэмэгдүүлсэн. Нийт 27.5 тэрбум төгрөг.

3. Ноолуурын кг тутамд 20000 төгрөг. 203 мянган малчин өрхөд 175 тэрбум төгрөг.

4.16 хүртэлх насны хүүхдийн амжиргааг дэмжих мөнгөн тэтгэмжийн хэмжээг 100,000 төгрөгөөр нэмэгдүүлсэн. Нийт 67,3 мянган иргэнд 20 тэрбум.

Цаашаа ноос, арьс ширний урамшуулал… зөндөө зүйл бий. Зөвхөн дээрхи мөнгийг хүртсэн сонгогчдын тоо 513.733 болж байна.

Энэ мөнгийг улсын төсвөөс авч тараасан учраас одоо эргээд өр тавихаас өөр арга үлдсэнгүй. Яг ийм байдлаар бид улс түмнээрээ өрөнд живжээ. Гадаадад тавьсан Монгол улсын өр 30 тэрбум доллар буюу 80 их наяд төгрөг . Бидний бүтэн 10 жилийн төсөвтэй тэнцэх хэмжээний мөнгө шүү дээ. Өнгөрсөн сонгуулиар зарсан "авлигалын мөнгө"-ийг дахиад өр тавьж нөхнө.

Улс орноо өрөнд оруулсан эрх баригчид нь өнөөдөр өөрсдийнхөө өмсөх дээлний хээ хуар,идэх хоол амтлах ажлын хэсгийн тухай л ярьж суух. Биднийг ийм хүмүүс удирдаж байгаа учраас Монгол ядуурлаас гарахгүй нь нүцгэн үнэн билээ. 

Сэтгүүлч Б.Отгон

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.