Artificial intelligence буюу Хятадын хиймэл оюун ухааны төв

Twitter Print
2019 оны 12-р сар 16-нд 10:21 цагт
Мэдээний зураг,

Аялалын хоёр дахь хэсэг маань сэтгэл догдлуулж, баяр хөөр мэдрүүлж, бас чамгүй гайхаш төрүүлсэн газар болох China Artificial Intelligence town буюу ХЯТАДЫН ХИЙМЭЛ ОЮУН УХААНЫ ТӨВ байлаа.

Компьютерын программ хангамжаар бүтээгдсэн, хүний сэтгэхүйг дууриалгасан, технологийн төрөл нь анх 90-ээд оны хүүхдүүдийн үед “тетрэс” гэдэг бяцхан компьютер тоглоомоор орж ирж байсан санагдана. Гэхдээ хамгийн сэтгэл догдлуулсан тоглоом бол компьютер дээр тоглодог шатар байсныг манай үеийнхэн андахгүй. Би лав аавдаа магтуулах гэж хичнээн тогловч Гари Каспоровын 5 настайдаа тоглож байсан түвшинг хожиж байсан юмуу үгүй юмуу.

Гэхдээ ухаалаг агент буюу орчноо танин мэдээд, тохирсон үйлдэл хийхдээ амжилтанд хүрэх магадлалаа дээд зэрэгт хүргэхийг эрмэлздэг яг хүн шиг төгс системийн талаархи ойлголт бол мэдээж Арнолд Шварцнегер ахын маань тоглосон Терминатор, за тэгээд Матрикс, нилээд сүүлд Би Робот кинонуудаас орж ирсэн байх. Энэ салбарын бүх л зөгнөлийг шингээсэн анхны бүтээл дунд хүүхэд нас өнгөрсөн нүүдэлчин хүүгийн хувьд ийм төвөөр зочилох нь өвөө эмээгийн онгоцоор нисэх, ах эгчийн Сансарын нисгэгч болохтой ижил хүлээлттэй тул ярьдаг робот мэндчилэн угтах том шилэн барилгуудын өмнө сэтгэл догдлон зүрх лугшин мишээсээр буулаа.

Ganochir Buyanaa-н зураг.

Компьютерийн программ дотор өөрөө явж байгаа мэт дизайны шийдэлтэй цав цагаан танхимаар алхахад роботын дуутай эмэгтэйн хоолой мэндчилэн танилцуулага хийж, эрч хүч ханхалсан этгээд сонин аяаар орчиндоо сүр хүч нэмэх аж. Энэхүү ХЯТАДЫН ХИЙМЭЛ ОЮУН УХААНЫ ТӨВ нь цогц утгаараа өнгөрсөн жил буюу 2017 оны 7 сард нээлтээ хийжээ. Нийт бүтээн байгуулалт 3.4 км квадрат газар нутаг цогцлохдоо газрыг нь Засгийн газраас үнэгүй олгож, хувийн хэвшил барьж дуусгасан байна.

Уг төв ХИЙМЭЛ ОЮУН УХААНЫ судалгааг эрчимжүүлж дэлхийд тэргүүлэх, бүтээл гаргах болон зах зээлд нэвтрүүлэх гэсэн хоёр үндсэн зорилготой. Хиймэл оюун ухааны судалгааны гол хөтөлбөрүүдийг миний сурч байгаа Шанхай Жиаотунг их сургууль, судалгааны өндөр амбицтай Төв номын сан, Хятадын Google гэгддэг интернэт хайлтын системийг хөгжүүлэгч "Baidu" компани нар хариуцаж ажилладаг байна. Тиймээс сургуулийн зүгээс дэмжлэг авч олон нийтэд ил бус энэ төвд орох эрх надад олдсон юм.

Харин бүтээл гаргах ажилд инкубатор төв ажиллах бөгөөд хиймэл оюун ухааны чиглэлд бүтээл гаргах амбицтай компаниудад түрээсийн бага төлбөр, инновацид татаас өгөх бондын хөтөлбөр, Хятадын худалдааны консулаас зах зээлд танилцуулга хийж, аж ахуйн нэгжүүдэд бүтээлүүдийг зуучилж өгөх гэсэн үндсэн гурван хөтөлбөртэй ажилладаг байна.

Бүтээл гаргах компаниудыг шалгаруулах, уг төвд оршин суух эрх өгөх, судалгаа шинжилгээг нь илүү практик бүтээл болгох ажлыг Тэргүүлэх технологийн Алибаба хамтарсан судалгааны төв, Төв номын сан, Компьютер судалгааны төв, Хиймэл оюун ухаан судлалын холбоо зэрэг байгууллагууд хариуцаж, манлайлж, удирдаж ажилладаг байна. ХӨРӨНГӨ ОРУУЛАЛТЫГ ЗАСГИЙН ГАЗРААС БУС ЗАХ ЗЭЭЛЭЭС БОСГОЁ хэмээх капиталист уриатай энэ төвд өнгөрсөн жил хиймэл оюун ухааны чиглэлд амбицтай 178 компани нэгдсэний 64 нь ХЯТАДЫН ХИЙМЭЛ ОЮУН УХААНЫ ТӨВ-д оршин суух эрхээ авчээ. Уг 64 компаний 50 нь одоогийн байдлаар 16 гол төсөл дээр хамтран ажиллаж, зах зээлд бүтээгдэхүүнээ гаргахад бэлэн болоод байгаа аж.

Ganochir Buyanaa-н зураг.

Миний бие дээрх 50 компаний бүтээлийн дээжистэй танилцаж хүүхэд шиг л тоглож гүйлээ. Архитектор, хот төлөвлөлт, цахилгаан станц барих гээд мега төслүүдийн бүтээн байгуулалтын чиглэлээр сурч байгаа залуус уг төслөө хиймлээр урлан босгож болдог 5D сургалтын хөтөлбөр, ажилчид болон зочдын нас, нэр, өндөр, дуртай зүйл, түүх намтар гээд мэдээллийг багтаасан албан байгууллагын жижүүр робот гээд маш олон сонирхолтой бүтээлүүдийг гараар барьж нүдээр үзлээ. Нэмж хэлэхэд бид ч гэсэн энэ төвтэй хамтарч, мал хариулдаг нисдэг дрон робот, хөдөө гадаа аялалд явахад хэрэгтэй шинэ бүтээл, хүйтэн газар амьдран суухад шаардлагатай мэдээлэл өгөх зэрэг амьдралаас урган гарсан бүтээгдэхүүн үйлдвэрлэж болмоор санагдлаа.

Буянаагийн Ган-Очир

2018.05.06

  

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.