Чили улс сүүлийн 10 жилийн турш ган гачигт өртөж байгаа ба энэ жил нөхцөл байдал улам хүндэрчээ. Олон сар, жилийн турш үргэлжилсэн ган гачиг нь хөдөө аж ахуйн салбарт асар их хэмжээний хохирол учруулж, тариан талбайнууд хатаж, мал амьтнууд олноороо үхэж байна.
Гол мөрөн, нууруудын усны түвшин хамгийн доод хэмжээндээ хүрч, зарим бүс нутгуудад иргэд зөөврийн ус хэрэглэж байна. 7-р сард Чилид өвлийн уур амьсгал орж, цас бороо ордог ч энэ жил хур тунадас ороогүй нь нөхцөл байдлыг улам хүндрүүлжээ.
Сантьяго хотыэ Цаг уурын төв станцаас мэдээлснээр Чили улсад жилд дунджаар 252 мм хур тунадас ордог байсан ч өнгөрсөн жилийн турш нийт 180 мм, энэ жил дөнгөж 78 мм хур тунадас оржээ. Эрдэмтэд болон зарим улс төрчид усан үзмийн талбай, мал аж ахуйн төв болсон Чили улсын төвийн бүсэд усны хомсдол эргэж буцалтгүйгээо үүсэх эрсдэлтэй байгааг анхааруулсаар байна.
Жилийн турш цасаар бүрхэгдсэн байдаг Андын нуруу цасан бүрхүүлгүй өнжиж, газрын хөрс хаа сайгүй хуурайшиж, шарласан нь гарцаагүй дэлхийн дулаарлын нөлөө гэдгийг Чилийн эрх баригчид онцолж байна.
Өнгөрсөн мягмар гарагт Ройтерс агентлагт өгсөн ярилцлагадаа Чилийн Шинжлэх Ухааны сайд Андрем Кув дэлхийн уур амьсгалын өөрчлөлтийн улмаас усны түвшин тасралтгүй буурч байгаа асуудал нь Чили улсын нэн тэргүүнд шийдэх асуудал болоод байгааг онцолжээ. Түүний хэлж байгаагаар Чилийн засгийн газар усыг нөөцлөх, хадгалах дэд бүтцэд хөрөнгө оруулах, усны менежмент, уур амьсгалын өөрчлөлтийг хянах тал дээр ажиллах эрдэмтдийн багийг бүрдүүлэх зэргээр арга хэмжээ авч эхэлжээ.
Түүнээс гадна Чили улсын хүн амыг усаар хангадаг Мапочо, Майпо голуудын усны түвшин 2019 оныхоос ч илүү доошилсон нь усны хэрэглээнд хязгаар тавих нөхцлийг бүрдүүлээд байгаа аж.
Эрдэмтдийн үзэж байгаагаар Чилийн төвийн бүс нутгийн усны хомсдлын асуудал цаашид улам дордох төлөвтэй байгаа учраас эрх баригчид ус нөөцлөх дэд бүтэц барьж, мод ургамал тарих зэргээр шуурхай арга хэмжээ авах шаардлагатай байгаа аж.
Эх сурвалж: https://www.reuters.com/world/americas/chiles
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
