АНУ-ын засгийн газар Украинд болж буй дайнтай холбоотойгоор ОХУ болон Беларусийн эсрэг шинээр хориг тогтоогоод байгаагаа танилцуулжээ.
Хоригт Оросын телевизийн сувгууд, "Газпромбанк" банкны удирдлагууд зэрэг ОХУ, Беларусийн нийт 2600 албан тушаалтан багтжээ. АНУ-ын эрх баригчдын мэдээлснээр хоригт "Газпромбанк" -ы удирдах албан тушаал бүхий 27 хүн багтсан ч тус банкны хөрөнгийг царцааж, шилжүүлэг хийх эрхийг нь цуцалсан зүйл байхгүй аж.
Түүнчлэн ОХУ, Беларусийн 2600 иргэнд визийн хориг тавьжээ. Цагаан ордноос мэдээлснээр "Их-7" -гийн цахим чуулга уулзалтын үеэр "Их-7"-гийн удирдагчид ОХУ-ын газрын тосны импортоос татгалзах зорилго тавьсан ба тус уулзалтанд Украины Ерөнхийлөгч Владимир Зеленский мөн оролцжээ.
Өнгөрсөн ням гарагт Канадын Ерөнхий сайд Жастин Трюдо Украины Ирпен хотод айлчилж, Украины Ерөнхийлөгч Владимир Зеленскийтэй уулзсан байна. Тэрээр Канадын засгийн газар мөн адил ОХУ-ын эсрэг хориг арга хэмжээ авч буйг зарлан, Украины зэвсэгт хүчинд шинэ зэр зэвсэг, машин техникийг илгээхээ зарлажээ.
Европын холбоо ОХУ-ын эсрэг авах 6 дахь багц хориг арга хэмжээгээ боловсруулж байгаа ч ОХУ-ын газрын тосны импортыг хориглох асуудал дээр одоог хүртэл зөвшилцөлд хүрч чадахгүй байна.
Европын холбооны улс орнуудын байгалийн хийн импортын 40 хувийг ОХУ-ын импорт эзэлдэг бөгөөд Европын орнууд хэрхэн ОХУ-ын эрчим хүчний хамаарлаас гарах тал дээр санал зөрөлдсөөр байгаа билээ.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
