Брендүүд Оросын үнэт чулуунаас татгалзаж эхэллээ

Twitter Print
2022 оны 03-р сар 31-нд 13:37 цагт
Мэдээний зураг,

Үнэт эдлэлийн дэлхийн томоохон брендүүд ОХУ-ын төрийн өмчит алмаз эрдэнийн чулууны үйлдвэрүүд нь Ерөнхийлөгч В. Путины Украинд явуулж буй дайныг санхүүжүүлж байж болзошгүй гэж үзэн Оросын үнэт чулуунуудаас татгалзаж эхэлжээ.

Америкийн Тиффани энд Ко, Швейцарийн Шопард, Америкийн Сигнэт, Данийн Пандора зэрэг дэлхийн үнэт эдлэлийн томоохон брендүүд Оросоос гаралтай алмаз эрдэнийн чулуу худалдан авахаа зогсоохоо мэдэгджээ.

3-р сарын дундуур Guardian агентлаг Оросын төрийн өмчит алмаз эрдэнийн уурхай нь ОХУ-ын Украинд явуулж буй дайныг санхүүжүүлж буй тухай мөн үнэт эдлэл хийдэг компаниуд ОХУ-д тавьсан хориг арга хэмжээнээс зайлсхийн ОХУ-ын үнэт чулуунуудыг Энэтхэгээр дамжуулан авч байгаа тухай нийтэлжээ.

Уг нийтлэл гарснаас хойш дэлхийн үнэт эдлэлийн томоохон брендүүд ханган нийлүүлэгчдэдээ Оросоос гаралтай ямар ч түүхий эд худалдан авахгүй байхыг анхааруулжээ. Дэлхийн нийт алмаз эрдэнийн чулуун олборлолтын 30 хувь нь ОХУ-д хийгддэг ба ОХУ-д хийгдэж буй алмаз эрдэнийн чулууны олборлолт, борлуулалтын 98 хувийг Кремльтэй ойрын холбоотой гэгддэг Алроса групп хариуцдаг байна.

Алроса группын 1/3-ийг ОХУ-ын төр, 1/3-ийг Бүгд Найрамдах Саха улс болон тус улсын орон нутгийн удирдлагууд эзэмшдэг байна. 2021 онд л гэхэд Алроса групп 4.16 тэрбум ам. долларын борлуулалт хийж, 943 сая ам. долларын цэвэр ашиг олж, хувьцаа эзэмшигчдэдээ багагүй хэмжээний орлого оруулжээ. ОХУ-ын Ерөнхийлөгч Владимир Путин өмнө нь тус групп ОХУ-ын болон орон нутгийн төсөвт их хэмжээний орлого оруулдаг болохыг ч онцолж байсан удаатай.

АНУ, Их Британи зэрэг улс Алроса групптэй бизнес хийхийг хориглосон шийдвэр гаргасан ч Алроса групп ихэнх үнэт чулуунуудаа Энэтхэгээр дамжуулан экспортлодог учраас Алроса группын үйл ажиллагаанд дээрх хориг арга хэмжээ хүчтэй нөлөөлж чадаагүй аж. Энэтхэгт Оросоос ирсэн чулуунуудыг зүсч, өнгөлдөг байна.

АНУ-ын Гаалийн журмаар Энэтхэгт зүсч, өнгөлсөн алмаз эрдэнийн чулуунууд Энэтхэг улсын бараа бүтээгдэхүүн гэсэн ангилалд багтдаг байна.

Үнэт эдлэлийн хяналт зохицуулалтыг хийдэг Үнэт Эдлэлийн Хариуцлагатай Зөвлөл үнэт чулуунуудын найдвартай эх үүсвэрийг дэмжиж, нийлүүлэлтийн сүлжээнээс "маргаантай чулуунуудыг" хасах зэрэг ажлыг хийх ёстой ч томоохон брендүүд тус зөвлөл ОХУ-д дайныг нь санхүүжүүлэхэд тусалж байна гэсэн шүүмжлэлд өртөх болжээ.

Ингэснээр Пандора, Картье, Гуччи, Сан Лоран зэрэг брендүүдийг эзэмшдэг компаниуд тус зөвлөлөөс гарч буйгаа мэдэгдсэн ба удалгүй тус зөвлөлийн гүйцэтгэх захирал албан тушаалаасаа огцорчээ.

Эх сурвалж: The Guardian

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.