МҮОХ спортын сэтгүүлч нартай хамтран ажиллана

Twitter Print
2014 оны 09-р сар 12-нд 15:16 цагт
Мэдээний зураг,

Монголын Үндэсний олимпийн хороо /МҮОХ/, Монголын спортын сэтгүүлчдийн холбоо /МССХ/ өнөөдөр хамтран ажиллах санамж бичиг байгуулж, гэрээ байгууллаа. Гэрээнд МҮОХ-ны ерөнхийлөгч Д.Загдсүрэн, МССХ-ны ерөнхийлөгч Ч.Отгонбаатар нар гарын үсэг зурж, МҮОХ, МССХ-ны гишүүд оролцов.

Спорт, олимпизмыг хөгжүүлэх их үйлсэд үргэлж хамтран ажиллаж, хослон зүтгэж ирсэн нэг фронтын хоёр дайчид ийн албан ёсны санамж бичиг байгуулснаар хүүхэд залуучуудад олимпийн хөдөлгөөнийг сурталчлах, спортоор хичээллэх, бие бялдарын өв тэгш хүмүүжил олгох том зорилгоо улам өргөн далайцтай, хүртээмжтэй болж өргөжүүлэхэд чиглэгджээ.

Монголын спортын сэтгүүлчдийн холбоо 1990 онд байгуулагдаж байсан бөгөөд ирэх жил 25 жилийнхээ ойд зориулж спорт+сэтгүүлзүйн салбартаа ажил хэрэгч, бүтээлч 25 ажил санаачлан зохион байгуулахаар зорьж байгаагийн эхнийх нь энэхүү хамтын ажиллагааг өргөжүүлэх МҮОХ, МССХ хоорондын гэрээ ажээ. 

Спортын талбарт тангараг өргөсөн мэт сэтгэл, зүтгэлээ зориулдаг спортын сэтгүүлчид хамтын ажиллагааны хүрээнд Олимпийн зөвлөл, спорт холбоодын үйл ажиллагаа, Монгол улсад шинэ тутам  үүсч буй спортын төрлүүдийг залуучуудад сурталчлахад түлхүү анхааран ажиллаж, “Спорт-Олимпизм”  аяныг дэмжин оролцох ажээ.

МҮОХ-ны зүгээс хамтын ажиллагааны хүрээнд ОУОХ-ны ивээл дор зохион байгуулагддаг олимп, тив, бүсийн наадам, хүүхдийн наадам зэрэг арга хэмжээг сурвалжлах спортын сэтгүүлчдийг дэмжин ажиллаж, тэдний мэргэжил, боловсрол, ажлын ур чадварыг нэмэгдүүлэхэд туслалцаа, дэмжлэг үзүүлэх юм байна.

 

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.