Коронавирусын цар тахлын үед сонгуулийн үйл ажиллагааг амжилттай зохион байгуулжээ

Twitter Print
2020 оны 04-р сар 16-нд 12:56 цагт
Мэдээний зураг,

БНСУ-ын Ерөнхийлөгч Мүн Жэ Иний Ардчилсан нам парламентын сонгуульд ялалт байгуулжээ. Өмнөд Солонгос улс коронавирусын цар тахал эхэлснээс хойш сонгуулийн санал хураах үйл ажиллагаа зохион байгуулсан цөөн тооны улс орнуудын нэг болж байна.

Сонгуулийн үйл ажиллагааг төлөвлөсний дагуу явуулахын тулд эрх баригчид иргэдийн эрүүл мэнд, аюулгүй байдлыг хангах хатуу арга хэмжээнүүдийг авчээ. Сонгуульд саналаа өгөх гэж ирсэн иргэдэд гараа ариутгах, амны хаалт болон нэг удаагийн бээлий өмсөх, өөр хоорондоо багадаа 1 метрийн зай барих шаардлага тавьж байсан ба иргэдийн биеийн хэмийг давхар хэмжиж байжээ. Биеийн хэм нь 37.5 хэмээс өндөр байсан иргэдийн саналыг тусгай бүхээгт авч байсан ба бүхээгийг тогтмол ариутгаж байсан байна.

БНСУ-д коронавирусын халдварын дэгдэлттэй холбоотойгоор 60 мянга орчим хүн хөл хорионд байгаа ба тус улсад коронавирусын халдвар авсан 10 мянга гаруй тохиолдол бүртгэгдсэн билээ. Коронавирусын цар тахлыг үл харгалзан энэ удаагийн парламентын сонгуулийн ирц 66 гаруй хувьтай байсан нь сүүлийн 18 жилийн хугацаан дахь хамгийн өндөр үзүүлэлт юм. Түүнчлэн мэргэжилтнүүдийн үзэж байгаагаар энэ удаагийн сонгуульд анх удаагаа 18 нас хүрсэн иргэд саналаа өгсөн нь ч үүнд нөлөөлсөн байж болзошгүй аж.

БНСУ-ын хүн амын 26 хувь нь саналаа шуудангаар болон хөл хорио тогтоосон бүсэд барьсан тусгай санал хураах байруудад өнгөрсөн баасан, бямба гарагуудад урьдчилж өгсөн байна. Коронавирусын халдвар авсан нь тогтоогдсон иргэд хатуу дүрэм журмын дагуу зөвхөн тодорхой нэг цагт, санал авах тусгай байруудад саналаа өгсөн ба тэдгээр иргэдийг санал авах байр луу зөвхөн алхаж эсвэл өөрийн унаагаар очихыг зөвшөөрсөн аж. Өмнөд Солонгост хэдхэн долоо хоногийн өмнө коронавирусын халдвар огцом дэгдсэн ч эрх баригчид иргэдийг олноор нь коронавирусын шинжилгээнд хамруулж, сэжигтэй тохиолдлуудыг олж илрүүлэх тал дээр үр дүнтэй ажилласнаар коронавирусын халдварын дэгдэлтийг хяналтандаа авч чадсан билээ.

Парламентын сонгуулийн үр дүнд Ерөнхийлөгч Мүн Жэ Иний Ардчилсан нам БНСУ-ын Үндэсний ассамблей буюу парламент дахь 300 суудлаас 163-ыг нь авсан байна. Өмнөд Солонгосын парламентын сонгуульд нийт 35 намын гишүүд өрсөлдсөн ч гол өрсөлдөөн зүүнийг баримтлагч Ардчилсан нам, консерватив сөрөг хүчний Нэгдсэн Ирээдүй нам хоёрын хооронд явагджээ. Нэгдсэн Ирээдүй нам парламентад 103 суудал авах төлөвтэй байгаа аж.

Эх сурвалж: Bloomberg

Содномцэрэнгийн Энхзаяа 

mongolcom.mn 

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.