Австралийн мянга мянган иргэд хөл хориог эсэргүүцэн жагсчээ

Twitter Print
2021 оны 08-р сар 23-нд 11:55 цагт
Мэдээний зураг,

Австралийн Мельбурн болон Сидней хотын цагдаа нар коронавирусын цар тахалтай холбоотойгоор тогтоосон хөл хориог эсэргүүцсэн иргэд хооронд мөргөлдөөн үүсчээ.

Мельбурн хотод хөл хориог эсэргүүцсэн иргэд цагдаагийн хамгаалалт руу нэвтэрсэнтэй холбоотойгоор цагдаа нар жагсагчид руу перец цацаж, 218 хүнийг баривчилжээ.

Хөл хорионы дэглэм нь нэг сараар сунгагдсан Нью Саут Уэльс мужийн нийслэл Сидней хотын иргэдийн эсэргүүцлийн жагсаалыг цагдаагийн 1000 гаруй албан хаагчдын тусламжтайгаар тараасан байна. Сүүлийн 24 цагт Нью Саут Уэльс мужид коронавирусын халдварын 825 шинэ тохиолдол бүртгэгдсэн байна. Квинслэнд мужийн нийслэл Брисбенд хөл хориог эсэргүүцсэн тайван жагсаалд 2000 гаруй иргэд оролцжээ.

Жагсаалын үеэр баригдсан иргэдийг коронавирусын цар тахлын үеийн журмыг зөрчсөн хэмээн буруутгаж 5452 австрали долларын торгууль ноогдуулсан бол 3 хүнийг цагдаагийн албан хаагчийн биед халдсан хэргээр шалгаж байгаа гэжээ. Коронавирусын халдварын тархалтыг зогсоохын тулд Виктория мужид тогтоосон хөл хорионы дэглэмийг өнгөрсөн бямба гарагт сунгасан байна.

Сидней хотод тогтоосон хөл хориог ирэх сарын сүүл хүртэл сунгасан ба халдвар ихээр тархсан захын дүүргүүдийн 2 сая иргэд өнгөрсөн 6-р сараас хойш хатуу хөл хорионд байгаа юм. Уг шийдвэрийг эсэргүүцсэн иргэдийн жагсаалд 250 орчим хүн оролцсон ба жагсаалын үеэр цагдаагийн нэг албан хаагч гэмтэж, 47 хүнийг баривчилжээ.

Түүнээс гадна цагдаа нар Сидней хотын төв рүү зорчиж байсан 38 мянган автомашиныг зогсоож, хөл хорионы дэглэмийг зөрчсөн 260 тохиолдлыг бүртгэжээ. Нью Саут Уэльс мужийн цагдаагийн газрын даргын онцолсноор цагдаа нарын авсан арга хэмжээ нь үг хэлэх эрх чөлөөг хязгаарлах бус коронавирусын халдвар тархахаас сэргийлэх зорилготой байсан аж.

Хөл хорио тогтоосон ч Сидней хотод өнгөрсөн додоо хоногийн хугацаанд коронавирусын халдварын тохиолдлуудын тоо хоёр дахин нэмэгдсэн ба зарим мэргэжилтнүүд хөл хорио нь халдварын тархалтыг бууруулах үр дүнтэй арга биш гэдгийг онцолж байгаа бол хууль тогтоогчид цагаачид болон дүрвэгсдийн амьдардаг ядуу дүүргүүдэд хатуу хөл хорио тогтоосон явдлыг шүүмжилж байна.

Эх сурвалж: https://www.bbc.com/news/world-australia

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.