Шинэ Зеландын авч буй арга хэмжээ "дельта" хувилбарын тархалтын эсрэг үр дүн өгөхгүй байна

Twitter Print
2021 оны 08-р сар 23-нд 11:42 цагт
Мэдээний зураг,

Шинэ Зеландын коронавирусын цар тахлын эсрэг авч буй арга хэмжээ халдварлах чадвар өндөртэй коронавирусын "дельта" хувилбарын тархалтын эсрэг үр дүнтэй байж чадахгүй байгааг Шинэ Зеландын коронавирусын халдварын эсрэг авах хариу арга хэмжээг хариуцсан сайд Крис Хипкинс онцолжээ. Тэрээр коронавирусын "дельта" хувилбар өмнөх хувилбаруудаасаа өөр байгаа нь одоо авч буй халдварын эсрэг арга хэмжээгээ өөрчлөх шаардлагатайг харуулж байна гэжээ.

Коронавирусын цар тахал эхэлсэн даруйд Шинэ Зеланд улс хилээ хааж, хатуу хөл хорио тогтоож, халдварын тархалтыг хяналтанд авч чадсан ба ДЭМБ, улс орнууд Шинэ Зеландыг коронавирусын тархалтыг үр дүнтэй зогсоож чадсан хэмээн магтаж байсан билээ.

Жонс Хопкинсийн их сургуулийн судалгаагаар коронавирусын цар тахал эхэлснээс хойш тус улсад коронавирусын халдварын 3016 тохиолдол бүртгэгдсэн ба уг вирусын халдварын улмаас 26 хүн нас баржээ. Окленд хотод коронавирусын "дельта" хувилбар бүртгэгдсэнтэй холбоотойгоор Шинэ Зеландын эрх баригчид хөл хорио тогтоосон ба уг голомтоос одоогийн байдлаар 72 тохиолдол нэмж бүртгэгдсэн байна.

Сурагчдын дунд халдварын тохиолдол бүртгэгдсэнтэй холбоотойгоор Окленд хотын 7 сургууль хаагдсан ба нийслэл Веллингтонд 6 тохиолдол бүртгэгдсэн байна. Эрх баригчид Окленд хотод тогтоосон хөл хориог сунгахаар төлөвлөж байгаа ба Крис Хипкинсийн мэдээлснээр дотооддоо халдварын тархалтыг зогсоох нь засгийн газрын нэн тэргүүний зорилго аж.

5 сая хүрэхгүй хүн амтай Шинэ Зеландын Эрүүл мэндийн яамнаас мэдээлснээр өнгөрсөн пүрэв гарагийн байдлаар тус улсад 960 мянга гаруй иргэн коронавирусын эсрэг вакцины 2 тунд хамрагдаж, 1.7 сая хүн вакцины эхний тундаа хамрагджээ. Үүнтэй холбоотойгоор иргэд коронавирусын эсрэг дархлаажуулах ажил удаашралтай байгааг шүүмжилж байгаа ба өндөр хөгжилтэй орнууд дундаас Шинэ Зеландад коронавирусын эсрэг вакцинд бүрэн хамрагдсан иргэдийн тоо бусдаасаа харьцангуй цөөн байна.

Энэ сарын эхээр Шинэ Зеландыэ Ерөнхий сайд Жасинда Ардерн тус улсын хил энэ оны сүүл хүртэл хаалттай байх ба энэ хугацаанд хүн амаа коронавирусын эсрэг вакцинд хамруулна хэмээн мэдэгдсэн билээ.

Эх сурвалж: https://www.bbc.com/news/world-asia

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.