Өнгөрсөн онд 2108 оюутан үр хөндүүлжээ

Twitter Print
2014 оны 09-р сар 08-нд 16:22 цагт
Мэдээний зураг,

Жил бүрийн есдүгээр сарыг “Оюутны эрүүл мэндийг дэмжих сар” болгон зохион байгуулах Эрүүл мэндийн сайдын тушаал 2013 онд гарсан. Энэ жил “Оюутны эрүүл мэндийг дэмжих сар”-ын аяныг хоёр дахь удаагаа тэмдэглэж байна.

Улсын хэмжээнд 99 их, дээд сургууль, коллежид нийт 175.200 гаруй оюутан суралцаж байгаагаас 89.3 хувь буюу 156.128 нь Улаанбаатар хотод суралцаж байна. Оюутнууд өөрийн эрүүл мэндийг хамгаалах мэдлэг, чадвар, туршлага дутмагаас архи, тамхи хэрэглэх, буруу хооллох, хамгаалалтгүй бэлгийн хавьталд орох, хүсээгүй жирэмслэлт, үр хөндөлт, бэлгийн замаар дамжих халдварт өртөх нь илүүтэй байдаг.

Эрүүл мэндийн албан ёсны статистик үзүүлэлтээр 2013 онд 12 мянга гаруй оюутан эмнэлэгт хэвтэж эмчлүүлсэн ба үүний 68 хувийг эмэгтэйчүүд, 32 хувийг эрэгтэйчүүд эзэлж байна. Оюутнуудын өвчлөлийг хүйсээр авч үзэхэд:

• Эрэгтэйчүүдэд хоол боловсруулах, осол гэмтэл, халдварт өвчин

• Эмэгтэйчүүдэд шээс бэлгийн тогтолцоо, жирэмслэлттэй холбоотой өвчлөл, хоол боловсруулах замын өвчлөл тэргүүлж байна.

• 2013 оны байдлаар 2108 оюутан эмнэлэгийн байгууллагаар үр хөндүүлсэн,

• Зам тээврийн ослын улмаас 117 оюутан бэртэж гэмтсэн байна.

• 860 гаруй оюутан халдварт өвчинд өртсөн тохиолдол бүртгэгдэж, түүний дийлэнх буюу 30.6 хувийг гахай хавдар, 29.4 хувийг салхин цэцэг, 28.0 хувийг вируст гепатит өвчин тус тус эзэлж байна. Шинээр бүртгэгдсэн сүрьеэ өвчний 387 тохиолдлын 10.2 хувь нь оюутнууд байжээ.

• 2013 онд тэмбүүгийн өвчлөл 6271, үүнээс 819 нь оюутан, заг хүйтэн 4878, үүнээс 737 нь оюутнууд, трихомониазын өвчлөл 3808, үүнээс 617 нь оюутнуудад бүртгэгдсэн байна.

Иймд оюутан залуучуудын эрүүл мэндийн эрсдэлийг бууруулах, эрсдэлт зан үйлийг өөрчлөхөд чиглэсэн мэдээлэл сургалт, сурталчилгаа, ухуулга нөлөөллийн үйл ажиллагааг эрчимжүүлэх, тусламж үйлчилгээ хайх, зөв зан үйлийг төлөвшүүлэх, тусламж, үйлчилгээний хүртээмжийг нэмэгдүүлэх, оюутан залуучуудтай ажилладаг байгууллагуудын хамтын ажиллагааг сайжруулах зорилгоор энэхүү аяныг зохион байгуулж байна.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.