Өмнөд Африкийн Бүгд Найрамдах улсад суугаа АНУ-ын элчин сайд Рубен Брижети Өмнөд Африк улс Украинд болж байгаа дайны тал дээр дундыг баримталж байгаа гэж мэдэгдсэн хэрнээ ОХУ-д зэр зэвсэг нийлүүлсэн хэмээн буруутгажээ.
BBC агентлагийн мэдээлж байгаагаар Рубен Брижети Претория хотод хийсэн хэвлэлийн бага хурлын үеэр Өмнөд Африк ОХУ-д зэр зэвсэг нийлүүлсэн гэх хангалттай үндэслэл байгаа гэжээ. Тэрээр, "2022 оны 12-р сарын 6-наас 8-ны хооронд Саймонстаунд байсан оросын ачааны Lady R хөлөг онгоц нь ОХУ-д буцаж очихдоо зэр зэвсэг тээвэрлэсэн байсан." хэмээн мэдэгджээ.
Кейптаун хоттой ойр байрлах Саймонстаунп Өмнөд Африкийн Тэнгисийн цэргийн хүчний бааз байрладаг ба Франс Пресс агентлагийн мэдээлснээр Lady R хөлөг онгоц нь барууны хоригт багтсан онгоц аж. Өмнөд Африкийн парламентын чуулган дээр тус улсын Ерөнхийлөгч Сирил Рамапоса АНУ-ын элчин сайдын мэдэгдэлд удахгүй хариу өгнө хэмээн мэдэгдсэн байна.
Удалгүй Ерөнхийлөгчийн тамгын газраас албан ёсны мэдэгдэл гаргасан ба уг мэдэгдэлд ОХУ-ын Lady R хөлөг онгоц Саймонстауны боомтод байрлах нь нууц байгаагүй, тухайн үед тус хөлөг онгоцтой холбоотой олон янзын мэдээ мэдээлэл гарсан ч хэн ч ямар ч баримт нотолгоо гаргаж ирж чадаагүй гэжээ.
Түүнчлэн Өмнөд Африкийн засгийн газар уг асуудлыг шалгахыг өмнө нь шүүгчээр ажиллаж байсан хүнээр ахлуулсан хараат бус багт даалгажээ. Өнгөрсөн пүрэв гарагт АНУ-ын Төрийн департамент Рубен Брижетигийн мэдэгдэлтэй санал нэг байгаагаа илэрхийлсэн байна.
Хоригт багтсан ОХУ-ын хөлөг онгоц Өмнөд Африкийн боомтод ож, зогссон явдалд Вашингтон сэтгэл ихэд зовниж байгаа тухай Төрийн департаментын хэвлэлийн нарийн бичгийн даргын орлогч Ведант Патель мэдэгджээ.
Рубен Брижети өнгөрсөн 2-р сард Өмнөд Африк ОХУ болон БНХАУ-ын цэргийн хээрийн хамтарсан сургуулилт хийсэн явдлыг онцолсон аж. НҮБ-ын чуулганы үеэр Өмнөд Африк ОХУ-ын Украин руу довтолсон явдлыг буруушаасан тогтоолын эсрэг санал өгөхөөс татгалзсаар ирсэн ба ОХУ-ын эсрэг барууны орнуудын тогтоох хоригт нэгдэхээс мөн татгалзсан юм.
Өмнөд Африкийн Sunday Times сонинд бичсэнээр Өмнөд Африкийн эрх баригчид ирэх 8-р сард тус улсад болох БРИКС-ийн ээлжит чуулган уулзалтанд ОХУ-ын Ерөнхийлөгч В. Путинг оролцуулахгүй байх арга зам хайж байгаа тухай бичжээ.
Өмнөд Африк нь Олон Улсын Эрүүгийн шүүхийн гишүүн улс бөгөөд ОУЭШ ОХУ-ын Ерөнхийлөгч В. Путинг дайны гэмт хэрэгтэй холбогдуулан баривчлах шийдвэр гаргасан билээ.
ОУЭШ-ийн гишүүн орны хувиар Өмнөд Африкийн зүгээс Оросын төрийн тэргүүнийг баривчилж, ОУЭШ-д хүлээлгэж өгөх үүрэг хүлээх аж.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
