В.Зеленский Оросоос эрчим хүч авч буй орнуудыг зэмлэн буруушаалаа

Twitter Print
2022 оны 04-р сар 15-нд 11:07 цагт
Мэдээний зураг,

В. Зеленский Оросоос эрчим хүч авч байгаа орнуудыг буруушаажээ

Украины Ерөнхийлөгч Владимир Зеленский БиБиСи агентлагт өгсөн ярилцлагадаа ОХУ-аас газрын тос худалдан авсаар байгаа Европын орнуудыг "гэмгүй иргэдийн цусаар мөнгө олж байна" хэмээн буруушаажээ.

Ярилцлагын үеэр В. Зеленский ХБНГУ болон Унгар улс ОХУ-аас эрчим хүч импортлосоор байгааг онцолж, ОХУ энэ онд л гэхэд ХБНГУ болон Унгар руу  326 тэрбум ам. долларын үнэ бүхий эрчим хүч экспортлоод байгааг дурджээ. 

Берлин ОХУ-ын эсрэг хориг арга хэмжээг дэмжиж буйгаа илэрхийлсэн ч ОХУ-ын эрчим хүчний экспортонд хатуу хориг тогтоохоос татгалзсаар байгаа нь Украины эрх баригчдын бухимдлыг төрүүлж байгаа аж. 

Энэ тухай Ерөнхийлөгч В. Зеленский, "Манайхтай нөхөрсөг зарим орнууд цаг үе өөрчлөгдөж байгааг ойлгосон. Асуудал одоо зөвхөн бизнест эсвэл мөнгөнд байхаа больсон. Зүгээр амьд үлдэх нь л асуудал болчихоод байна." хэмээн ярьжээ. 

Түүнээс гадна тэрээр Украины зэвсэгт хүчнийхэнд оросуудын эсрэг тэмцэхэд шаардлагатай зэр зэвсгийг түргэн шуурхай илгээхийг улс орнуудаас хүссэн байна. 

Өнгөрсөн долоо хоногуудад ОХУ Украины төв болон хойд хязгаар, нийслэл Киев орчмоос цэргүүдээ гаргасан ч Украины зүүн болон өмнөд хязгаарт нөхцөл байдал хурцдаж, тулаан ширүүсжээ. 

Өмнөд хязгаарын Мариуполь боомт хотыг эзлэх нь ОХУ-ын стратегийн гол зорилго болоод байгаа ба ОХУ Украин руу довтолсноос хойш бөмбөгдөлтөнд тасралтгүй өртсөн тус хотод 21 мянга гаруй хүн амь үрэгдсэн хэмээн Ерөнхийлөгч Владимир Зеленский онцолжээ. 

Түүний хэлж байгаагаар ОХУ-ын зэвсэгт хүчнийхний Мариуполь, Буча, Бородянка хотуудад үйлдсэн харгислал энхийн гэрээ хийх боломжийг үгүй хийж байгаа аж. 

Оросын цэргүүдэд эзлэгдсэн Буча хотод бусдын гарт амиа алдсан олон зуун жирийн иргэдийн цогцос олдсон ба заримынх нь гар ардаа боолттой, толгой руугаа буудуулсан байдалтай гудамжнаас олдсон билээ. Түүнчлэн ОХУ-ын зэвсэгт хүчнийхэн охид эмэгтэйчүүдийг хүчирхийлсэн хэмээн гэрчүүд мэдээлснийг олон улсын эрүүгийн шүүхийн шинжээчид шалгаж байгаа аж. 

Ерөнхийлөгч Владимир Зеленскийн хэлснээр Украины зүүн болон өмнөд хэсэгт нөхцөл байдал хүнд байгаа ч Украины зэвсэгт хүчний хамгийн хүчирхэг анги бүрэлдэхүүнүүд байрлаж байгаа аж.
Эх сурвалж: BBC

Содномцэрэнгийн Энхзаяа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.