Төрийн албаны зөвлөлд Б.Билэгтээс ч чухал ажил бий

Twitter Print
2014 оны 09-р сар 08-нд 09:46 цагт
Мэдээний зураг,

Төрийн албаны зөвлөлийн даргаар Б.Цогоог томилсноос хойш чиг үүргээ умартсан байгууллагын тоо нэгээр нэмэгдсэн. Одоо хоёр дахь жилдээ явж байна. О.Магнайгийн толгойлдог ШӨХТГ-ынхан мэргэжлийн хяналтынхны ажлыг булааж хийдэг шиг Төрийн албаны зөвлөлийнхөн Үйлдвэрчний эвлэлийн ажлыг өмнөөс нь орж хийдэг болов.

Саяхан Б.Билэгтийг Цагдаагийн ерөнхий газраас чөлөөлсний дараа тус газраас Засгийн газрын Хэрэг эрхлэх газарт тайлбар хүссэн албан тоот илгээсэн гэнэ. “Ажлаас чөлөөлсөн шалтгаан болон аль хуулийг үндэслэл болгосноо тайлбарла” гэжээ. Цагдаагийн төв байгууллагын даргыг томилж, чөлөөлөх асуудлыг Хууль зүйн сайд нь Засгийн газарт мэдүүлж хэлэлцүүлдэг хуультай. Шар хүний өмнөөх хар хүн гэгчээр Төрийн албаны зөвлөлийн энэхүү албан тоот бараг илүүц юм биш үү.

УМБГ, ЭЦГ-ын албан тушаалтнууд салбарын сайдаа унагаахаар улстөрчидтэй хамсан хор найруулж, энэхүү хууль бус ажиллагаандаа хэрэгт шалгагдаж байсан эмэгтэйг ашигласан нь баримт нотолгоотойгоо хууль хяналтын байгууллагад шалгагдаж байгаа. Хэвлэлээр улиг болтлоо шуугисан “Г.Сарангэрэл ажиллагаа”-г мэдсэн ч мэдээгүй юм шиг өнгөрөөсөн Б.Билэгтэд Хууль зүйн сайд нь хариуцлага тооцоо л биз. Чөлөөлсөн шалтгаан, хуулийн акт нь тодорхой байхад Төрийн албаны зөвлөлийнхөн энэ асуудалд гар, хошуу дүрэх нь илүүц юм биш үү.

Тэд агентлагийн даргын араас хариу нэхсэн мөртлөө Шинэчлэлийн Засгийн газрыг байгуулсны дараа зуу зуугаараа чөлөөлөгдсөн алба хаагчдын араас дуугарсан билүү. Тэгээд ч төрийн албан хаагчдын эрх ашгийг хамгаалдаг Үйлдвэрчний эвлэл, элдэв холбоод байхад Төрийн албаны зөвлөл өмнүүр нь орж ажлыг нь хийх хэрэггүй л байлтай. Цөөхөн алба хаагчтай Төрийн албаны зөвлөлийн хийх ажил толгойтой үснээс их байхад бусдын ажлыг булааж хийх нь хэр оновчтой бол.

Тус байгууллага төрийн албыг мэргэшсэн, тогтвортой, чадварлаг боловсон хүчнээр дүүргэх үндсэн үүрэгтэй. Энэ үүргээ хэрэгжүүлэхийн тулд шалгалт, сонгон шалгаруулалт зохион байгуулах гол ажилтай. Төрийн албыг шахааны хүмүүсээс цэвэрлэх үүрэг бас тэднийх. Гэтэл энэхүү ажил, үүргээ орхиж томилогдсон дарга нарыг адислах ажлыг л хийж явна. Түр орлон гүйцэтгэгч нэрээр томилогдсон агентлаг, яамны газрын даргаас авахуулаад хэлтэс, нэгжүүдэд томилогдсон албан тушаалтнуудын хэн нь ч Төрийн албаны зөвлөлөөс зохион байгуулсан сонгон шалгаруулалтад унаагүй тэнцсэн.

Заавал унах ёстой биш л дээ. Гэхдээ нэг албан тушаалд гурван хүн өрсөлдөхөд нэг нь нэрээ татаж, хоёр дахь нь тухайн албан тушаалд тэнцэхгүй ажлын туршлага, бичиг баримттай байсан гэхэд болно. Яг ийм дарааллаар Төрийн албаны зөвлөлөөс зохион байгуулсан сонгон шалгаруулалтад нэгээр тэнцэж, албан тушаалдаа жинхэлсэн дарга зөндөө. Тус байгууллагын зүгээс энэ бүхэнд “Бид сонгон шалгаруулалтад хамгийн өндөр оноо авсан хүний нэрийг л томилох эрх бүхий албан тушаалтанд мэдүүлсэн” гэснээс өөр тайлбар хийгээгүй.

Одоо ч тэдний зохион байгуулдаг “хулхи” шалгаруулалтад ороогүй дарга өчнөөн бий. Захаас нь хэлэхэд, Татварын ерөнхий газрын дарга Т.Батмагнай, ИНЕГ-ын дарга Т.Лхагвасүрэн, Хөдөлмөрийн яамны Төрийн нарийн бичгийн дарга П.Гантулга нараас авахуулаад Говь-Алтай, Булган аймгийн Засаг даргын Тамгын газрын дарга нар, Булган, Архангай аймгийн ИТХ-ын нарийн бичгийн дарга нар сонгон шалгаруулалтгүй томилогдон ажлаа хийсээр байна.

Шууд жинхэлсэн, төрийн албанд хаалгаар нь биш тооноор нь орсон ийм нөхдүүдээс шалгалт аваагүй байж Цагдаагийн ерөнхий газрын даргын асуудал дээр оролцох нь хэр зүйтэй бол. Магадгүй, Төрийн албаны зөвлөлд буруу байхгүй байж болох. Улстөрчид тус байгууллагыг татан буулгана хэмээн айлгацгааж, араас нь өөрсдийн хүмүүсийг шалгаруул хэмээн дарамталсан байж мэдэх юм. Тэглээ гээд өөрсдийн өмнө овоолоостой ажлаа хийлгүй өөр тийш хальтрах шалтгаан байсан ч юм уу.

Ажиглаад байхад Д.Зүмбэрэллхамыг Төрийн албаны зөвлөлийн дарга байхад тус байгууллага арай ч ийм байгаагүй ээ. МХЕГ, тухайн үеийн БСШУЯ-ныхантай хамтран хуурамч дипломтонгуудыг төрийн албанаас илрүүлж, нэг ёсондоо төрийн албанд их цэвэрлэгээг эхлүүлж байв. Бас тус байгууллагын референтүүд сонгон шалгаруулалтад оролцолгүй томилогдсон албан тушаалтнуудыг олон нийтэд ил тодоор зарладаг байв.

Яам, агентлаг, газрын дарга нарын зүгээс тухайн үед дарамт ирдэг байсан ч хэнээс ч айлгүй хуулиа бариад ярилцлага өгчихдөг, тайлбараа тавьчихдаг зориг зүрх референтүүдэд нь байсан. Харин одоо энэ бүхэн үгүй болсон бололтой. Өөрсдөөс нь адис хүртчихсэн, эсвэл адис хүртэхээр ажиллаж байгаа албан тушаалтнуудын талаар тайлбар өгөх хүн даанч алга. Бүгд л дарга мэднэ, даргаас зөвшөөрөл авна, мэдээлэл өгөх боломжгүй гэцгээж байна. Бодвол Д.Зүмбэрэллхам шиг найдвартай хамгаалалт болох удирдагч Төрийн албаны зөвлөлд байхгүй байгаа бололтой.

Өөр зүйл нэмж хэлэхэд, Төрийн албаны зөвлөлийн одоогийн удирдлагууд тус газрын өмнө нь хийж байсан ажлыг үргэлжлүүлэх сонирхолгүй байж мэдэх юм. Юу гэвэл, УИХ-д хоёр жилийн өмнө өргөн барьсан “Төрийн албаны удирдах албан тушаалд тавигдах тусгай шаардлага батлах тухай журам”-ын сураг одоо ч таг байна. Хэрвээ энэхүү журмыг баталбал Сангийг яаманд монгол хэлний багш, Уул уурхайн яаманд эмч мэргэжилтэй хүн газрын дарга хийхгүй байв. Ерөөсөө л яамны Төрийн нарийн бичгийн дарга, газрын дарга, агентлагийн дарга ийм мэргэжилтэй, туршлагатай, боловсролтой хүн байх ёстой гэсэн нэгдсэн шаардлага, стандарт дээрх журмаар тавигдах байв.

Хэрвээ Д.Зүмбэрэллхамыг Элчин сайдаар томилж гадаад явуулаагүй бол дээрх журмыг баталчихсан ч байж магадгүй байв. Гэтэл одоо Б.Цогоо даргаас авахуулаад энэхүү журмыг дурсч байгаа хүн алга. Үүнээс болж яамдууд эхлээд хүнээ томилчихоод араас нь тэр хүндээ зориулсан ажлын байрны шаардлага тавьж, тэр шаардлагынх нь дагуу Төрийн албаны зөвлөл сонгон шалгаруулалт явуулж байна. Олон жил яригдсан энэхүү хууль бус сонгон шалгаруулалтыг зогсоох журмыг Төрийн албаны зөвлөл өөрөө УИХ-аар шаардаж, батлуулахгүй юм бол өөр хэн хийх вэ. Тэдэнд бригадын генерал Б.Билэгтийг чөлөөлсөн шалтгаанаас илүү төрийн албыг төрлийн, намын, танил талын ялзралаас цэвэрлэх шалтгаан хэрэгтэй. Овоорсон их ажил өмнө нь байхад юун Үйлдвэрчний эвлэлийг төлөөлж Б.Билэгтийг өмөөрөх вэ.

Эх сурвалж: Сэтгүүлч Г.Улсболд

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.