Иргэд ирэх оны нэгдүгээр сарын 1-нээс харилцан визгүй зорчино

Twitter Print
2014 оны 09-р сар 04-нд 18:28 цагт
Мэдээний зураг,

Халхын голын байлдааны ялалтын 75 жилийн ойн хүрээнд, Монгол Улсын Ерөнхийлөгч Цахиагийн Элбэгдоржийн урилгаар ОХУ-ын Ерөнхийлөгч В.В.Путин Монгол Улсад ажлын айлчлал хийлээ. Айлчлал амжилттай, үр дүнтэй болж, хоёр орны Засгийн газар, яам, албаны байгууллага, хамтарсан аж ахуйн нэгжүүдийн хооронд 15 хэлэлцээр, протокол, санамж бичиг, хамтарсан баримт бичигт гарын үсэг зурав. Хоёр орны ерөнхийлөгч ганцаарчилсан уулзалт, өргөтгөсөн хэлэлцээ хийж, аль аль талын сонирхсон асуудлаар нөхөрсөг, нээлттэй санал солилцож, чухал шийдвэрүүдэд хүрсэн юм.

Айлчлалын хүрээнд Орос, Монгол хоёр орны иргэд ирэх жилийн нэгдүгээр сарын 1-ээс эхлэн харилцан визгүй зорчих юм байна. Энэ гэрээг байгуулснаар хоёр орны харилцаанд түүхэн том үйл явдал боллоо гэж талууд дүгнэж байна.

Хоёр орны иргэд харилцан визгүй зорчих асуудлыг манай талаас төдийлөн ойшоохгүй байсан талаар ОХУ-аас манай улсад суугаа Онц бөгөөд бүрэн эрхт Элчин сайд И.К.Азизов өгүүлсэн. Түүний хэлснээр, ОХУ болон Монгол Улсад 1990-ээд оны хүнд үетэй харьцуулахад их зүйл өөрчлөгджээ. Өнөөдрийн байдлаар ОХУ-д жилд давхардсан тоогоор 600 мянган Монголын иргэн, Оросоос Монгол руу жилд 100 мянга гаруй иргэн зорчдог мэдээлэл бий. Харилцан визгүй зорчих болсноор зорчигчдын тоо огцом нэмэгдэх нь дамжиггүй юм.

ОХУ-ын ерөнхийлөгчийн айлчлалын хүрээнд байгуулсан энэхүү гэрээний дагуу зөвхөн аялал жуулчлал гэлтгүй бүх салбарын бизнес, хүмүүнлэг, соёл, шинжлэх ухаан, боловсрол, спорт зэрэг олон талын харилцаа эрс идэвхжих билээ. Иймд Ерөнхийлөгч Ц.Элбэгдоржийн хэлсэнчлэн, иргэддээ хил гаалийн үйлчилгээг түргэн  шуурхай, чирэгдэлгүй үзүүлж, хоёр талын боомт гарцыг шинэчилж, заримынх статусыг олон улсын зэрэглэлд хүргэх талаар ажиллах хэрэгтэй.

-“ЭРДЭНЭТ”, “УЛААНБААТАР ТӨМӨР ЗАМ”-ЫН ТЕХНИК ТЕХНОЛОГИЙГ ШИНЭЧЛЭХЭЭР БОЛЛОО-

Монголд Оросын болон Орос-Монголын хамтарсан нийт 425 компани бүртгэлтэй байдаг ч 60 нь л тодорхой үйл ажиллагаа явуулдаг байна. Айлчлалын хүрээнд уулын баяжуулах “Эрдэнэт” үйлдвэр, “Улаанбаатар төмөр зам” хувь нийлүүлсэн нийгэмлэгийг техник технологийн шинэчлэлийн асуудлыг шийдвэрлэсэн. Тодруулбал, УБТЗ-ын шинэчлэл, хөгжлийн стратегийн түншлэлийн хэлэлцээр байгуулагдаж, төмөр замын салбарын шинэчлэл, бүтээн байгуулалт, тээвэрлэлтийг нэмэгдлүүлэх зэрэг хамтын ажиллагааны гол зарчмуудыг тохирсон байна. Монголын төмөр замыг цахилгаанжуулах, хос болгох ажлыг цаг алдалгүй эхлүүлж, энэ ажлыг 2020 он гэхэд дуусгахаар тохиролцжээ. Мөн төмөр замаар ачаа дамжуулан тээвэрлэх нөхцлийн тухай Монгол Улс, ОХУ-ын Засгийн газар хоорондын болон Монгол Улс, ОХУ, БНХАУ-ын Засгийн газрын хооронд төмөр замын дамжин өнгөрөх тээврийн хэлэлцээрийг ойрын үед байгуулах юм байна.

-ОХУ-ЫН БАРИЛГЫН ТЕХНОЛОГИД СУУРИЛЖ ХАМТРАН АЖИЛЛАНА-

Барилга, хот байгуулалтын сайд Ц.Баярсайхан ОХУ-ын  Барилга, орон сууц-нийтийн аж ахуйн сайд Михайл Александрович Мень нар харилцан ойлголцлын санамж бичгийг байгууллаа. Санамж бичиг дагуу барилгын салбарын норматив баримт бичгийг евро стандартын жишигт нийцүүлэн боловсронгуй болгож буй ОХУ-ын туршлагаас суралцах, Монгол Улсад нутагшуулах, барилгын зураг төсөл боловсруулах, эрдэм шинжилгээ, оюутан мэргэжилтэн солилцох, орон сууцны барилгын хамтарсан төсөл хэрэгжүүлэх зэрэг чиглэлээр хамтран ажиллах юм.

Улаанбаатар хотын 1, 3, 4 дүгээр хороолол, Сансар орон сууцны хорооллууд болон бусад олон үйлдвэр, үйлчилгээ, соёл, боловсролын барилгуудыг СОТ-1, СОТ-2, СОТ-3 зэрэг  барилгуудыг хуучин ЗХУ-ын барилга, барилгын хийцийн үйлдвэрлэл, машин механизм, техникийн баазуудын хүчээр бүтээн байгуулсан билээ. Тиймээс цаашид энэ ажлыг эрчимжүүлж, ОХУ-ын барилгын технологид суурилж хамтран ажиллахаар боллоо.

-“РОСНЕФТЬ” МОНГОЛЫН ЗАХ ЗЭЭЛД ХҮРЭЭГЭЭ ТЭЛЭХ СОНИРХОЛТОЙ БАЙНА-

В.Путины айлчлалын үеэр Иргэний нисэхийн салбарт хамтран ажиллах тухай протокол, мөн нислэгийн маршрутын сүлжээг хөтлөх тухай "Аэрофлот"-той санамж бичгийг байгуулсан. Орос улс уламжлал ёсоор Монгол улсад цахилгаан эрчим хүчийг найдвартай нийлүүлж, хэрэглээний долоон хувийг хангадаг. Үүгээрээ Монгол улсын эрчим хүчний аюулгүй байдлыг хангахад чухал үүрэг гүйцэтгэж байна. Дэлхийн тавцанд голлох үүрэг гүйцэтгэдэг “Роснефть” компани Монголын зах зээлд өөрийн оролцоог нэмэгдүүлэх төлөвлөгөөтэй байгаа талаар ОХУ-ын ерөнхийлөгч В.Путин дуулгалаа.  

Одоогоос зургаан жилийн өмнө манай улсын зах зээлд жижиглэнгийн худалдаа хийх хүсэлтийг “Роснефть” компаниас тавьж байсан. Тус компани манай улсын жижиглэнгийн зах зээлд нэвтэрч, 100 шатахуун түгээх станц барих талаар захидлыг "Роснефть"-ийн гүйцэтгэх захирал Э.Ю.Худайнатов Монгол Улсын Ерөнхийлөгч Ц.Элбэгдоржид хаяглаж байсан билээ. Тухайн үед Ерөнхий сайдын албыг хашиж байсан С.Баяр УИХ-ын чуулганд энэ саналыг барьж орж байсан юм. Өчигдөр ОХУ-ын Ерөнхийлөгч В.Путин “Монголын зах зээл дэх хүрээгээ тэлэх сонирхолтой байгаа" талаар дахин хэллээ.

-2020 ОН ГЭХЭД ХУДАЛДААНЫ ЭРГЭЛТИЙГ 10 ТЭРБУМ АМ.ДОЛЛАРТ ХҮРГЭХЭЭР ЯРИЛЦЖЭЭ-

Хоёр орны худалдааны тэнцвэрт харьцаа хэт зөрүүтэй байгаа. Тиймээс хоёр улсын худалдааны нөхцлийг нэн тааламжтай болгож, 2020 он гэхэд худалдааны эргэлтийг 10 тэрбум ам.долларт хүргэхээр ярилцжээ. Мөн Монголд үйлдвэрлэсэн барааг ОХУ-ын зах зээлд 20 жилийн хугацаатай татвар, гаалийн хураамжгүйгээр, хэмжээ харгалзахгүй нийлүүлж байх гэрээ хэлэлцээрийг ойрын үед эхлүүлэх саналыг манай талаас илэрхийлсэн байна. Мөн хоёр тал хамтарч тодорхой чиглэлээр сургууль, сургалтын төв байгуулах, урлаг соёл, спорт, хэвлэл мэдээллийн байгууллагын харилцаа, хамтын ажиллагааг өргөжүүлэхээр тохиролцлоо.

Цаашид цаг алдалгүй байгуулах гэрээ хэлэлцээр, баримт бичгийн болон харилцааны асуудлаар тодорхой санал хоёр талдаа гаргаж ойрын үед болох айлчлал, арга хэмжээний үеэр шийдвэрлэхээр тохиролцсон байна.

-ХОЁР ТАЛЫН ҮНДЭСНИЙ МӨНГӨН ТЭМДЭГТЭЭР ГҮЙЛГЭЭ ХИЙХ АНХНЫ ТОХИРООГ ХИЙВ-

ОХУ-ын Хөгжлийн банк болон Монгол Улсын Хөгжлийн банк хооронд “Үүргийн бичиг” байгууллаа. Энэхүү үүргийн бичгийг Оросын талыг төлөөлж тус улсын Хөгжлийн банкны гүйцэтгэх захирал, төлөөлөн удирдах зөвлөлийн гишүүн Сергей Лыков, Монгол Улсын Хөгжлийн банкны гүйцэтгэх захирал Б.Мөнхбат нар баталгаажуулсан байна. “Үүргийн бичиг”-ийн дагуу банкууд хоорондоо ахисан түвшинд хамтран ажиллах, хоёр орны худалдааны төслүүдийг санхүүжүүлэх, тодорхой бараа бүтээгдэхүүний чиглэлээр худалдаа явуулахдаа хоёр талын үндэсний мөнгөн тэмдэгтээр гүйлгээ хийхийг анхны байдлаар тохиролцов. Мөн “ТЭЦ 4”-ийн өргөтгөлд зориулан 74 орчим сая ам.долларыг ОХУ-ын Хөгжлийн банкнаас зах зээлийн боломжийн хүүтэйгээр санхүүжүүлэхээр боллоо.

Эх сурвалж: Medee.mn

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.