Японы шинэ Засгийн газар 5 эмэгтэй сайдтай болсон нь дэлхийд шуугиан дэгдээж байна

Twitter Print
2014 оны 09-р сар 03-нд 19:28 цагт
Мэдээний зураг,

Өнөө өглөө /09.03/ Ерөнхий сайд Шинзо Абэгийн шаардлагаар Японы Засгийн газрын танхим бүрэн бүрэлдэхүүнээрээ огцорсон. Харин үдээс хойш шинэ баг ажлаа хүлээн авсан тухай дэлхийн хэвлэлүүд мэдээллэж байна. Японы Засгийн газар байсхийгээд огцордог нь ердийн үзэгдэл боловч энэ удаад Ерөнхий сайд кабинетдаа 5 эмэгтэй сайдтай болсон нь дэлхийн рекорд тогтоож, хэвлэл мэдээллийнхний анхаарлыг татаад байна. 

Засгийн газар одоогоор 10 сайдаа томилоод байгаа бөгөөд  шинэчлэгдсэн Засгийн газарт таван эмэгтэй сайд орж ирсэн нь эмэгтэйчүүдийн улс төр, эдийн засгийн амьдрал дахь үүрэг, оролцоог нэмэгдүүлэх гэсэн Абэгийн өөрийнх нь санаачлага юм.

Ерөнхий сайд Шинзо Абэ 2020 он гэхэд улс төр дэхь эмэгтэйчүүдийн оролцоог 30%-д хүргэх зорилготой байгаа бөгөөд энэ удаа Засгийн газрын 18 гишүүнийхээ 5-ийг эмэгтэй болгоод байгаа нь энэ юм. Эдгээр 5 эмэгтэйн дотор Японы экс Ерөнхий сайд асан Кейзо Обучигийн охин Юко Обучи Худалдаа, эдийн засгийн сайдаар томилогдсон байна.

Засгийн газрын бүрэлдэхүүнд 5 эмэгтэй багтана гэдэг Японы түүхэнд тун ховор тохиож болох үзэгдэл бөгөөд өнөө өглөө огцорсон Засгийн газарт ердөө 2 эмэгтэй сайд л ажиллаж байжээ. Энэ тухайгаа Ерөнхий сайд Шинзо Абэ тайлбарлахдаа Японы эдийн засгийн өсөлтийн бодлогод эмэгтэйчүүдийн төрөлхийн нягт нямбай чанар, авъяас чадвар их үүрэг гүйцэтгэнэ гэдэгт итгэлтэй байна гэжээ. 

Сангийн сайд Таро Асо, Гадаад хэргийн сайд Фумио Кишида, Боловсрол, спорт, шинжлэх ухаан, технологийн сайд Симомура Хакүбүн, Сайд нарын танхимын ерөнхий нарийн бичгийн дарга Ёшихидэ Шүга, Эдийн засгийг сэргээх сайд Акира Амари нар албан тушаалдаа үлдсэн байна. Батлан хамгаалах яамны сайдаар Акинори Это томилогджээ.

Өнөөдөр огцорсон танхим нь тус улсын Дэлхийн 2-р дайнаас хойших түүхэнд “хамгийн урт насласан" Засгийн газар болж байгаа юм. 2012 оны арванхоёрдугаар сард байгуулагдсанаасаа хойш танхим огт өөрчлөлтгүй ажилласан нь байнга шахуу огцорч, эсвэл гишүүдийн хэн нэгэн нь огцорч, өөрчлөгдөж байдаг Японы Засгийн газрын түүхэнд хамгийн сонин үйл явдал болж байна. Үүн дээр улс төр, нийгэмд эмэгтэйчүүдийн оролцоо тун бага байдаг орны хувьд ийнхүү 5 эмэгтэй Засгийн газрын гишүүнтэй болсон нь дэлхийн хэвлэл мэдээллийнхний анхаарлыг татаад байна. 

2012 оны сүүлчээр Шинзо Абэ Засгийн эрхэнд гарснаас хойш дэлхийд АНУ, Хятадын дараа 3-рт орох том эдийн засагтай Япон улсын эдийн засагт нааштай өөрчлөлтүүд ихээр гарч, хувьцааны үнэ нэмэгдэж, пүүс компаниудад ажиллагсадын цалин хөлс хангалттай өндөр түвшинд хүрчээ.

Харин эрчүүдийн оролцоотойгоор олон зуун жил шийдэгдэж ирсэн улс төр, эдийн засгийн томоохон асуудлуудад ийнхүү эмэгтэйчүүд өндөр хувьтайгаар оролцох болсон нь зарим хүмүүсийн эгдүү дургүйг ихээр хүргэж байгаа ч эмэгтэйчүүдийн тэгш эрхийн хувиар Японы түүхэнд урд гарч байгаагүй эерэг үзэгдэл, жендэрийн тэгш байдлын төлөөх эмэгтэйчүүдийн ялалт гэж олон улсад үзэж байна. Японы Парламентийн Доод танхимын 480 гишүүний дөнгөж 39 нь эмэгтэйчүүд юм. Өнгөрсөн жил Женевт байрладаг Дэлхийн Эдийн засгийн Форумын гаргасан судалгаагаар улс төр, эдийн засгийн байдал дахь эмэгтэйчүүдийн оролцоогоор Япон улс дэлхийд 105-д жагссан юм. Исланд улс энэ үзүүлэлтээр дэлхийд 1-рт, Скандинавын орнууд 2-рт, Герман улс 14-т, АНУ 23-т жагсчээ.

Мөн АНУ-ын Ерөнхийлөгч Барак Обама сайд нарынхаа танхимд ердөө 3-хан эмэгтэйтэй бол Франц улсад харин эсрэгээрээ Засгийн газрын гишүүдийн 50 хувийг эмэгтэйчүүд бүрдүүлдэг байна. Японы томоохон пүүс, компаниудын удирдах зөвлөлийн гишүүдийн 3.9% нь эмэгтэйчүүд байдаг бол АНУ-д 12%, Франц улсад 18% байдаг гэж Дэлхийн Эдийн засгийн хамтын ажиллагаа, хөгжлийн байгууллагаас гаргасан судалгаанд дурдагджээ. 

Ийнхүү түүхэнд шинэ эргэлт хийж Засгийн газартаа 5 эмэгтэй сайдтай болсноор Ерөнхий сайд Шинзо Абэ Японы дараагийн Засгийн газрын гишүүн болохоор ээлжээ хүлээж байсан өөрийн намын хүчирхэг эрчүүдийн найдварыг таслаж, тэвчээрийг барж, уур бухимдлыг нь дээд цэгт нь хүргэж байна. Энэ нь Шинзо Абэгийн эсрэг хөдлөх хангалттай хүчийг бий болгох төдийгүй түүний нэр хүнд болоод нам доторхи байр суурь ганхахад нөлөөлнө гэж зарим ажиглагчид үзэж байна.

Ийнхүү шуугиан дэгдээн сайд болсон 5 эмэгтэйн дунд хуучин Худалдаа, эдийн засгийн сайдаар ажиллаж байсан Мидори Мацушима Хууль зүйн сайдаар, мөн урд нь Худалдаа, эдийн засгийн сайдаар ажиллаж байсан Санаи Такайчи Дотоод хэрэг, харилцаа холбооны сайдаар, Хойд Солонгост олзлогдсон Япон иргэдийн талаар идэвхтэй үйл ажиллагаа явуулдаг Эрико Яманти Хойд Солонгост олзлогдсон Япончуудын асуудал эрхэлсэн сайдаар, Эмэгтэйчүүдийн асуудал эрхэлсэн сайдаар Харуко Аримура нар тус тус томилогдсон байна. Эдгээр 5 эмэгтэй сайд бүгд хууль тогтоох дээд байгууллагын гишүүд юм байна. 

 

Сэтгүүлч Ц.Мөнхбаяр

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.