Хойд Солонгос коронавирусын цар тахлыг ялан дийлснээ зарлав

Twitter Print
2022 оны 08-р сар 11-нд 11:52 цагт
Мэдээний зураг,

Хойд Солонгос коронавирусын цар тахлыг ялан дийлснээ зарлав

Хойд Солонгосын удирдагч Ким Жон Унөп өнгөрсөн 5-р сард тогтоосон цар тахлын эсрэг арга хэмжээнүүдийнхээ дийлэнхийг цуцалж, Хойд Солонгос улс коронавирусын цар тахлыг эсрэг тэмцэлд ялалт байгуулсныг тунхаглажээ. 

Хойд Солонгосын эрх баригчдын мэдээлснээр тус улсад өнгөрсөн 7-р сарын 29-нөөс хойш коронавирусын халдварын тохиолдол бүртгэгдээгүй аж. Нөгөө талаас Пхеньян цар тахал дэгдсэнээс хойш улсад нь бүртгэгдсэн  коронавирусын халдварын нийт тохиолдлын тоог одоог хүртэл нууцалж байгааг олон улсын хүмүүнлэгийн байгууллагууд иргэдээс коронавирусын шинжилгээ хангалттай авч чадаагүй гэдэгтэй холбон тайлбарлаж байна. 

Дэлхийн эрүүл мэндийн хямрал эцэс болох хүртэл Хойд Солонгос улс цар тахлын эсрэг хамгаалалтаа сулруулалгүй, цар тахлын эсрэг ажлуудаа идэвхжүүлсэн хэвээр байх хэрэгтэй хэмээн Ким Жон Ун онцолжээ. 

Шинжээчид Хойд Солонгосын эрх баригчид цар тахлыг ашиглан иргэдийг хянах хяналтаа улам чангатгасан ба цар тахлыг ялан дийлснээ зарласан нь цар тахлын улмаас урт хугацаанаар хилээ хааснаас болж их хэмжээний хүндрэл бэрхшээлтэй тулаад буй худалдааны салбараа сэргээх гэсэн оролдлого гэж үзэж байна. 

Хойд Солонгосын төрийн өмчит KCNA агентлагийн мэдээлснээр тус улсад коронавирусын халдварын улмаас 74 хүн нас барсан нь бусад улс орнуудиай харьцуулахад маш бага үзүүлэлт юм. 

Коронавирусын халдварын батлагдсан тохиолдлын тооны оронд Хойд Солонгос коронавирусын шинж тэмдэг тэр дундаа халуурах шинж тэмдэг илэрсэн тохиолдлуудыг зарлаж байсан ба өнгөрсөн 5-р сарын 15-нд л гэхэд нэг өдөрт бүртгэгдсэн коронавирусын шинж тэмдэг бүхий тохиолдлын тоо 392 920 хүрсэн юм. 

ДЭМБ Хойд Солонгос улсын цар тахлын тухай бие даасан эх сурвалжийн мэдээлэл байхгүйг онцолж, тус улс коронавирусын цар тахлыг ялан дийлсэн гэсэн мэдээнд эргэлзэж буйгаа илэрхийлээд байна. ДЭМБ-д ирсэн мэдээллээр өнгөрсөн сард Хойд Солонгост цар тахлын нөхцөл байдал улам хүндэрсэн гэжээ. 

Пхеньяны хувьд хүн амынхаа дунд коронавирусын эсрэг ямар ч вакцин нэвтрүүлээгүй бөгөөд оронд нь хөл хорио тогтоож, иргэдэд ургамлын гаралтай эм тан уухыг зөвлөж, Ким Жон Уны тодорхойлсноор "Солонгосын социалист системийн давуу талууд" - ын ачаал цар тахлыг даван туулжээ. 

Пхеньян улс даяар эрүүл мэндийн үзлэг шинжилгээ хийж, өдөр тутамдаа хилийн зурвас орчим байрлах уснаас сорьц авч PCR шинжилгээ хийж байгаа, мөн коронавирус болон уг вирусын хувилбарууд, сармагчингийн цэцэг өвчний вирус илрүүлэх шинэ арга боловсруулж байгаа гэжээ. 

Ким Жон Уны эгч Ким Ё Жоны хэлснээр Хойд Солонгосын удирдагч Ким Жон Унд мөн ялгаагүй коронавирусын шинж тэмдэг илэрсэн ба коронавирусын цар тахал тархахад өмнөд солонгосчуудын  илгээсэн ухуулгын хуудаснууд нөлөөлсөн гэжээ. 

Тэрээр Ким Жон Уны тухай, "Өөрөө өндөр халуурч, хүндээр өвдсөн ч цар тахалд нэрвэгдсэн ард иргэдээ бодсоор нэг хором ч хэвтэж чадаагүй." хэмээн ярьжээ.

Эх сурвалж: BBC

Содномцэрэнгийн Энхзаяа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.