Украины зүүн өмнөд хязгаарт Украины зэвсэгт хүчнийхэн Мариуполь боомт хотыг ОХУ-ын зэвсэгт хүчнийхэнд эзлэгдэхээс сэргийлж, эсэргүүцэл үзүүлсээр байна.
Украины зэвсэгт хүчний удирдлагууд Азовсталь төмөрлөгийн үйлдвэр дэх нөхцөл байдал хүнд байгааг онцолж, оросууд хэдэн зуун энгийн иргэд болон Украины цэргүүд байрлаж байгаа тус үйлдвэрийг тасралтгүй бөмбөгдөж байгаа хэмээн мэдэгджээ.
Өнгөрсөн лхагва гарагт Мариуполь хотын дарга иргэдийг хотоос нүүлгэн шилжүүлэхийг оролдсон ч Украины зэвсэгт хүчнийхэн гарцыг аюулгүй болгож чадаагүйгээс нүүлгэн шилжүүлэлтийг энэ пүрэв гарагт үргэлжлүүлэхээр болжээ.
Украины Ерөнхийлөгч Владимир Зеленский, "Бидэнд ирсэн мэдээллээр бүслэгдсэн Мариуполь хотод ойролцоогоор 120 мянган хүн гацаад байна. Мариуполь хотод ОХУ-ын зэвсэгт хүчнийхний үйлдэж буй гэмт хэргүүд нь Бородянкад үйлдсэн хэргүүдээс нь илүү аймшигтай, илүү өргөн хүрээг хамарсан нь тодорхой болоод байна." хэмээн мэдэгджээ.
Түүний хэлж байгаагаар Украины армид Мариуполь хотыг эзлэхийг оролдож байгаа Оросын цэргүүдийг ялахад хангалттай зэр зэвсэг байхгүй байгаа аж. Тэрээр Мариуполь хотод болж буй тулааныг зогсоох 2 арга зам байгааг дурдаж, үүнд Украины армид хүчирхэг зэр зэвсэг нь байвал оросуудын дайралтыг зогсооно, нөгөөх нь дипломат харилцааны арга зам бөгөөд оросууд одоогийн байдлаар асуудлыг дипломат харилцаагаар шийдэхийг хүсэхгүй байгаа гэжээ.
Өнгөрсөн лхагва гарагт Вашингтон ОХУ-ын эсрэг тогтоосон ээлжит хориг арга хэмжээгээ танилцуулжээ. Хориг арга хэмжээнд ОХУ-ын Төв банкны албан тушаалтнууд, ОХУ-ын олигарх Константин Малофеевтэй холбоотой Транскапиталбанк, мөн криптовалютын олборлолтоороо дэлхийд 3-т ордог Оросын Bitriver AG холдинг зэрэг багтжээ.
"Их-20"-ийн гишүүн орнуудын Сангийн сайд нарын уулзалтын үеэр ОХУ-ын төлөөлөгч үг хэлэх үеэр АНУ, Канад зэрэг улс орнуудын сайд, төлөөлөгч нар танхимаас гарч явж, эсэргүүцлээ илэрхийлжээ. ХБНГУ энэ оны сүүл гэхэд ОХУ-аас газрын тос импортлохоо зогсооно хэмээн мэдэгдээд байна.
Тус улсын Гадаад харилцааны сайд Анналина Бэрбок, "ХБНГУ Оросоос эрчим хүч импортлохоо бүрэн зогсооно. Газрын тосны импорт энэ зун гэхэд 50 хувиар буурч, энэ оны сүүл гэхэд бүр мөсөн зогсоно." хэмээн мэдэгдсэн байна.
Украины Луганск мужийн зэвсэгт хүчний тэргүүн Сергей Гайдайн мэдээлснээр Луганск мужийн нутаг дэвсгэрийн 80 хувь нь ОХУ-ын хяналтанд орсон ба Украины зэвсэгт хүчнийхэн хангалттай эсэргүүцэл үзүүлж чадахгүй бол оросууд зогсолтгүй давшсаар байх болно хэмээн анхааруулжээ.
Эх сурвалж: CNN
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
