ЦЕГ-ын шинэ дарга С.Баатаржав анхны тушаалаараа Х.Тэмүүжингийн эсрэг хөдөлсөн хурандаа нарыг шалгах үүрэг өглөө

Twitter Print
2014 оны 09-р сар 01-нд 11:37 цагт
Мэдээний зураг,

ЦЕГ-ын шинэхэн дарга тэргүүн комиссар С.Баатаржав анхныхаа тушаалыг гаргалаа. Өнгөрсөн пүрэв гаригт Засгийн газрын хуралдаанаар томилогдож, баасан гаригт тэргүүн комиссар цол авсан С.Баатаржав ЦЕГ-ын Дотоод хяналт шалгалт, аюулгүй байдлын газрыг хуралдуулав. Ингэхдээ Хууль зүйн сайд Х.Тэмүүжингийн эсрэг хөдөлсөн гэх хурандаа болон зарим газар хэлтсийн дарга нарыг шалгах асуудлыг ярилцсан байна. Улмаар Дотоод хяналт шалгалт, аюулгүй байдлын газрын Аюулгүй байдлын хэлтэст хурандаа нарыг шалгах үүрэг даалгавар өгчээ. Ингэснээр Эрүүгийн цагдаагийн газрын дарга Н.Ууганбаяр, дэд дарга Н.Ариунболд, УМБГ-ын дарга Ц.Батсүх, Зохион байгуулалттай гэмт хэрэгтэй тэмцэх газрын дарга Н.Аадарсүх нарыг шалгаж эхэлсэн гэж эх сурвалж мэдээллээ.  

Эдгээр хурандаа нар нь Хууль зүйн сайд Х.Тэмүүжинг сайдын суудлаас унагахын тулд хар тамхины хэргээр ял сонсоод буй Г.Сарангэрэлийг Хууль зүйн сайдтай холбоотой, дотно харьцаатай байсан гэж хэвлэл мэдээллийн хэрэгслээр яриулсан гэдэг. Тодруулбал, хурандаа нар Г.Сарангэрэлийн өмгөөлөгч Г.Батбаяр луу залган, Г.Сарангэрэлийг Хууль зүйн сайд Х.Тэмүүжинтэй холбоотой байсан, Х.Тэмүүжин гаж секс хүсдэг байсан гэхчлэн яриулахыг Г.Батбаяраас шаардсан байдаг. Гэвч өмгөөлөгч Г.Батбаяр хурандаа нарын тавьсан шаардлагыг эсэргүүцэж, хурандаа нарын ярианы бичлэгийг олон нийтийн хэрэгслээр цацаж байсан юм. Түүнчлэн өмгөөлөгч Г.Батбаяр хурандаа нарыг шалгуулах хүсэлтийг АТГ болон Дүүргийн нэгдүгээр прокурорын газарт гаргасан ч АТГ-ын байцаагч Н.Баасанням эрүүгийн хэрэг үүсгэхээс татгалзах хүсэлтийг Дүүргийн нэгдүгээр прокуроын газарт хүргүүлж, тус прокуроын газраас Н.Баасаннямыг саналыг дэмжиж, хурандаа нарт эрүүгийн хэрэг үүсгэхээс татгалзсан байдаг. 

Харин ЦЕГ-ын дарга Б.Билэгт үүрэгт ажлаасаа чөлөөлөгдөж, С.Баатаржавыг томилсноор хурандаа нар ийнхүү шалгагдаж эхэлж байна. ЦЕГ-ын даргыг Хууль зүйн сайд санал болгосноор Засгийн газрын хуралдаанаар томилдог. Тэгэхлээр ЦЕГ-ын шинэ дарга С.Баатаржавыг Хууль зүйн сайд Х.Тэмүүжингийн “хүн” гэж хүмүүс харж байна. Тиймдээ ч С.Баатаржав нь томилогдсон даруйдаа гаргасан анхны тушаал Х.Тэмүүжингийн  эсрэг хөдөлсөн хурандаа нар луу чиглэгдлээ.

Гэвч хурандаа нарыг шалгах ажил хэр урагштай байх эсэх нь эргэлзээтэй гэж баттай эх сурвалж мэдээлж байна. Учир нь хурандаа нарыг шалгах үүрэг даалгавар авсан Аюулгүй байдлын хэлтсийн ихэнх байцаагч нар эрүүгийн цагдаад ажиллаж байсан алба хаагчид байдаг гэж байна. Тиймээс нэгэн цагт удирдуулж явсан дарга нараа үнэн зөв шалгах уу гэдэгт эргэлзэх хүмүүс олон байна. Хэрвээ Прокурорын дэргэх Мөрдөн байцаах алба татан буугдаагүй байсан бол хууль хяналтын алба хаагчидтай холбоотой хэрэг үнэн зөвөөр шийдэгдэх магадлал өндөр гэж хуульчид ярьдаг. Прокурорын дэргэдэх мөрдөн байцаах алба татан буугдсанаар цагдаа цагдаагаа шалгах утгагүй тогтолцоо гарсан гэж хуульчид үздэг юм. 

Үүнээс гадна шалгагдаж эхэлсэн хурандаа нар улс төрчидтэй амралтын өдрүүдэд уулзалдаж эхэлсэн гэж өөр нэгэн эх сурвалж мэдээллээ. Ингэснээр хүчний байгууллага дунд бие биеэ шалгах шинэ ажиллагаа эхэллээ. 

Шалгалтын ажил үргэлжилж, хурандаа нарын Хууль зүйн сайд Х.Тэмүүжингийн эсрэг хөдөлсөн гэх үйлдлүүд эрүүгийн шинжтэй бол эрүүгийн хэрэг үүсгүүлэх саналаа прокурорын байгууллагад хүргүүлнэ. Гэвч прокурорын байгууллага өмнө нь эрүүгийн хэрэг үүсгэхээс татгалзаж байсан. Тэгэхээр энэ удаад ч мөн татгалзсан хариу өгөх магадлал өндөр гэж ажиглагчид мэдээлж байна.  Харин Аюулгүй байдлын хэлтсээс эрүүгийн хэрэг үүсгэх шаардлагагүй ч ашиг сонирхлын зөрчил гаргасан гэж үзвэл Аюулгүй байдлын хэлтсийн байцаагч нарын гаргасан саналыг үндэслэн ажлаас халах, цалингийн хувиар торгох, албан тушаал бууруулах зэрэг цагдаагийн ёс зүйн дүрмийн дагуу арга хэмжээ авагдах юм байна.

 

Б.Чимэг

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.