Омикрон: АНУ түргэвчилсэн шинжилгээний 500 сая оношлуур үнэгүй тараана

Twitter Print
2021 оны 12-р сар 22-нд 11:00 цагт
Мэдээний зураг,

АНУ-ын Ерөнхийлөгч Жо Байден омикрон хувилбарын халдварын тархалттай тэмцэхэд зориулж коронавирус илрүүлэх түргэвчилсэн 500 сая оношлуурыг үнэгүй тараана гэдгээ мэдэгджээ.

Түүнчлэн коронавирусын шинжилгээ авах цэгүүдийг нэмж, АНУ даяар эмнэлгүүдэд зэвсэгт хүчний салбарт ажилладаг эмч, эрүүл мэндийн нийт 1000 ажилчдыг дайчлан ажиллуулна гэжээ. Ерөнхийлөгч Ж. Байдений мэдэгдсэнээр хөл хорио тогтоох шалтгаан одоогоор байхгүй байгаа аж. Тэрээр, "Энэ бол 2020 оны 3-р сар биш. Бид бэлтгэлтэй, илүү их мэдээлэлтэй болсон." хэмээн онцолжээ.

Өнөөдрийн байдлаар АНУ-д шинээр бүртгэгдэж буй коронавирусын халдварын тохиолдлуудын 3/4 нь омикрон хувилбарын халдвар болох нь тогтоогдоод байна. Омикрон хувилбар нь өнгөрсөн сард Өмнөд Африкт анх бүртгэгдсэн ба өнөөдрийн байдлаар дийлэнх улсад тархаад байгаа билээ. АНУ-ын нийт насанд хүрэгчдийн 73 хувь нь коронавирусын эсрэг вакцинд бүрэн хамрагдсан ч вакцинд хамрагдаагүй иргэд эрх баригчдын санааг зовоож байна.

Ерөнхийлөгч Жо Байден америкчуудыг коронавирусын эсрэг вакцинд хамрагдахыг дахин уриалж, вакцин хамрагдаагүй иргэд халдвар авсан тохиолдолд эмнэлэгт хэвтэх эсвэл бүр КОВИД-19 өвчний улмаас үхэх магадлал нь харьцангуй өндөр гэдгийг анхааруулжээ. Жо Байдений мэдэгдсэнээр коронавирусын эсрэг вакцинд бүрэн хамрагдсан, коронавирусын халдвартай иргэнтэй хавьталд ороогүй иргэд Зул сарын баяраа чөлөөтэй тэмдэглэж болох аж.

Цагаан ордноос мэдээлж байгаагаар шинээр хэрэгжүүлэх арга хэмжээнүүд нь вакцинд хамрагдаагүй иргэдийн эрүүл мэндийн салбарт үүсгэх ачааллыг бууруулах зорилготой аж.

Түүнээс гадна Ерөнхийлөгч Жо Байден өмнөх Ерөнхийлөгч Доналд Трампыг коронавирусын эсрэг вакцины нэмэлт тунд хамрагдсан явдлыг сайшаажээ. Коронавирусын оношлуур үнэгүй авах хүсэлтэй иргэд ирэх 1-р сараас авах хүсэлтээ илгээх ёстой ба тухайн оношлуур нь 7-15 ам. долларын үнэтэйгээр зарагддаг аж.

Зул сарын баяраар гэр бүл, ойр дотныхонтойгоо уулзах гэсэн иргэд Вашингтон, Нью Йорк зэрэг Америкийн томоохон хотуудад коронавирус илрүүлэх шинжилгээнд хамрагдах гэж урт дараалалд зогссоор байна.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.