Н.Батсуурь аварга шийдэмгий сайн бөх гэдгээ харцага М.Бадарчтай барилдахдаа харууллаа

Twitter Print
2020 оны 07-р сар 13-нд 10:22 цагт
Мэдээний зураг,

Бөхийн барилдаан сайхан боллоо. Бөхийн барилдаан гоё болно гэдэг наадам сайхан боллоо л гэлцэнэ шүү дээ. Ингээд онцлог бөхчүүдийн талаар өөрийн бодлоо бичсүгэй.

1. Увсын Давст сумын уугуул улсын арслан П.Бүрэнтөгс ес даван түрүүлж улсын аварга гэсэн эрхэм цолыг хүртэв. П.Бүрэнтөгс ноднин зунаас хойш биеэ сойгоод турж бас ч гэж биеийн жин арай хөнгөрчээ. Хэт таргалж ялбийхаас өөрийгөө сэргийлж чадсан төдийгүй бэлтгэлээ тогтмолжуулсан бололтой. Хүч тамир ч сайн байна. Арал чац жин сайтай бяр чадалтай энэ эр үнэндээ өөрөөсөө намхан нэгнийг аагалчихаад гаргахааргүй байна. Хамгийн сүүлд Н.Батсуурьтай барилдахдаа өөрийн чац бярны давуу талыг харуулж чадлаа. Наадмын од багатай харцага О.Хангай л одоохондоо П.Бүрэнтөгсийг тогтооно байх. Бусад бөхчүүд П.Бүрэнтөгсийг тогтооход хэцүү.

Тэрбээр тун хянуур барилдаж байна. Наадамд түрүүлээд найман жилийг өнгөрөөж олон удаа унасан юм чинь хянамгай бас дадлага суухаас ч яах билээ. Хүн нь сүрхий дотоод бодолтой, ахмадууд, хашруудын үг зөвлөлгөөг эргэцүүлж дагадаг болов уу. Хөл авдаг мэх сурсан ш дээ. Нас ч болоогүй 32-той байх аа. Гэхдээ араас түрж буй аралтай бяртай залуус олон байна. Ирэх жил түрүүлнэ гэхүй найдвар бага. Залуус нэг жилийн дотор бяр, мэх барилдааны арга барилын хувьд их өсөж байна.

2. Намсрайжавын Батсуурь аварга Увсын Ховд сум. Багаасаа бөхийн суурь мэдлэгтэй энэ залуу мөн л наадамд түрүүлэх тоогоо нэмэх гэж байнгын бэлтгэлтэй, бяр чадлаа цочмог гаргаж чаддаг, цалгиа бусгаа мэхтэй сайн бөх. Шийдэмгий бодолтой сайн бөх гэдгээ наймын даваанд харцага М.Бадарчтай барилдахдаа харууллаа. Хүч бяр тэнцээд нэлээд хэдэн удаа давхар шуудагдаад яаж ч чадахгүй удлаа. Гэтэл эцсийн удаа үзээд алдъя гэж боджээ. Давхар шуудагдаад, засуулууд “За боллоо” гэж дөнгөж дуугарахтай зэрэгцэн М.Бадарчийн шуудагнаас татаж эргүүлэн хаяж чадлаа.

Тэр үед эцсэн ч гэсэн хамаг хүчээ огцом гаргалаа, Зориг тэвчээр юм даа. М.Бадарч бол унтана гэгчээр гэнэ сэрэггүй байгаад л авахуулж байна. Одоо яана гэх вэ дээ. Тийм мэхээ огцом гаргана гэдэг талаар огт бодоогүй юм чинь. Өөрөө өрсчихөж чадаагүй юм чинь. Аварга Н.Батсуурь 33 настай гурван жил барилдана.

3. Чимэдрэгзэний Санжаадамба Архангайн Хашаат сумых биз дээ. Бэлтгэл тааруухан, шинэ мэх сурсан зүйлгүй, нөгөө л олон жилийн өмнөх хуучин хэвээрээ гулибалзаад л. Наадамд түрүүлье гэж бодоод жилийн дотор ганц шинэ мэх олон давтаад сурч болно оо доо. Тийм юм үгүй. Шинэ мэх сураагүй халхалзаж явтал залуус түрээд, үе тэнгийнхэн чангараад нэг л мэдэхнээ дөрөв давж мөнгө олж чадахаа болино. Нөгөөтэйгүүр бодлого тааруухан. Урьд начин Ц.Одбаярыг амалж олон удаа унагасан л даа.

Чухал барилдааны үед Ц.Одбаяр урьд олон удаа унасан гэж бодоод яалаа гэж атиралдах билээ. Харин ч улам зоригжоод энэ Санжаадамба намайг олон удаа амаллаа, би унасан ч чамтай удаан зууралдаж хүчийг барж ягдаах хуна, эсвэл давна даа чамайг гэж дотроо бодоо шазуураа зууна шүү дээ. Ч.Санжаадамба 35,. Угтаа харьж сулрах болоогүй баймаар юм.

4. Улсын арслан Р.Пүрэвдагва, Ц.Содномдорж нэг талаар бэлтгэл тааруугийх юм болов уу эсвэл залуус түрээд хэмжээ хүрэхгүй болж буй юм болов уу. За даа, би ч түрүүлэхгүй байх гэж бодоод шинэ мэх сурах гэж чармайхаа больдог ч юм болов уу. Ц.Содномдорж бол Ц.Мөнхбаярт яаж ч чадахгүй гоомойдсоор дотуур хутгах гэж оролдоод мордуулаад гэдэгшээ харна билээ дээ. Энэ ёозоороо бол Б.Гончигдамба шиг яаж ийгээд дөрөв л давбал ам авахдаа удаан суудаг болоод явчихаар үедээ очино доо. Р.Пүрэвдагва 35, Содномдорж 34 настай

5. Улсын заан Б.Пүрэвсайхан урьд сэргээштэй холбоотой өнжиж наадам, Өргөөнд барилдаагүй удсаныг бодвол их сайн байна. Заан цолоо баталж үнэн хүчтэй мэхтэй гэдгээ харуулж чадлаа. Бусад бөхчүүдээ бодвол арал чац багатай ч бугалга цээжний бяр хүч сайтай бас шалмаг хөдөлгөөнтэй сайн бөх гэхээс өөр арга алга. Нас 31-тэй, тав зургаан жил барилдах хугацаа байна.

С.Товуудорж

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.