З.Энхболд: Ажаа гэгээнтний буянтай үйлсийг дэмжиж 400 сая төгрөг өгсөн

Twitter Print
2014 оны 08-р сар 28-нд 05:11 цагт
Мэдээний зураг,

2011 онд “Энэрэл нигүүсэл оюун билгийн төв” ТББ-ын тэргүүн Ажиа гэгээн Лувсантүвдэн гуай монголчуудынхаа эрүүл мэндэд буян болох санаачлага гаргаж, ЭМЯ-ны дэмжлэгтэйгээр Эх, хүүхдийн эрүүл мэндийн төвд зориулан Хүүхдийн цусны эмгэг-хавдарын эмнэлэг барих болсон билээ.

Өнөөдөр Ажаа гэгээнтний санаачилсан буянтай үйлс ажил хэрэг болж дотоод, гадаадын мянга мянган нигүүлсэнгүй үйлстнүүдийн хандив тусламжаар оношилгоо, эмчилгээ, хавдрын мэс заслын хэсэг, 25 ортой нярайн эрчимт эмчилгээний, 50 ортой цусны эмгэг-хавдар судлалын тасаг, сургалтын болон эмч мэргэжилтнүүд байрлах өрөө, тасгуудын онцлогт тохирсон тоног төхөөрөмж суурилуулсан хоёр барилга бүхий эмнэлэг ашиглалтад орж байна. 3 сая гаруй ам. долларын хөрөнгө оруулалт хийж энэ сайхан эмнэлгийг барьж ашиглалтад оруулж байгаа нь Ажаа гэгээнтний монгол хүний өгөөмөр сэтгэлийн буянтай үйлс билээ.

Ажаа гэгээнтний энэхүү буянтай үйлсийг дэмжин миний бие санал гаргаж барилгын дотоод засалд зориулан 400 сая төгрөгийг УИХ-аар батлуулж өгсөн. Мөн Ерөнхий сайд Н.Алтанхуягийн санаачлагаар Монгол Улсын Засгийн газрын хөрөнгө оруулалтаар хамгийн сүүлийн үеийн Siemens брэндийн тоног төхөөрөмж бүхий хүүхдийн зүрхний ангиографийн лабораторийг байгууллаа. Цаашид Австри улсын хөнгөлөлттэй зээлээр компьютер томографийн тоног төхөөрөмжийг нийлүүлэх бэлтгэл ажил хийгдэж байна.

Эх, хүүхдийн эрүүл мэндийн төвийн Хүүхдийн эмнэлгийн өргөтгөлийн барилга байгууламжийн гаднах зам, талбай, машины зогсоолыг Монгол Улсын Засгийн газар, нийслэлийн Засаг даргын дэмжлэгтэйгээр “Гудамж” төслийн хүрээнд тохижуулж, Монголын залуучуудын холбооны санаачлагаар залуучууд гадна талбайн тохижолт, цэвэрлэгээнд оролцсон байна.

Ажаа гэгээнтний санаачилсан Эх, хүүхдийн эрүүл мэндийн төвийн энэхүү эмнэлэг өвчний учир зовж зүдэрсэн олон зуун хүүхдэд энэрэл буянаа өгөх хүүхдийн зориулалттай орчин үеийн томоохон эмнэлэг болж байгаад миний бие туйлын баяртай байна.

Монголын хүүхэд багачуудын эрүүл мэндийн төлөө Таны хийсэн энэхүү буянтай үйлсийг Монголын төр, монголын ард түмэн хэзээч мартахгүй.

Манай эмч, эмнэлгийн ажилтнууд Таны энэ их үйлсээр боссон эмнэлэгт олон мянган бяцхан үрсийг эрүүл энх болгохын төлөө бүхий л хүчин чадлаа зориулан ажиллана гэдэгт би итгэлтэй байна.

Эрхэм Ажаа гэгээнтэн Танд эрүүл энх, урт удаан наслахын өлзийт ерөөлийг өргөн дэвшүүлье. Эх, хүүхдийн эрүүл мэндийн төвийн нийт эмч, сувилагч, ажилтнууддаа ажлын амжилт хүсье.

Баярлалаа Та бүхэнд.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.