Энэтхэг дэлхийн хамгийн олон хүнтэй улс болов. Хэд гэдгийг хэн ч үл мэднэ. Яагаад гэж үү? Энэтхэг 10 жил тутамд 1 удаа хүн амаа тоолдог уламжлалтай ч 2021 оны тооллого Ковидын улмаас хойшилжээ. Хүн амын тооллогод ажил эрхлэлт, орон сууц, бичиг үсэг мэдэх эсэх, цагаачлал, хүүхдийн эндэгдэл зэрэг асуулт бөглүүлдэг бөгөөд тэд техникийн боломж, өөр олон шалтгааны улмаас өнөөг хүртэл хойшлуулсаар байгаа аж.
Гол сөрөг хүчин болох Үндэсний конгресс нам засгийн газар хөдлөхгүй байгаа нь 2024 оны сонгуулийн өмнө ажилгүйдэл ихэссэн зэрэг улс төрийн эмзэг тоо баримт задрахаас айсан хэрэг гэж мэдэгдэв. “Модигийн засгийн газар ажилгүйдэл, ковидын үеийн нас баралт зэрэг чухал асуудлаарх тоо баримтыг нуух хандлагатай байгаа” гэж тус намын хэвлэлийн төлөөлөгч мэдэгджээ.
НҮБ 4 сарын 14-ний өдөр Энэтхэгийн хүн ам 1 тэрбум 425 сая 775 мянга 850-д хүрнэ гэж мэдээлж байсан. Одоо нэгэнт дээрх хугацаа өнгөрсөн тул бид энэ тоонд итгэхээс өөр аргагүй. Өнгөрсөн 10 жилд Энэтхэгийн хүн ам 210 саяар өсчээ. Бас л тоо шүү. Харин 3.5 сая гэдэг хэр их тоо юм болдоо? Уул үзээгүй байж хормой шууж, ус үзээгүй байж гутлаа тайлах шахав.
Хамгийн сонирхолтой нь Энэтхэгийн хүн амын тооллогыг төрийн өмчит сургуулийн 330 мянган багш нар гүйцэтгэдэг гэнэ. Тэд айл өрх нэг бүрээр орж, дээр дурдсан анкетыг бөглүүлдэг бөгөөд дараа нь холбогдох байгууллагууд нэгтгэн дүгнэх ёстой. 2021 онд гаргасан төлөвлөгөөнд дурдсанаар, тэд 2 үе шаттай явагдах асуулгаа 20 гаруй асуулттай, 16 хэлээр бөглүүлэхээр бэлджээ. Нийт 11 сар үргэлжлэх энэ ажилд 1.05 тэрбум доллар зарцуулна. Аргагүй олон шашин, хэл яриа, нутгийн аялга бүхий эртний соёлт их гүрэн юм.
Багш нар Ковидын дараа тус тусынхаа ажилдаа оржээ. Хүн амын тооллогоос гадна тэд энэ онд 9 мужид явагдах сонгууль, ирэх жилийн их сонгуульд ажиллана. Энэ нь тэдний багшлах ажилд тодорхой хэмжээгээр нөлөөлдөг, мөн цалин хангамжийн асуудал ч яригддаг талаар 2.3 сая гишүүнтэй Энэтхэгийн үндэсний бага сургуулийн багш нарын холбооны мэргэжилтэн Арвинд Мишра хэлэхдээ, багш нар хүн амын тооллого, сонгуулийн үеэр ажиллахыг албан ёсоор хуульчилсан. Багш хүн нийгэмд хүндлэгдэх ёстой. Тэд дэлхийн хамгийн олон хүний төлөө хөлөө эцтэл гүйж, дараа нь буцаан олголтоо хүлээж суух ёсгүй. Бид тэдний цалинг нэмүүлэхээр хөөцөлдөж байгаа” гэжээ. За ямартай ч Солонгосын үйлдвэрүүдэд тэдний ажиллах орон зай байхгүй.
М.Мөнхжаргал
Энэ мэдээ танд таалагдаж байвал LIKE хийгээрэй. Танд баярлалаа.
