Японд коронавирусын халдварын шинж тэмдэгтэй адил шинж тэмдэг илэрсэн иргэд эмнэлгүүдэд ачаалал үүсгэхээс сэргийлж, тэдгээр иргэдэд зориулсан тусгай дугаар гаргаж буй талаар тус улсын Эрүүл мэндийн яамнаас мэдээлжээ.
Японы Эрүүл мэндийн яамнаас зөвлөснөөр амархан ядарч, амьсгалахад хүндрэлтэй болж, 4 ба түүнээс олон хоног 37.5 хэм болон түүнээс дээш хэмээр халуурсан иргэд коронавирусын халдварыг хариуцсан үндэсний эрүүл мэндийн төвийн дугаарт холбогдох боломжтой болсон байна. Японд Ковид-19 буюу коронавирусын шинэ төрлийн вирусын халдварын 606 тохиолдол бүртгэгдээд байгаагийн 544 нь Ёкохама боомтод хөл хорионд ороод байгаа Diamond Princess хөлөг онгоцон дээр бүртгэгдээд байгаа билээ.
Японы Ерөнхий сайд Шинзо Абэ өнгөрсөн амралтын өдрүүдээр эрүүл мэндийн салбарын мэргэжилтнүүдтэй уулзсан ба уулзалтын дараа Японы Эрүүл мэндийн сайд Кацүнобү Като " Япон улс коронавирусын халдварын дэгдэлтийн дараагийн үе шат руу орж байна" хэмээн анхааруулсан юм. Тэрээр, "Шаардлагагүй тохиолдолд олноороо цуглахгүй байх, өндөр настнууд болон архаг хууч өвчтэй иргэдийг олон хүн цугларсан газраас хол байхыг зөвлөж байна." хэмээн анхааруулжээ.
Кацүнобү Катогийн мэдээлснээр Японд коронавирусын халдварын дэгдэлт эхний шатандаа явагдаж байгаа учраас халдварын эх үүсвэрийг тогтооход хүндрэлтэй байгаа аж. Түүнчлэн халдвар авсан иргэдийн тоо нэмэгдэх төлөвтэй байгаа учраас эмнэлгийн байгууллагууд бэлэн байдалд байх ёстой хэмээн мэдэгдсэн юм. Коронавирусын халдварын дэгдэлттэй холбоотойгоор Японд амны хаалтын хомсдол үүсээд байгаа ба иргэд өөрсдөө амны хаалт хийж зүүхэд хүрээд байна.
Коронавирусын халдварын тархалтаас сэргийлэх үүднээс Японы Хааны ордон Эзэн хаан Нарухитогийн төрсөн өдрийн ёслолыг цуцалсан бол ирэх сарын 1-нд зохион байгуулагдах Токио Марафонд зөвхөн мэргэжлийн тамирчид л оролцохоор болжээ. Түүнчлэн Японы компаниуд ажилчиддаа гэрээсээ ажлаа хийх боломжийг олгож байгаа аж.
Коронавирусын халдвар дэгдсэнтэй холбоотойгоор Хятадын эрх баригчид групп аяллуудыг хориглосон ба үүнээс болж Японд айлчлах жуулчдын тоо огцом буурчээ. 2019 онд л гэхэд Япон улс Хятадаас 9.6 сая жуулчин хүлээн авч байсан аж. Тэгвэл 2019 оны 4-р улиралд эдийн засгийн өсөлт нь 1.6 хувиар буураад байсан Японы аялал жуулчлал, эдийн засгийн салбарт коронавирусын халдвар дахин томоохон цохилт үзүүлэх төлөвтэй байгааг мэргэжилтнүүд онцолжээ.
Эх сурвалж: CNN
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
